ناجائزیں وڑے ءَ کار کنوکیں وانگ ءُ زانگ ءِ ادارگ آنی ھلاپ ءَ ترندیں کارروائی کنگ بیت، پیرا

اسلام آباد ۔ 13 مئی (اے پی پی): پرائیویٹ ایجوکیشنل انسٹی ٹیوشنز ریگولیٹری اتھارٹی ءِ چیئرمین ڈاکٹر غلام علی ملا ح ءِ سروکی ءَ وتی دیوان ءَ نودربر ءُ مات ءُ پت آنی آیوکیں وھد، جان سلامتی ءُ ھک آنی رکھینگ ءِ واستہ ھاسیں ءُ سختیں پیسلہ کتگ۔ اتھارٹی ءَ پیسلہ کتگ کہ اسلام آباد ءَ ناجائزیں وڑے ءَ کار کنوکیں نجی وانگ ءُ زانگ ءِ ادارگ آنی ھلاپ ءَ سکیں قانونی کارروائی کنگ بیت۔ بازیں نوٹس، قانونی یاد دہانی ءُ لس مھلوک ءِ ھشدار ءِ باوجود قانون ءِ خلاف ورزی کنوکیں ادارگ آنی ھلاپ ءَ سکیں گامگیج چست کنگ بنت ایشانی تہ ءَ جرمانہ، ارش ءُ ادارگ آنی بند کنگ ھوار انت۔ اے مول ءُ مراد ءِ ھاتر ءَ ضلعی انتظامیہ ءُ سیادی داروکیں کانود ءِ برجائی ءِ ادارگ آنی ھمکاری ءَ ھاسیں برجائی ءِ کارروائی کنگ بیت۔ اتھارٹی ءَ اے ھم ھاسیں ھدایت داتگ کہ ھچ نجی وانگ ءُ زانگ ءِ ادارگ یک ماہ ءَ چہ گیش فیس ءِ جم کنگ ءِ وس ءَ نہ کنت ءُ فیس ایوک ءَ ھمک ماہ بنیاد ءَ جم کنگ بیت۔ دیمترا ہچ ادارہ ءَ را منظور بوتگیں 12 ماہ ءِ ٹیوشن ءِ مدت ءَ چہ گیش فیس ءِ جم کنگ ءِ اجازت نہ بیت۔ خلاف ورزی ءِ سرا قانونی کارروائی، جرمانہ ءُ قانونی حساب ءُ کتاب کنگ بیت۔ نودربر آنی جان سلامتی ءِ رکھینگ ءِ واستہ آئی سی ٹی پیرا ءَ لائٹ اسکول بیگ آنی سر ءَ ھم عمل کنگ ءِ پیسلہ کتگ تانکہ زھگ بھاری بیگ آنی سبب ءَ کمر ءِ درد، جسمانی کش ءُ چیل، کرنسی ءِ جیڈھ ءُ دگہ جان سلامتی ءِ ھترہ آناں چہ رکھینگ بہ بنت۔ کلیں پرائیویٹ اسکولاں ہدایت کنگ بوتگ کہ اسکول ءِ کیسگ ءِ وزن چہ زھگ ءِ بدن ءِ وزن ءَ 10 درسد ءَ گیش مہ بیت۔ اے مکسد ءِ واستہ غیر ضروری کتابانی کساس کم کنگ بہ بیت، شریں ٹائم ٹیبل جوڑ کنگ بہ بنت ءُ ہرجاہ کہ بوت کنت لاکر جوڑ کنگ بہ بنت۔ مات ءُ پت ءُ شہری آنی آسراتی ءِ واستہ یک ھاسیں شکایت ءِ مرکز ھم جوڑ کنگ بوتگ کہ اودا ناجائزیں فیس ءِ جم کنگ، اوور چارجنگ ءُ دگہ خلاف ورزی آنی شکایت درج کنگ بوت کنت۔ اے موہ ءِ سر ءَ اتھارٹی ءِ چیئرمین ڈاکٹر غلام علی ملا ح ءَ گوشت کہ نودربر آنی جان سلامتی، کوالٹی ءِ وانگ ءُ زانگ، مات ءُ پت ءِ ھک ءُ کانود ءِ حاکمیت مئے اولی ترجی اَنت، ھچ ادارگ ءَ را اجازت نہ بیت کہ آ نودربر ءُ مات ءُ پت ءَ را استحصال بہ کنت یا کانود ءَ چہ دریں کار بہ کنت، کانود ءِ سر ءَ سک باز عمل کنگ بیت۔ اتھارٹی ءَ اسلام آباد ءَ نودربر آنی منصفانہ وانگ ءُ زانگ، شفافیت، موثر ریگولیشن ءُ شریں مفاد ءِ ھاتر ءَ ھرچ وڑیں گامگیج زورگ ءِ وعدہ کتگ۔