ایران ءِ بالی گراب نور خان ءِ بالی بنجاہ ءَ ساڑی  بوھگ ءِ بات ءَ  سی بی ایس نیوز ءِ رپوٹ   دروگ اَنت۔ ترجمان درئی کارانی کارگس

اسلام آباد۔12مئی  (اے پی پی): پاکستان ءَ سی بی ایس نیوز ءِ نور خان ءِ بالی پٹ ءَ ایرانی بالی گراب ءِ ھست بوھگ ءِ رپورٹ ءَ را بٹاک  ءُ  دروگ  لیک اِتگ۔ درئی کارانی کارگس ءِ جارکش ءَ سئے شمبے ءِ روچ ءَ جاڑی بوتگیں بیان ءِ تہ ءَ گوشت کہ اے وڑیں قیاس آرائی ءِ بیانیہ آنی مول ءُ مراد دمگی استحکام ءُ امن ءِ واستہ برجاھیں کوشست آناں ھراب کنگ اِنت۔ جارکش ءَ گوشت کہ جنگ بندی ءَ پد ءُ اسلام آباد گپ ءُ تران ءِ بنداتی بھر ءِ وھد ءَ ایران ءُ امریکہ ءِ بازیں بالی گراب پاکستان ءَ سر بوتگ انت تانکہ گپ ءُ تران ءِ عمل ءَ گوں ھمگرنچیں سفارتی کارندہ، سیکورٹی ٹیم ءُ انتظامی کارندہ آنی روگ ءُ آیگ ءَ را آسراتی دیگ بہ بیت۔ آئی ءَ گوشت کہ انگیجمنٹ ءَ پد تر ءُ تاب ءِ گمان ءَ پاکستان ءَ لھتیں بالی گراب ءُ کمکی کارندہ آناں موقتی رنگ ءَ بند کنگ بوتگ۔ بیان ءِ رد ءَ اگاں چہ انگت ءَ باقاعدہ گپ ءُ تران بندات نہ بوتگ بلے مزن تک ءِ سفارتی تبادلہ برجاہ اِنت۔ ترجمان ءَ وتی بیان ءَ گیش گوشت کہ اے درگت ءَ ایران ءِ دری کارانی وزیر ءِ اسلام آباد ءِ تر ءُ تاب ءَ را استیں رسد ءُ انتظامی بندوبست آنی وسیلگ ءَ آسراتی دیگ بوتگ۔ ایرانی بالی گراب کہ انوگ ءَ پاکستان ءَ جاہ منند انت جنگ بندی ءِ وھد ءَ سر بوتگ انت ءُ ایشی ءَ گوں ھچ وڑیں فوجی ایمرجنسی ءُ سیکورٹی بندوبستاں ھچ وڑیں سیادی نیست۔ آئی ءَ گوشت کہ بُرز ءِ دعویٰ قیاس آرائی، گمراہ کنوکیں ءُ حقیقت ءَ گوں سرجم ءَ در انت۔ آئی ءَ گوشت کہ پاکستان ءَ گپ ءُ تران ءِ کمک ءُ ڈی اسکالیشن ءِ کمک ءَ یک غیر جانبدار، تعمیری ءُ ذمہ واریں آسراتی ءِ رنگ ءَ مدام کار کتگ، اے کرد ءِ رد ءَ پاکستان ءَ سرجمیں سیادی داروکیں فریق آنی گوما سرجمیں شفافیت ءُ باقاعدہ رابطہ برجم داشتگ ءُ لوٹ ءِ وھد ءَ روٹین رسد ءُ انتظامی کمک داتگ۔ ترجمان ءَ گوشت کہ پاکستان گپ ءُ تران ءِ دیمروئی، کش ءُ چیل آنی تہ ءَ کمی ءُ دمگی ءُ جھان ءِ امن، مھکم ءُ ایمنی ءِ دیمروئی ءِ واستہ ھمک مخلصیں کوشست آناں کمک کنگ ءِ واستہ جزم اِنت۔\932