آسراتی  ءُ آبادی ءِ نیام ءَ توازن مھکمیں دیمروئی ءِ ضمانت اِنت، مزن وزیر ءَ دیوان ءَ گوں تران کنان ءَ راجی آبادی کونسل ءِ جوڑ کنگ ءِ پیسلہ

اسلام آباد۔14مئی  (اے پی پی): مزن وزیر محمد شہباز شریف ءَ گیش بوھوکیں آبادی ءِ واستہ جوان ءُ یکجاھیں راجی حکمت عملی ءِ جوڑ کنگ ءِ پنت ءُ شون کتگ ءُ راجی تک ءَ آبادی ءِ ھوالگ ءَ پالیشی جوڑ کنگ ءِ واستہ راجی آبادی کونسل ءِ جوڑ کنگ ءِ پیسلہ کتگ۔ پنچ شمبے ءِ روچ ءَ مزن وزیر ءِ سروکی ءَ گیش بوھوکیں آبادی ءِ جیڈھ آنی سر ءَ یک ھاسیں دیوان ءِ برجم دارگ بوت، ایشی ءِ تہ ءَ وفاقی منصوبگ بندی ءِ وزیر احسن اقبال، اقتصادی امور ءِ وفاقی وزیر احد خان چمھی، موسمیاتی بدلی ءِ وفاقی وزیر مصدق ملک، وفاقی وزیر ءِ اطلاعات ءُ شنگکاری، صدر مطفہ راجی وزیر ا ءِ راجی جان سلامتی ءِ ھاتر ءَ ملک مختار احمد بھارت ءُ سیادی داروکیں مزنیں سرکاری کارندہ آں بہر زرتگ۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر ءَ گند ءُ نند ءَ گیش بوھوکیں آبادی ءِ واستہ جوان ءُ یکجاھیں راجی حکمت عملی ءِ جوڑ کنگ ءِ پنت ءُ شون کتگ۔ آئی ءَ راجی تک ءَ آبادی ءِ ھوالگ ءَ پالیشی جوڑ کنگ ءِ واستہ راجی آبادی کونسل ءِ جوڑ کنگ ءِ جار ھم جتگ کہ آ وت ایشی ءِ سروکی ءَ کنت۔ راجی آبادی کونسل ءِ تہ چاریں صوبہ آنی سر وزیر آزات کشمیر ءِ مزن وزیر ءُ گلگت بلتستان ءِ سر وزیر ھوار بنت۔ مزن وزیر ءَ دیوان ءَ گوں گشتانک دیان ءَ گوشت کہ وسیلگ ءُ آبادی ءِ نیام ءَ توازن برجمیں دیمروئی ءِ ضمانت اِنت، تیزی ءَ گوں گیش بوھوکیں آبادی ءَ چہ راجی وسیلگ آنی سر ءَ دباؤ گیش بوھگ ءَ اِنت ءُ دیمروئی ءِ واستہ مزنیں چیلنج اِنت۔ آئی ءَ گوشت کہ حکومت سرپدی گامگیج، جان سلامتی ءُ وانگ ءُ زانگ ءِ آسراتی آناں گہتری ءُ متوازن دیمروئی ءِ وسیلگ ءَ آبادی ءِ گیش بوھوکیں رفتار ءَ را کنٹرول کنگ ءِ واستہ ھرچ وڑیں کوشست کنگ ءَ اِنت ءُ آبادی ءِ جوانیں انتظام ءِ واستہ ”سرجمیں سرکار ءِ رھبند“ ءِ زورگ بہ بیت۔ مزن وزیر ءَ الس ءَ را سرپدی گامگیج ءِ تہ ءَ اسکالر ءُ کمیونٹی لیڈر آنی ھوار بوھگ ءِ گوما یک یونٹ ءِ جوڑ کنگ ءِ پنت ءُ شون کت۔ دیوان ءَ ملک ءِ گیش بوھوکیں آبادی ءُ ایشی ءِ کنٹرول ءُ گہبودی ءِ واستہ گامگیج آنی ھوالگ ءَ سرپد کنگ بوت، ایشی ءِ تہ ءَ سرپدی دیگ بوت کہ ملک ءَ آبادی ءِ گیشی ءِ شرح 2.55درسد ءَ سر بوتگ کہ اے یک مزنیں چیلنج ءِ انت۔ کلیں جاندراھی مراگش آنی تہ ءَ ھاندان ءِ منصوبہ بندی ءِ آسراتی ءِ پجارینگ ءَ چہ آبادی ءِ کنٹرول ءَ کمک رسیت۔ بریفنگ ءِ رد ءَ چاگردی سلامتی ءِ پروگرام فیملی پلاننگ ءَ گوں ھمگرنچ کنگ بنت۔ دیوان ءَ را ھال دیگ بوت کہ زالبولانی اقتصادی بااختیار کنگ آبادی ءِ کنٹرول ءِ تہ ءَ مزنیں کردے پیلو کنت ءُ ھاندان ءِ منصوبہ بندی ءِ سر ءَ سرپدی گامگیج ءِ بندات کنگ بوھگ ءَ اِنت۔