آئی ٹی نا بشخ انا مون آ دننگ و آئی ٹی برآمد آتیٹی ودکی حکومت نا اولیت آتیٹی اوار ءِ، وزیراعظم شہباز شریف

اسلام آباد۔ 11 مئی (اے پی پی ) وزیراعظم محمد شہباز شریف پارینے کہ آئی ٹی نا بشخ انا مون آ دننگ و آئی ٹی برآمد آتیٹی ودکی حکومت نا اولیت آتیٹی اوار ءِ، ورناتیٹی آئی ٹی نا بابت بے پناہ کچ ساڑی ءِ ہراڑآن بایدے پبی فائدہ ہرفنگے، گلگت بلتستان و آزاد جموںو کشمیر اٹی آسان خذمت ہند آتا جوڑ کننگ کن کاریم ءِ ترند کننگے۔ دوشنبے نادے آ وزیراعظم آفس نامیڈیا ونگ آن جاری بیان نا رداٹ وزیراعظم محمد شہباز شریف نا کماشی ٹی وزارت انفارمیشن ٹیکنالوجی و ٹیلی کام نا امور نا بابت جاچ دیوان اس مس۔ دیوان اٹی بنجائی وزیر ڈٹ بندی احسن اقبال، بنجائی وزیر کانود و انصاف اعظم نذیر تارڑ، بنجائی وزیر اقتصادی امور احدخان چیمہ، بنجائی وزیر انفارمیشن ٹیکنالوجی و ٹیلی کام شزافاطمہ، وزیر مملکت خزانہ وریلوائی بلال اظہر کیانی و تعلقدار بڑزکو سرکاری آفیسر آک بشخ ہلکر۔ دیوان اٹی وزیراعظم پارے کہ ملک اٹی آئی ٹی نا بشخ انا مون آدننگ و آئی ٹی نا بابت برآمد آتیٹی ودکی حکومت نا اولیت آتیٹی اوار ءِ۔ پاکستان نا ورناتیٹی آئی ٹی نا بابت بے پناہ کچ ساڑی ءِ ہراڑآن بایدے پبی فائدہ ہرفنگے۔ وزیراعظم پارت کرے کہ گلگت بلتستان و آزاد کشمیر اٹی آسان خذمت ہند آتا جوڑ کننگ نا بابت کاریم ءِ ترند کننگے۔ آسان خذمت نا آسراتی تے صوبہ غاتیٹی ہم بناکننگ نا بابت صوبائی حکومت آتون اواری اٹ کاریم کننگے۔ آئی ٹی نا بشخ اٹی شاری و خلقی علاقہ غاتا نیام اٹ پرخ ءِ کم کننگ کن صوبائی، ڈسٹرکٹ نا کہول آ حکومت آتا کمکاری دوئی کننگے۔ دیوان ءِ ملک اٹی آئی ٹی نا مون آ دننگ نا بابت گام گیج آتیا حوال تننگا۔ دیوان ءِ پاننگاکہ مچ آملک اٹی اُرائی انٹرنیٹ کنکشن تا کچ 2024اٹی 1.9 ملین آن ودسا 2026اٹی 5.10 ملین مسنے، برجامالی سال پاکستان آن 4.5 آن 4.6 بلین امریکی ڈالر آتا آئی ٹی برآمدات گمانی ءِ، زوت آتے اٹ پاکستان اٹی 5جی سروس کن نیلامی کننگا ہراکہ دا بابت 2016 آن داتم اسکان مروک آ دنیا نا غٹ آن بھلا نیلامی ئس۔ دا آکشن آن پاکستان ءِ 509 ملین ڈالر ریونیو دوئی مس۔ مصنوعی ذہانت نا مون آ دننگ نا بابت فروری 2026اٹی انڈس اے آئی ویک نا بست وبند کننگا۔ 30 شار تیٹی دود مس۔ انڈس اے آئی ویک اٹی 100 آن زیات جہانی مندوبین بشخ ہلکر، 88 پولینز جوڑ کننگا۔ اسلام آباد نا سرکاری اسکول و ہیلتھ یونٹ آتے فائبر کنیکٹیویٹی فراوان کننگانے۔ اسلام آباد ءِ فری انٹرنیٹ ہاٹ اسپاٹس نا فراوانی نا کاریم آخیریکو ریسہ غاتیٹی ءِ۔ سید پور ماڈل ویلج و فاطمہ جناح پارک اٹی ای۔ لرننگ پاڈز خلنگ انگ ءِ۔