تجارت ءِ وفاقی وزیر جام کمال خان ءَ چینی وزیر ءِ کونسلر یانگ گوانگ یوآن ءَ گوں گند ءُ نند کتگ، نوکیں الیکٹرک ٹیکنالوجی ءِ بابت ءَ گپ ءُ تران

اسلام آباد۔13مئی  (اے پی پی): وفاقی وزیر تجارت جام کمال خان ءَ چین ءِ وزیر کونسلر یانگ گوانگ یوآن ءَ گوں گند ءُ نند کت۔ چار شمبے ءِ روچ ءَ برجم داشتگیں گند ءُ نند ءَ پاکستان ءُ چین ءِ نیام ءَ الیکٹرک گاڑی ، بیٹری ءِ جوڑ کنگ ءُ نوکیں صنعت ءِ تہ ءَ کمک ءَ را گیش کنگ ءُ نوکیں الیکٹرک ٹیکنالوجی ءِ وسیلگ ءَ پاکستانی آٹو انڈسٹری ءَ را نوکیں رھشونی دیگ ءِ ھوالگ ءَ گپ ءُ تران کنگ بوت۔ گند ءُ نند ءَ خرما ءَ چہ جوڑ بوتگیں ویلیو ایڈڈ پروڈکٹس ءِ برآمد ءِ گنجائش ءَ را گیش کنگ ءِ بابت ءَ ھم ھیال ریچی کنگ بوت۔ جام کمال خان ءَ گوشت کہ بلوچستان ءَ زیتون، پستہ، بادام، خرما ءُ کاج ءِ پیداوار دمگی ءُ درملکی سرمایہ کار آنی واستہ نایابیں اقتصادی موہ انت، ایشی ءَ چہ ہرکس ءَ سیت زورگ لوٹ ایت۔ آئی ءَ گوشت کہ پاکستان ءُ چین ءِ نیام ءَ میتگ آنی دیمروئی، زالبول آنی ازم ءُ شمسی توان ءِ منصوبگ آنی سر ءَ کمک ءِ سر ءَ چار ءُ بچار بوھگ ءَ انت۔ آئی ءَ گوشت کہ گوادر ءَ را دمگی تجارتی مرکز جوڑ کنگ بوھگ ءَ انت ءُ رسد ءِ آسراتی ءَ را مزنیں کچے ءَ مزن کنگ بوھگ ءَ انت۔ جام کمال خان ءَ پاکستان ءَ را چین، میان اُستمانی ءُ میاں اوستمانی تک ءِ نیام ءَ یک قدرتی تجارتی دروازگے لیک اِتگ۔ آئی ءَ گوشت کہ الیکٹرک گاڑی ءِ ٹیکنالوجی ءَ چہ پاکستان ءَ نوکیں صنعتی صلاحیت پیداک بوت کنت۔ آئی ءَ چینی کمپنی آنی گوما ٹیکنالوجی ءِ ٹرانسفر ءُ یکجائی صنعتی منصوبگ آنی ضلورت ءِ سر ءَ زور پر دات۔ گند ءُ نند ءَ پاکستان ءُ چین ءِ نیام ءَ کشت ءُ کشاری ءِ نوکیں رنگ ءُ دروشم ءُ موسم دوستیں کشت ءُ کشاری ءِ تہ ءَ کمک ءَ را گیش کنگ ءِ سر ءَ تپاک کنگ بوتگ، ءُ آپ ءِ بچت ءُ موسمی بدلی ءِ رد ءَ کشت ءُ کشاری ءِ پالیسی آناں وتیگ کنگ ءِ سر ءَ تپاک کنگ بوتگ۔ جام کمال خان ءَ گوشت کہ گلوبل سپلائی چین ءِ بدلی پاکستان ءِ واستہ نوکیں اقتصادی موہ پیداک کنگ ءَ انت۔