چمڑا ءِ صنعت ءِ ڈل ءَ وفاقی وزیر تجارت ءَ گوں گند ءُ نند کتگ ، مقابلہ ءِ چیلنج ءُ گہتری کار ءِ تجویز آنی سر ءَ گپ ءُ تران 

اسلام آباد۔14مئی  (اے پی پی): چمڑا ءِ صنعت ءِ نمائندگ آنی ڈل ءَ پنچ شمبے ءِ روچ ءَ وفاقی وزیر تجارت جام کمال خان ءَ گوں گند ءُ نند کت۔ دیوان ءِ تہ ءَ اے شوبگ ءِ برآمداتی کارکردگی، مقابلہ ءِ چیلنج، ٹیکس ءِ دباؤ، مارکیٹ ءِ رسائی ءِ جیڈھ ءُ صنعتی دیمروئی ءُ برآمداتی گنجائش ءَ را مھکم کنگ ءِ مول ءُ مراد ءِ رد ءَ گہتری کار ءِ تجویز آنی سر ءَ تران کنگ بوتگ۔ گند ءُ نند ءِ ساھت ءَ ڈل ءِ باسک آناں گوشت کہ پاکستان ءِ مھکمیں مال ءُ مڈی ءِ بنیات، مینوفیکچرنگ ءِ مہارت، ءُ چمڑا ءِ پوشاک، دستانے، پاد، ہینڈ بیگ ءُ ایندگر ارزشت داریں چیز آنی برآمد ءِ توانائی ءِ باوجود اے شوبگ ءَ را بازیں ڈھانچہ ءِ رکاوٹ آنی دیم ءَ انت۔ ڈل ءَ وفاقی، صوبائی ءُ میونسپل اتھارٹی آنی نیمگ ءَ چہ ایر کنگ بوتگیں بازیں پٹ ءُ پول، منظوری، سرٹیفیکیشن ءُ جتا جتائیں ٹیکس آنی سرجمیں بار ءِ سر ءَ جیڈھ ءِ درشانی کتگ۔ شریکیں مردماں کاروبار ءِ آسراتی ءَ را گہتر کنگ ءُ آپریشنل جیڈھ آناں کم کنگ ءِ واستہ یک سادہ ءُ ہمگامیں فریم ورک ءُ یک ونڈو ٹیکسیشن ءِ نظام ءِ ضلورت ءِ سر ءَ زور پر دات۔ صنعت ءِ نمائندگاں بنداتی بجٹ ءِ تجویز ھم شیئر کتگ، ایشی ءِ تہ ءَ ٹیرف ءِ عقلی کنگ ءِ گامگیج، خام مال ءِ سر ءَ ڈیوٹی ءِ ایڈجسٹمنٹ ءُ برآمدات ءِ سر ءَ بڈوئی مینوفیکچرنگ یونٹ آنی واستہ ٹیکس ءِ چھوٹ ھوار اَنت۔ شریکیں مردماں گوشت کہ برآمد کنوک آناں یک مزنیں صنعتی ماحولیاتی نظام ءِ تہ ءَ آسراتی دیگ بہ بیت۔ وفاقی وزیر جام کمال خان ءَ گوشت کہ اسٹیک ہولڈر آنی نیمگ ءَ چست کتگیں جیڈھ آناں گیواری کنگ بیت ءُ پاکستان ءِ برآمداتی مقابلہ ءِ تہ ءَ گیشی ءِ واستہ نہ ایوک ءَ ترندیں آسراتی دیگ بیت بلکیں ٹیکس، مارکیٹ ءِ رسائی، مالی کمک ءُ صنعتی پیداوار ءِ وڑیں پڑ آنی تہ ءَ دراجیں مدتی ڈھانچہ ءِ گہتری کار ھم کنگ بنت۔ جام کمال ءَ پاکستان ءِ برآمدات ءِ سر ءَ بڈوئی مینوفیکچرنگ ءِ شوبگ ءَ را مھکم کنگ ءِ واستہ عملی گہتری کار آنی کمک ءُ صنعت ءِ سٹیک ہولڈر آنی گوما نزیکیں سیادی برجائی ءِ واستہ وزارت تجارت ءِ جزم ءِ سر ءَ زور پر دات۔ اے گند ءُ نند شعبہ جات ءِ رکاوٹ آناں دور کنگ ءُ پاکستان ءِ چمڑا ءِ صنعت ءِ سرجمیں برآمداتی گنجائش ءَ را دل یکیمی کنگ ءِ واستہ برجم دارگ بوتگ۔ صلاحیت ءِ پچ کنگ ءِ ھاتر ءَ سرکاری ءُ نجی تعاون ءِ برجاہ دارگ ءِ سر ءَ ھم یکجائی تپاک ءِ سر ءَ سر بوتگ۔