منصوبہ بندی ءِ وفاقی وزیر ءُ اھوالکاری ءُ شنگ کاری ءِ وفاقی وزیر ءَ گوں گند ءُ نند کت، میڈیا ءِ دیمروئی ءُ آئی ءِ نوکیں لوٹ ءُ گزراں گوں ہمگرنچ کنگ ءِ بابت ءَ ھیال ءُ لیکہ

اسلام آباد۔12مئی  (اے پی پی): وفاقی وزیر برائے منصوبگ بندی، دیمروئی، کار  ءُ ھاسیں گامگیج احسن اقبال ءَ گوں وفاقی وزیر ءِ اھوالکاری ءُ شنگکاری عطا اللہ تارڑ ءَ گند ءُ نند کت۔ گند ءُ نند ءَ میڈیا ءِ استیں چاگرد ءِ رد ءَ میڈیا ءِ دیمروئی ءُ نوکیں لوٹ آنی گوما ھمگرنچ کنگ ءُ سرکاری ازمت آناں گہتری ءِ ھوالگ ءَ سرجمیں گپ ءُ تران کنگ بوت۔ وفاقی وزیر ءِ اھوالکاری ءُ شنگکاری ءِ ھمراھی ءَ سیکرٹری اھوالکاری اشفاق احمد خلیل ھم ھوار ات۔ گند ءُ نند ءِ تہ اے گپ ءِ سر ءَ زور پر دیگ بیت کہ پاکستان یک انچیں ملکے کہ آئی ءِ تہ ءَ بے دروریں نبشتہ کاری ءِ توانائی ھست ءُ اے توانائی آناں جوانیں رنگ ءَ کارمرد کنان ءَ نوکیں لیکہ آنی سر ءَ پبلک میڈیا سروسز ءَ را دیمروئی دیگ ءِ ضلورت اِنت تانکہ لس مھلوک ءَ را پکو ، وھدءُ موہ  ءُ ساپءُ سلہ ایں  ھال ءُ اھوال بہ رس اَنت۔ اے موہ ءِ سر ءَ تران کنان ءَ وفاقی وزیر احسن اقبال ءَ گوشت کہ میڈیا ریاست ءُ الس ءِ نیام ءَ یک مھکمیں پُل اِنت، پمیشکا راجی دیمروئی، جوانیں سوچ ءِ دیمروئی ءُ الس ءِ سرپدی ءِ تہ ءَ میڈیا ءَ را وتی جوانیں کرد ءَ پیلو کنگی اِنت۔ گند ءُ نند ءَ اے گپ ءِ سر ءَ ھم تپاک کنگ بوت کہ پاکستانی دود ءُ ربیدگ ، چاگردی ارزشت ءُ ھاندان ءِ نظام ءِ دیمروئی ءَ را رسانکدر ءِ یک ھاسیں بھرے جوڑ کنگ بہ بیت تانکہ نوکیں نسل وتی دود ءُ ربیدگ ءِ پجار ءُ راجی دود ءُ ربیدگ آنی گوما ھمگرنچ بہ بیت۔ وفاقی وزیر اھوالکاری عطا اللہ تارڑ ءَ اے جزم ءِ درشان کت کہ حکومت نوکیں ٹیکنالوجی، پیشہ وارانہ مہارت ءُ ذمہ وار احوالکاری ءِ اصول آنی رد ءَ میڈیا ءِ شوبگ ءَ را گیش موثر جوڑ کنگ ءِ واستہ عملی گامگیج برجاہ دار ایت۔ دیوان ءَ اے جزم ءِ پدا زور دات ءُ گوشت کہ اے وھد اتکگ کہ رسانکدر ءِ شوبگ ایوک ءَ روایتی لیکہ ءَ چہ یک ذمہ وار، پیشہ وارانہ ءُ ھاسیں راجی مول ءُ مراد ءِ نیمگ ءَ دیم ءَ بہ روت تانکہ پاکستان ءِ جوانیں عکس ءَ را جھان ءِ تک ءَ جوانیں رنگ ءَ پدر کنگ بہ بیت۔