ترکمانستان ءِ سفیر ءَ وفاقی وزیر برائے تجارت ءَ گوں گند ءُ نند کت، وت مہ وتی کمک ءَ را گیش کنگ ءِ بابت ءَ گپ ءُ تران

اسلام آباد۔12مئی  (اے پی پی): ترکمانستان ءِ سفیر عطاجان  ملاموف ءَ وفاقی وزیر تجارت جام کمال خان ءَ گوں گند ءُ نند کت ءُ جتا جتائیں پڑ آنی تہ ءَ وت مہ وتی کمک ءَ را گیش کنگ ءِ سر ءَ گپ ءُ تران کت۔ سئے شمبے ءِ روچ ءَ برجم داشتگیں گند ءُ نند ءَ وفاقی وزیر تجارت ءُ ترکمانستان ءِ سفیر ءَ تجارت، توانائی ءُ دمگی سیادی ءِ بابت ءَ سرجمیں گپ ءُ تران کتگ ءُ وت مہ وتی تجارت ءُ اقتصادی کمک ءَ را گیش کنگ ءِ سر ءَ ھم تپاک کتگ۔ جام کمال خان ءَ پاکستان ءَ را میاں اوستمانی ایشیا ءِ واستہ قدرتی تجارتی گیٹ وے لیک اِتگ ءُ گوشت کہ مئے بندرگاہ دمگ ءَ را جھان ءِ مارکیٹ آنی گوما یکجا کنگ ءِ واستہ ھاسیں کرد پیلو کت کن اَنت۔ جام کمال ءَ دوئیں ملک آنی نیام ءَ تجارتی راہ ءُ کاروباری سیادی آناں گیش فعال کنگ ءِ سر ءَ زور پر دات۔ آئی ءَ دوئیں ملک آنی نیام ءَ کاروباری فورم، نمائش ءُ چیمبر آف کامرس ءِ نیام ءَ سیادی ءَ را گیش کنگ ءِ سر ءَ تپاک کتگ۔ ترکمانستان ءِ سفیر ءَ دمگی تجارت ءُ سیادی ءِ واستہ پاکستان ءِ جوانیں کرد ءَ را ساڑات۔ آئی ءَ دوئیں ملک آنی نیام ءَ توانائی ءِ کمک ءُ دمگی رابطہ ءِ منصوبگ آنی سر ءَ ھم ھیال ریچی کُت۔ فریقین ءَ تجارت، رسد، ءُ نجی شعبہ ءِ کمک ءَ را دیمروئی دیگ ءِ ھاتر ءَ وتی جزم ءِ درشانی کت۔