معرکہ  حق ءِ کوریج ءَ پاکستانی رسانکدر ءِ جھان ءِ ساکھ گیش بوتگ، وفاقی سیکرٹری انفارمیشن اینڈ براڈکاسٹنگ اشفاق احمد خلیل

اسلام آباد۔10مئی  (اے پی پی): وفاقی سیکرٹری انفارمیشن اینڈ براڈکاسٹنگ اشفاق احمد خلیل ءَ گوشت کہ معرکہ  حق آیوکیں نسل آنی واستہ دائمی رژنائی ءِ پھجارینگ ءَ انت، سوبمندی ھمیشی ءَ جزم ءِ وسیلگ ءَ چہ رس ایت۔ آئی ءَ معرکہ  حق ءِ سوبمندی ءِ سر ءَ راج ءَ را مبارکی دات ءَ پاکستانی میڈیا ءِ متوازن کوریج ءَ را ھم ساڑات۔ یک شمبے ءِ روچ ءَ معرکہ  حق ءِ اولی سالروچ ءِ موہ ءَ ریڈیو پاکستان ءِ سر ءَ ھاسیں پوڈ کاسٹ ءِ ساھت ءَ وفاقی سیکرٹری انفارمیشن ءَ سلاہ بندیں اُرد ءَ راجی سروکی ءِ توسیپ کت ءَ اے راجدپتری مراگش ءِ ساھت ءَ پاکستان ءِ مھکمیں میڈیا ءِ ساکھ ءَ بیانیہ ءِ لچک ءَ را پدر کت۔ آئی ءَ سروکی ءَ سلاہ بندیں اُرد ءَ را فیصلہ کنوکیں کرد ءَ بے مٹیں عزم ءِ سر ءَ شگر ءَ منت گپت۔ سیکرٹری انفارمیشن ءَ پاکستانی مین اسٹریم میڈیا ءِ توسیپ کت کہ آ زانتکاری ءِ راست، حقیقت پسند ءَ ذمہ واریں رنگ ءَ شنگ ءَ تالان کنگ ءِ وسیلگ ءَ مھکمیں جھان ءِ ساکھ جوڑ کنگ ءَ انت۔ آئی ءَ گوشت کہ راجی رسانکدر ءَ تصدیق بوتگیں، شواہد ءِ سر ءَ بنیات ءِ رپورٹنگ ءِ گوما پسو دیگ ءَ دژمنیں بیانیہ ءِ جوانیں رنگ ءَ دیم پہ دیم کتگ۔ آئی ءَ گوشت کہ بھارتی میڈیا ءِ نیمگ ءَ چہ شنگ بوتگیں مزنیں کساس ءَ ردیں ھال آناں پاکستان ءِ معتبریں صحافتی پسو ءِ وسیلگ ءَ منظم رنگ ءَ بے درور ءَ بے اثر کنگ بوتگ، ایشی ءَ چہ میاں اوستمانی تک ءَ راستی آنی ھاسیں رنگ ءَ پدر کنگ بوتگ۔ انفارمیشن سیکرٹری ءَ آئی ایس پی آر ءَ وزارت ءِ انفارمیشن ءِ نیام ءَ نزیکیں رابطہ ءِ سر ءَ ھم زور پر دات ءَ گوشت کہ یک سختیں تصدیق ءِ عمل ءِ رد ءَ عمل کنگ بوتگ، درستی ءَ بھروسہ ءِ برجائی ءِ واستہ سرجمیں تصدیق ءِ رد ءَ ھچ وڑیں ھال شنگ نہ بوتگ۔ اشفاق احمد خلیل ءَ ھشدار داتگ کہ ڈیجیٹل دور ءَ جعلی ھال یک مزنیں چیلنج ءِ انت۔ آئی ءَ سوشل میڈیا ءِ درستیں کارمرز کنوکاں چہ لوٹ کتگ کہ آ ھاسیں رنگ ءَ حساس ءَ جنجالی جیڈھ آنی تہ ءَ ذمہ واری ءَ تحمل ءِ گوما کار بہ کن اَنت۔ آئی ءَ گوں فخر ءَ گوشت کہ راجی میڈیا چینل آنی نیمگ ءَ راجی بیانیہ ءَ را مدام وتی ملک ءِ توار ءِ رنگ ءَ جھان ءِ تک ءَ ذمہ واری ءِ رنگ ءَ پیش کتگ۔