ریلوے ءِ وزیر ءَ پشاور ءِ مہلوک ءَ را سوگات ءِ رد ءَ نوکیں آسراتی  آنی ، "عوام ایکسپریس”  ائید ءَ پیسر  بنگیج کنگ ءِ جار جتگ

اسلام آباد۔14مئی  (اے پی پی): ریلوے ءِ وفاقی وزیر محمد حنیف عباسی ءَ ائید ءَ پیسر پشاور ءِ الس ءَ را مزنیں سوگات ءِ رنگ ءَ نوکیں آسراتی ءَ گوں لیسیں عوام ایکسپریس ءِ بنگیج کنگ ءِ جار جتگ۔ وزارت ریلوے ءِ نیمگ ءَ جاڑی بوتگیں بیان ءِ رد ءَ وفاقی وزیر ءَ گوشت کہ عوام ایکسپریس ءِ باقاعدہ بنگیج 24مئی ءَ کنگ بیت، وھدیکہ ائید ءَ چہ پیسر ٹرین ءَ را سرجمی ءَ اپ گریڈ کنگ ءُ مسافر آنی واستہ دستیاب کنگ بیت۔ جدید ریکاں گوں لیسیں عوام ایکسپریس کمیں وھد ءِ تہ ءَ کراچی ءَ سر بیت ءُ مسافر آناں ترند، وشھال ءُ جدید سفری آسراتی پجاری کنت۔ محمد حنیف عباسی ءَ گوشت کہ الس ءَ را نوکیں، ایمن ءُ آرام دہ سفری آسراتی پجاری حکومت ءِ وژن انت۔ آئی ءَ گوشت کہ ھمک مزنیں شہر ءَ چہ یک پرائم ٹرین ءِ چلائینگ بیت وھدیکہ نوکیں لائن آنی سر ءَ ریلوے ءِ نظام ءَ را دیمروئی دیگ ءِ واستہ گامگیج جاری انت۔ ریلوے ءِ وفاقی وزیر ءَ اے جزم ءِ درشان کت کہ پاکستان ریلوے ءِ گہتری ءُ مسافر آنی آسراتی حکومت ءِ اولی ترجی انت ءُ ریلوے ءِ شوبگ ءَ گہتری کار ءِ میوہ الس ءِ گور ءَ سر کنگ بنت۔