پاکستان ءِ دیم ءَ روگ ءِ بار ءَ ھما وھد ءَ کنٹرول کنگ نہ بیت کہ آھانی دیم ءَ دارگ، اسکریننگ، ساپیں آپ ءُ لس جان سلامتی ءِ سرپدی ءَ را اولیت دیگ مہ بیت، سید مصطفی کمال

اسلام آباد۔13مئی  (اے پی پی): راجی جان سلامتی ءُ چاگردی آسراتی ءِ وفاقی وزیر سید مصطفیٰ کمال ءَ گوشت کہ پاکستان نادراھی آنی گیش بوھوکیں بار ءَ را ھما وھد ءَ کنٹرول کت نہ کنت داں وھدے کہ ایشی ءِ گر ءُ دار، اسکریننگ، ساپیں آپ ءُ السی جان سلامتی ءِ سرپدی ءَ را اولیت دیگ مہ بیت۔ قومی اسمبلی ءِ تہا جست ءُ پرس ءِ وھد ءَ آئی ءَ گوشت کہ وزارت جان سلامتی ءِ مالی وسیلگ کم انت پرچا کہ آئینی بندوبست ءِ رد ءَ گیشتریں فنڈز صوبہ آناں دیم دیگ بنت کہ اودا جان سلامتی ءِ شوبگ ءِ سر ءَ بنجاہی اختیار ھم صوبہ آنی گور ءَ انت۔ آئی ءَ گوشت کہ پاکستان اے وھد ءَ ھیپاٹائٹس سی ءَ چہ گیش آماچیں ملک آنی تہ ءَ ھوار اِنت آئی ءَ گوشت کہ ملک ءَ نزیک ءَ 11 لکھ مردم اے نادراھی ءَ گوں آماچ اَنت وھدیکہ اسکریننگ نہ بوھگ ءِ سبب ءَ نزیک ءَ 80درسد نادراہ وتی جاوراں چہ بے ھال اَنت۔ وفاقی وزیر ءَ گوشت کہ مزن وزیر محمد شہباز شریف ءِ گامگیج ءَ سرجمیں ملک ءَ حکومت ءَ مفت ءَ ہیپاٹائٹس سی ءِ اسکریننگ ءُ علاج ءِ پروگرام بندات کتگ۔ آئی ءَ گوشت کہ اے پروگرام اسلام آباد ءَ چہ آزمائشی بنیات ءَ بندات کنگ بوتگ، ایشی ءِ چیر دستی ءَ 12 اسکریننگ سنٹر جوڑ کنگ بوتگ، وھدیکہ یک سال ءِ اندر ءَ صوبہ آنی کمک ءَ سرجمیں ملک ءَ اے سنٹر آناں ھزار ءَ سر کنگ بیت۔ سید مصطفیٰ کمال ءَ گوشت کہ اے پروگرام ءِ تخمینہ ءِ ھرچ ءُ درچ 67 ارب کلدار انت، ہیپاٹائٹس سی ءِ نادراہ آنی اسکریننگ ٹیسٹ ءُ درمان آنی سرجمیں ھرچ ءُ درچ حکومت وتی زمہ واری ءَ زوریت۔ آئی ءَ گوشت کہ یک اسکریننگ ٹیسٹ ءِ ھرچ ءُ درچ نزیک ءَ 7 ھزار کلدار ءُ یک نادراہ ءِ واستہ دوائی آنی ھرچ ءُ درچ نزیک ءَ 34 ھزار کلدار انت بلے ایشی ءِ واستہ شہری آناں ھچ وڑیں زرّ دیگ نہ لوٹ ایت۔ وفاقی وزیر ءَ ھشدار دات کہ ہیپاٹائٹس سی ءِ ٹپاسگ ءِ تہ ءَ تاخیر ءِ سبب ءَ جگر ءِ کینسر ءِ کیس آنی تہ ءَ گیشی بوھگ ءَ اِنت ءُ اے گپ ءِ سر ءَ زور پر دات کہ مرگ ءُ دراجیں مدتی جان سلامتی ءِ پیچیدگی آناں کم کنگ ءِ واستہ رکّینگ ءُ زوتیں اسکریننگ المی اِنت۔ تھیلیسیمیا ءِ حوالہ ءَ آئی ءَ نکاح ءَ پیسر جوڑہ آنی اسکریننگ ءِ بابت ءَ قانون سازی ءِ حمایت کنگ ءِ ھاتر ءَ قانون ساز آنی منت گپت۔ آئی ءَ گوشت کہ پریونٹیو اسکریننگ ءَ چہ تھیلیسیمیا میجر ءِ نادراھی ءَ گوں زھگ آنی پیدائش ءَ را کم کنگ ءَ کمک رس ایت۔ آئی ءَ گوشت کہ بازیں ملک آنی تہ ءَ جوڑہ آنی واستہ لازمی اسکریننگ پروگرام آنی وسیلگ ءَ اے نادراھی ءَ را سوبمندیں رنگ ءَ کنٹرول کتگ۔ وفاقی وزیر ءَ گوشت کہ پاکستان ءِ جان سلامتی ءِ نظام ءِ سر ءَ گیشیں بار اِنت پرچا کہ ملک یک ”نادراہ پیداک کنوکیں کارخانہ“ جوڑ بوتگ کہ اودا نادراھجاہ آنی سر ءَ گیشیں زھر ءُ زھم اِنت وھدیکہ رکّینگ ءِ جان سلامتی ءِ سر ءَ دلگوشی ناکافی اِنت۔ آئی ءَ گوشت کہ پیدائش ءِ وھد ءِ تہ ءَ ھواریں جاہ، ویکسینیشن، ساپیں آپ ءِ رسگ ءُ صفائی ءِ نظام ءَ را گہتر کنگ ءَ چہ گیش کنگ ءِ ضلورت اِنت۔ مصطفیٰ کمال ءَ گوشت کہ پاکستان ءَ سالے ءِ تہ ءَ نزیک ءَ 6.13ملین زھگ ودی بنت، آبادی ءِ ترندیں گیشی ءُ جوانیں صفائی ءِ نہ بوھگ ءَ چہ جان سلامتی ءِ جیڈھ گیش ترند بوھگ ءَ انت۔ آئی ءَ اے گپ ءِ سر ءَ زار شانی کت کہ بے رھبندیں گند ءُ نند گلگت بلتستان ءَ بگر داں کراچی ءَ آپ ءِ ورگ ءِ وسیلگ آناں آلودہ کنگ ءَ اِنت ءُ ایشی ءِ سبب ءَ آپ ءِ سبب ءَ نادراھیانی شنگ ءُ تالان بوھگ ءَ اِنت۔ آئی ءَ گوشت کہ پاکستان ءَ نزیک ءَ 68درسد نادراھی آلودہ آپ ءَ گوں بندوک اَنت ءُ ایشی ءِ سر ءَ زور دیگ بوھگ ءَ اِنت آئی ءَ سرکاری ادارگ، پارلیمنٹرین ءُ عام مردم ءَ ھوار سرجمیں چاگرد ءَ را زور پر دات کہ آ اے بحران ءَ گوں گر ءُ چیل بوھگ ءِ واستہ وتی کرد ءَ پیلو بہ کن اَنت۔ آئی ءَ ایوان ءَ را اے ھم سرپدی دات کہ وزارت ءِ انفیکشن ءِ نادراھیانی یونٹ گلوبل فنڈ ءَ ھوار گلوبل پارٹنر آنی کمک ءَ ایچ آئی وی، ٹی بی ءُ ملیریا پروگرام آنی سر ءَ کار کنگ ءَ اِنت۔