ناشرکاری ءِ ھلاپ ءَ جنگ توامیں استان ءُ ملک ءِ زندگ بوھگ ءِ جنگ انت ،  پاکستان ءِ ھلاپ ءَ جنگ کابل سرکار ءِ وسیلہ ءَ بیگ ءَ اِنت،  دہلی ءِ گوما ھما کار کنگ بوتگ کابل ءِ گوما ھم بیت، وزیر دفاع خواجہ محمد آصف ءَ راجی اسمبلی ءَ وتی ھیالانی درشانی کت۔

اسلام آباد۔13مئی  (اے پی پی): وزیر دفاع خواجہ محمد آصف ءَ گشتگ کہ ناشرکاری ءِ ھلاپ ءَ جنگ پاکستان ، توامیں صوبہ ءُ ملک ءِ زندگ دارگ ءِ جنگ انت۔ پاکستان ءِ ھلاپ ءَ جنگ کابل سرکار ءِ وسیلہ ءَ بیگ ءَ اِنت۔ اے وہد ءَ پاکستان ءِ بابت ءَ دہلی ءُ کابل ءِ نیام ءَ ہچ وڑیں پرک نیست۔ پاکستان ءِ سلاہ بندیں اُرد بلتستان ءَ بگر داں گوادر ءَ پاکستان ءِ واستہ ثبوت دیگ ءَ انت۔ چار شمبے ءِ روچ ءَ راجی اسمبلی ءِ دیوان ءَ اپوزیشن ءِ باسک آنی نیمگ ءَ چست کتگیں نکات آنی پسو ءَ وزیر دفاع خواجہ محمد آصف ءَ گوشت کہ اے جوانیں گپ اِنت کہ اے وھد ءَ ناشرکاری ءِ جیڈھ خیبر پختونخوا سرکار ءِ گوما اِنت۔ تاوان مئے اِنت۔ پاکستان ءَ گوں کابل سرکار ءَ دراجیں گپ ءُ تران کتگ بلے آہاں وتی دمگ ءَ پاکستان ءِ ھلاپ ءَ کارمرد نہ کنگ ءِ بابت ءَ ھچ وڑیں نبشتہی کمک نہ داتگ۔ اوگان سرکار پہ ایشی ءَ تیار نہ اِنت، اے وھد ءَ اوگان سرکار ھندوستان ءُ ھندوتوا ءِ پراکسی جوڑ بوتگ۔ راستی ءِ جنگ ءَ شکست ءَ پد ہندوستان اللہ تعالیٰ ءِ فضل ءُ کرم ءَ گوں پاکستان ءَ براہ راست ٹکر کنگ ءِ جرات نہ کنت۔ انوں پاکستان ءِ ھلاپ ءَ سرجمیں جنگ کابل ءِ سرکار ءِ دست ءَ کنگ ءَ اِنت۔ وزیر دفاع ءَ گوشت کہ اوگانستان ءِ کمک ءُ آسراتی ءَ چہ پاکستانی سرزمین ءِ سر ءَ ناشرکاری بوھگ ءَ انت۔ اے چاگرد ءَ ابید ھم پاکستان ءَ گوں افغانستان ءَ گپ ءُ تران کت کہ ایشی ءِ ھچ وڑیں آسر نہ بوت۔ وزیر دفاع ءَ گوشت کہ سیمی ملک ءِ وسیلگ ءَ رابطہ ءِ کوشست بوت کنت بلے ما ایشی ءِ بابت ءَ ھچ وڑیں حتمی گپ جت نہ کن ایں ۔ وزیر دفاع ءَ گوشت کہ بازیں وھد ءَ چہ ناشرکاری ءِ جیڈھ ءِ سر ءَ خیبرپختونخوا ءِ سرکار ءِ مئے کمک نہ بوتگ بلے نوں اے کمک پجاری بوھگ ءَ انت۔ اے شر انت کہ ما درست ناشرکاری ءِ ھلاپ ءَ یکیں پج ءَ ئیں۔ وزیر دفاع ءَ گوشت کہ پاکستان ءَ سئے ملک ترکی، قطر ءُ سعودی عرب ءِ وسیلگ ءَ دل ءِ جہلانکی ءَ کوشست کتگ ءُ آھاں گوں دزبندی کتگ کہ آ ناشرکار آنی کمک ءَ را بند بہ کن اَنت، ناشرکار آنی تنصیبات ءُ کیمپ آناں ھلاس بہ کن اَنت ءُ آھانی آسراتی ءَ را بند بہ کن اَنت بلے آ اے گپ ءِ سر ءَ نہ آیگ ءَ اَنت۔ ایشی متلب ایش انت کہ جنگ کیت ءُ پدا جنگ کیت۔ رودرتکی سیمسر بہ بیت یا روکپتی سیمسر، دژمن یک اِنت ءُ پرک نیست۔ اے وھد ءَ دہلی ءُ کابل ءِ نیام ءَ ھچ وڑیں فرق نیست۔ ما یقیںن لوٹیں کہ اے فرق بہ بیت ءُ آ مئے گوں گپ ءُ تران بہ کن انت ءُ انچیں بندوبست بہ کن انت کہ ناشرکاری ءَ را بند بہ کن انت بلے اگاں آ پہ اے کار ءَ تیار نہ انت گڑا گوں دہلی ءَ ھما کار کہ کنگ بوتگ آ گوں کابل ءَ ھم کنگ بیت۔ ایوان ءَ ناشرکاری ءِ جیڈھ ءِ سر ءَ اگاں بحث بیت گڈا ایشی ءِ واستہ وھد ٹھینگ بوت کنت۔ وزیر دفاع ءَ گشتگ بلتستان ءَ بگر داں گوادر ءَ پاکستان ءِ سلاھ بندیں اُرد پاکستان ءِ ھاتر ءَ شھید کنگ ءَ انت ، ءُ اے پاکستان ءِ ھاتر ءَ بہ بیت سیاسی نپ ءِ ھاتر ءَ ناں ۔ آئی ءَ گوشت کہ گوستگیں روچ ءَ یک لیفٹیننٹ کرنل شھید کنگ بوتگ، فوج ءِ پجار پاکستان اِنت، تاں سئے ماہ پیش خیبرپختونخوا ءِ سرکار ءَ ناشرکاری ءِ ھوالگ ءَ ھچ وڑیں کمک نہ کتگ، حق ءِ جنگ ءِ مراگش آنی تہ ءَ اپوزیشن ءِ باسک لوٹائینگ بوتگ اَنت، بلے ایشانی تہ ءَ کس ءَ اے مراگش آنی تہ ءَ ھوار نہ بوتگ۔ وزیر دفاع ءَ گوشت کہ ناشرکاری ءِ ھلاپ ءَ جنگ پاکستان، توامیں صوبہ ءُ ملک ءِ برجائی ءِ واستہ جنگ انت۔ اگاں چہ اے ایوان ءَ صوبائیت ءِ نام ءَ توار چست کنگ بہ بیت اے راست نہ انت ۔ سلاہ بندیں اُرد ءُ کانود ءِ پجار ایوک ءَ پاکستان اِنت ۔