حکومت ءَ دراجیں مدتی سرمایہ کاری ءِ سر ءَ دلگوشی دیگ ءَ ، شفاف ءُ سرمایہ کار دوستیں چاگرد ءِ دیمروئی ءِ ھاترا جزم ، سینیٹر محمد اورنگزیب

اسلام آباد۔13مئی  (اے پی پی): وفاقی وزیر خزانہ ءُ ریونیو سینیٹر محمد اورنگزیب ءَ گوشت کہ حکومت توانائی، معدنیات، بنیاتی ڈھانچہ، ٹیکنالوجی ءُ ڈیجیٹل مالیات ءِ وڑیں شوبگ آنی تہ ءَ دراجیں مدتی سرمایہ کاری ءِ ھاترا ھاسیں دلگوشی دیگ ءَ چہ شفاف، پیش گوئی ءُ سرمایہ کار دوستیں چاگرد ءِ دیمروئی ءِ واستہ جزم اِنت۔ آئی ءَ اے گپ چار شمبے ءِ روچ ءَ امریکی بیورو آف ساؤتھ اینڈ سینٹرل ایشیائی افیئرز ءِ اسسٹنٹ سیکرٹری ایس پال کپور ءَ گوں گند ءُ نند ءَ کت۔ اے موہ ءِ سر ءَ پاکستان ءَ امریکی چارج ڈی افیئرز نیٹلی بیکر ھم ھوار ات۔ گند ءُ نند ءَ پاکستان ءُ امریکہ ءِ نیام ءَ اقتصادی کمک، سرمایہ کاری ءِ موہ، تجارتی سیادی ءُ حکومت ءِ برجاھیں گہتری کاری ایجنڈا ءِ سر ءَ سرجمی ءَ گپ ءُ تران کنگ بوت، ایشی ءِ مول ءُ مراد اقتصادی استحکام ءَ را مھکم کنگ ءُ ملک ءَ کاروباری ءُ سرمایہ کاری ءِ چاگرد ءَ را گہتر کنگ اِنت۔ دوئیں نیمگ ءَ دو نیمگی اقتصادی سیادی ءَ را گیش پراھی کنگ ءُ وت مہ وتی دلچسپی ءِ شوبگ آنی تہ ءَ کمک ءَ را گیش کنگ ءِ سر ءَ ھم ھیال ریچی کنگ بوت۔ وزیر ءِ ھزانگ ءَ پاکستان ءُ امریکہ ءِ سیادی آنی تہ ءَ جوانیں دیمروئی آناں ساڑات ءُ شفاف، پیش گوئی لائک ءُ سرمایہ کار دوستیں چاگرد ءِ دیمروئی ءِ واستہ وتی جزم ءِ درشان کت۔ آئی ءَ پاکستان ءِ برجاھیں اقتصادی استحکام ءِ کوشست، گہتری کار ءِ عمل ءِ تہ ءَ پیشرفت ءُ مالیاتی پائیداری ءَ را گہتر کنگ، ٹیکس نیٹ ءَ را گیش کنگ، ڈیجیٹلائزیشن ءَ را ترند کنگ ءُ مالیاتی شمولیت ءَ را دیمروئی دیگ ءِ واستہ چست کتگیں گامگیج آنی سر ءَ زور پر دات۔ وزیر خزانہ ءَ کلیدی اقتصادی اشارہ آنی تہ ءَ انوگیں جوانیں رجحان آناں ھم پدر کت، ایشی ءِ تہ ءَ زرّ ءِ دیم دیگ، درائیں مالیاتی آمد ءُ میاں اوستمانی سرمایہ کاری مارکیٹ آناں دوبر رسائی ھوار اِنت۔ آئی ءَ اے گپ ءِ سر ءَ زور پر دات کہ حکومت توانائی، معدنیات، انفراسٹرکچر، ٹیکنالوجی ءُ ڈیجیٹل فنانس ءِ وڑیں شوبگ آنی تہ ءَ دراجیں مدتی سرمایہ کاری ءِ واستہ ھاسیں دلگوشی دیگ ءَ اِنت۔ ایس پال کپور ءَ پاکستان ءِ برجاھیں اقتصادی گہتری کار ءِ توسیپ کنان ءَ اے گپ ءِ سر ءَ زور پر دات کہ درملکی سرمایہ کاری ءُ تجارتی کاروائی آناں دیمروئی دیگ ءِ واستہ مقابلہ ءُ بھروسہ مندیں کاروباری چاگرد سک باز المی اِنت۔ پاکستان ءِ گوما اقتصادی کمک ءَ را گیش پراھ کنگ ءِ واستا امریکی واھشت ءِ درشان کنان ءَ آئی ءَ گوشت کہ امریکی کمپنی پاکستان ءَ دراجیں مدت ءِ سرمایہ کاری ءِ موہ آنی شوھازگ ءِ واھشت مند اَنت۔ امریکی چارج ڈی افیئرز ءَ پاکستانی حکومت ءِ امریکی کمپنی آنی گوما برجاھیں سیادی ءِ توسیپ کت ءُ سرمایہ کار دوستیں کاروباری چاگرد ءِ پھجارینگ ءِ واستہ چست کتگیں گامگیج آناں جوانیں رنگ ءَ لیک اِت۔ آئی ءَ گوشت کہ پاکستان ءَ جتا جتائیں شوبگ آنی تہ ءَ سرمایہ کاری ءِ موہ آنی شوھازگ ءِ واستہ امریکی کاروباری ادارگ آنی دلگوشی گیش بوھگ ءَ انت۔ گپ ءُ تران ءَ امریکی کاروباری ادارگ ءُ سرمایہ کار آنی گوما کمک ءِ گیشیں امکان آنی سر ءَ ھم ھیال ریچی کنگ بوت۔ دوئیں نیمگ ءَ اے گپ ءِ سر ءَ تپاک کنگ بوت کہ اقتصادی کمک ءِ دیمروئی ءِ واستہ سرکاری ءُ نجی شوبگ آنی نیام ءَ جوانیں کاروباری چاگرد ءُ برجاھیں رابطہ کاری المی اِنت۔ امریکی ڈل ءَ پاکستان ءِ گوما اقتصادی ءُ تجارتی کمک ءَ را گیش وسعت دیگ ءِ واستہ دلچسپی ءِ درشانی کتگ ءُ اقتصادی گہتری کار ءُ سرمایہ کاری ءَ را دیمروئی دیگ ءِ واستہ حکومت ءِ گامگیج آناں ساڑاتگ۔ دوئیں نیمگاں پاکستان ءُ امریکہ ءِ نیام ءَ اقتصادی سیادی آناں گیش مھکم کنگ ءُ یکجائی اقتصادی ءُ دیمروئی مول ءُ مراد آنی سر ءَ سر بوھگ ءِ ھاترا تعمیری ھوار بوھگ ءِ برجاہ دارگ ءِ وتی جزم ءِ پدر کنگ کت۔