مزن وزیر ءَ کشت ءُ کشاری ءِ وھد ءِ سر ءَ کد ءِ پھجارینگ ءَ را دل یکیمی کنگ ءِ پنت ءُ شون کتگ

اسلام آباد۔12مئی  (اے پی پی): مزن وزیر محمد شہباز شریف ءَ کشت ءُ کشاری ءِ وھد ءِ سر ءَ کد ءِ پھجارینگ ءِ پنت ءُ شون کتگ ءُ گوشت کہ میاں اوستمانی ملک آنی نیمگ ءَ چہ کد ءِ متبادل پھلائی ءِ منصوبگ بندی کنگ بہ بیت۔ سئے شمبے ءِ روچ ءَ مزن وزیر محمد شہباز شریف ءِ سروکی ءَ ملک ءِ تہ ءَ فوڈ سیکیورٹی ءُ کد ءِ ذخیرہ ءِ جاور ھال آنی سر ءَ یک ھاسیں دیوان ءِ برجم دارگ بوت، ایشی ءِ تہ ءَ وفاقی وزرا رانا تنویر حسین ، احد خان چیمہ، علی پرویز ملک ، وزیر مملکت بلال اظہر کیانی ، ھاسیں کمکار  ہارون اختر  ءُ  حکومت ءِ کلانہ این اپسرگ ھم  بہر زرتگ۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر ءَ کشت ءُ کشاری آناں وھد ءِ سر ءَ کد ءِ پھجارینگ ءَ را دل یکیمی کنگ ءِ پنت ءُ شون کتگ ءُ گوشت کہ خلیج ءِ ملک آنی نیمگ ءَ چہ کد ءِ پھجاری ءِ سر ءَ سک باز اثر آنی رد ءَ میاں اوستمانی ملک آنی نیمگ ءَ چہ کد ءِ متبادل پھلائی ءِ منصوبگ بندی کنگ بہ بیت۔ آئی ءَ خریف ءُ  ربیع  سیزن ءِ کد ءِ مزنیں ذخائر جوڑ کنگ ءِ پنت ءُ شون کتگ۔ مزن وزیر ءَ گوشت کہ کد ءِ بنجاہی پیداوار ءَ را گیش کنگ ءِ واستہ نوکیں پلانٹ آنی جوڑ کنگ ءِ منصوبگ آنی سر ءَ کار ترند کنگ بہ بیت، ءُ فوڈ سیکیورٹی ءَ را دل یکیمی کنگ ءِ واستہ کشت ءُ کشاری ءِ شوبگ ءِ ضلورت آناں پیلو کنگ حکومت ءِ اولی ترجی اِنت۔ مزن وزیر ءَ سیادی داروکیں وزارت ءُ ادارگ آناں پنت ءُ شون کت کہ آ کد ءِ پھلائی ءِ سر ءَ مدام نگرانی بہ کن اَنت ءُ کد ءِ وت جوڑیشتی کمی ءُ امبار ءَ جم  کنگ ءِ ھلاپ ءَ سکیں گامگیج بہ زور اَنت۔ دیوان ءَ مزن وزیر ءَ را بریفنگ ءِ تہ ءَ سرپدی دیگ بیت کہ ملک ءِ لوٹ آنی رد ءَ دمگی کد ءِ کارخانہ آناں قدرتی گیس ءِ بے رکاوٹیں سپلائی برجاہ اِنت، ءُ خریف ءِ فصل آنی واستہ کد ءِ جوانیں ذخیرہ دستیاب اِنت۔