آؤکیں اقتصادی دیمروئی ءِ ھاتر ءَ معتبر ءُ دسترس ءِ ڈیٹا کنکٹیویٹی المی انت، صدر آصف علی زرداری

اسلام آباد۔17مئی  (اے پی پی): صدر ءِ مملکت آصف علی زرداری ءَ گوشت کہ آیوکیں اقتصادی دیمروئی، سرکاری ازمت ءُ توامیں پاکستانی آنی واستہ جوانیں موہ آناں رسگ ءِ واستہ معتبر ءُ دسترس ءِ ڈیٹا کنکٹیویٹی المی اِنت۔ صدر ءِ مملکت کارگس ءِ پریس ونگ ءِ نیمگ ءَ جاڑی بوتگیں بیان ءِ رد ءَ صدر ءِ مملکت ءَ ٹیلی کمیونیکیشن ءُ انفارمیشن سوسائٹی ءِ جھان ءِ روچ 2026 ءِ موہ ءَ وتی کلوہ ءِ تہ ءَ پاکستان ءِ ٹیلی کمیونیکیشن کمیونٹی ءُ ھما درستیں مردم آناں مبارک بات داتگ کہ آ ملک ءِ ڈیٹا انفراسٹرکچر ءَ را مھکم کنگ ءَ اَنت۔ آئی ءَ گوشت کہ اے سال ءِ بنگپ ”ڈیٹا لائف لائنز: یک جڑیں دگنیا ءِ مھکم کنگ“ ءَ روچ مرزی زند ءِ تہ ءَ معتبر ءُ رسائی ءِ رابطہ ءِ گیش بوھوکیں ارزشت ءَ را پدر کنگ بوتگ۔ ڈیجیٹل نیٹ ورک پہ وانگ ءُ زانگ، جان سلامتی، تجارت، بانکداری ءُ سرکاری آسراتی ءِ واستہ یک ضلورت ءِ جوڑ بوتگ اَنت وھدے کہ دور ءُ پدیں دمگاں نندوکیں شہری آنی واستہ اے رابطہ ءِ زندمان ءُ زانتکاری ءِ رسگ ءِ یک ھاسیں وسیلہ یے جوڑ بوتگ۔ صدر ءِ مملکت ءَ گوشت کہ پاکستان ءِ ٹیلی کمیونیکیشن ءِ شوبگ راجی دیمروئی ءَ مزنیں کردے پیلو کنگ ءَ انت۔ آئی ءَ گوشت کہ مالی سال 2024-25 ءِ ساھت ءَ اے شوبگ ءَ 838ملین ڈالر ءِ سرمایہ کاری کنگ بوتگ، وھدیکہ ایشی ءَ چہ 10کروڑ کلدار آمدنی بوتگ۔ 1075 ارب ءِ سرا بوتگ۔ آئی ءَ گوشت کہ ملک ءَ 205ملین ءَ چہ گیش ٹیلی کام ءِ کارمرد کنوک ءُ 161ملین ءَ چہ گیش براڈ بینڈ ءِ کارمرد کنوک اَنت، آھاں فائبر آپٹک نیٹ ورک، آبدوز کیبل سسٹم ءُ سرجمیں ملک ءَ موبائل کوریج ءِ وسیلگ ءَ کمک رسیت۔ آئی ءَ گوشت کہ مارچ 2026 ءَ پاکستان ءِ آئی ایم ٹی / ایف ٹی جی سپیکٹرم نیلامی ءِ سوبمندیں سرجمی ملک ءِ ڈیجیٹل آیوکیں وھد ءِ نیمگ ءَ یک مزنیں گامگیج ءِ ثابت بوت۔ آئی ءَ گوشت کہ نیلامی ءَ چہ راجی خزانہ ءِ واستہ 509.6ملین ڈالر پیداک بوتگ ءُ موبائل آپریٹرز ءِ سپیکٹرم ءِ تخصیص ءَ را گیشی بوتگ ایشی ءَ چہ ترند ءُ معتبریں انفارمیشن کنکشن ءِ بنیات ءِ پجارینگ بوتگ۔ آئی ءَ گوشت کہ وفاقی حکومت صوبائی حکومت آنی گوما کمک ءَ سرجمیں ملک ءَ ڈیٹا رسائی ءُ رابطہ کاری ءَ را گہتر کنگ ءِ واستہ گامگیج آنی سر ءَ عمل کنگ ءَ انت۔ آئی ءَ گوشت کہ یونیورسل سروس فنڈ ءِ وسیلگ ءَ لاکھوں مردم آناں براڈ بینڈ ءُ وائس سروسز سر کنگ بوتگ کہ آ پیسر ءَ اے آسراتی ءَ چہ زبھر بوتگ اَنت، وھدیکہ فائبر نیٹ ورک ءِ تہ ءَ گیشی، سرمایہ کاری ءَ را دیمروئی دیگ ءُ دوریں دمگ آنی واستہ سیٹلائٹ کمیونیکیشن ءِ ضلورت آناں گڈی رنگ دیگ ءِ واستہ ھم گامگیج زورگ بوھگ ءَ اِنت۔ صدر ءِ مملکت ءَ وزارت انفارمیشن ٹیکنالوجی ءُ کمیونیکیشن، پی ٹی اے، سیلولر موبائل آپریٹرز ءُ ایندگر شریک آنی کوشست آناں ساڑاتگ ءُ گوشت کہ اے ادارگ پاکستان ءِ ڈیٹا سسٹم ءَ را مھکم کنگ ءَ ھاسیں کرد پیلو کنگ ءَ اَنت۔