وفاقی وزیر داخلہ ءُ منشیات ءِ کنٹرول محسن نقوی ءَ بنگلہ دیش ءِ وزیر داخلہ صلاح الدین احمد ءَ گوں گند ءُ نند

ڈھاکہ۔9مئی  (اے پی پی): وفاقی تہی کار ءُ منشیات ءِ کنٹرول ءِ وزیر محسن نقوی ءَ بنگلہ دیش ءِ تہی کارانی وزیر صلاح الدین احمد ءَ گوں گند ءُ نند کتگ۔ وزیر داخلہ آں دوئیں ملک آنی وزارت داخلہ آنی نیام ءَ سیکرٹری ءِ تک ءَ یکجائی کارگس ءِ جوڑ کنگ ءِ سر ءَ تپاک کتگ۔ اے موہ ءِ سر ءَ پاکستان ءُ بنگلہ دیش ءِ نیام ءَ منشیات ءِ بہا کنگ ءُ کارمرد کنگ ءُ منشیات ءِ گر ءُ دار ءِ واستہ کمک ءِ واستہ یک راجدپتری معاہدے ءِ سر ءَ ھم دستخط کنگ بوت۔ پاکستانی حکومت ءِ نیمگ ءَ وفاقی تہی کارانی وزیر محسن نقوی ءَ اے معاہدہ ءِ سرا دستخط کتگ ءُ بنگلہ دیش ءِ حکومت ءِ نیمگ ءَ وزیر داخلہ صلاح الدین احمد ءَ دستخط کتگ۔ مفاہمت نامہ ءِ رد ءَ دوئیں ملک منشیات ءِ ناجائزیں ٹرانسپورٹ ءُ قاچاق ءِ گر ءُ دار ءِ واستہ یک دومی ءَ گوں سرجمی ءَ کمک کن اَنت، چاگرد ءَ منشیات ءِ گیش بوھوکیں رجحان ءُ ایشی ءِ منفی اثر آناں ھلاسی ءِ واستہ یکجائی کوشست کنگ بنت، منشیات ءِ ناجائزیں لائن ءِ ٹوٹگ ءِ واستہ یکجائی گامگیججوڑ کنگ بیت، منشیات ءِ قاچاقبر ءُ نیٹ ورک ءِ بابت ءَ بروقت زانتکاری ءِ ھاتر ءَ ۔ ایشی ءَ ابید کارندہ آنی ھیل کاری، نوکیں ٹیکنالوجی ءِ کارمردی ءُ منشیات ءِ گر ءُ دار ءِ واستہ جوانیں رھبند آنی بابت ءَ یکے دومی ءَ گوں بھر ءُ بانگ کنگ بیت۔ گند ءُ نند ءِ ساھت ءَ وفاقی تہی کارانی وزیر محسن نقوی ءَ وتی بنگلہ دیشی ھمکار ءَ را سیف سٹی منصوبگ ءِ تہ ءَ سرجمیں کمک ءِ پیشکش کتگ ءُ گوشت کہ سیف سٹی منصوبگ ءِ تہ ءَ بنگلہ دیشی حکومت ءِ ھمک رنگ ءَ کمک کنت۔ پاک بنگلہ دیش ءِ دو نیمگی سیادی ءِ سرا زور دیگ بوتگ۔ اندری ایمنی ءِ شوبگ ءَ کمک ءِ تہ ءَ گیشی ءِ سر ءَ ھم تپاک کنگ بوتگ ءُ سول سلاہ بندیں اُرد آنی ھیل کاری ءِ سر ءَ ھم تپاک کنگ بوتگ۔ وزیرانی تہ ءَ ناشرکاری ءِ ھلاپ ءَ جنگ ءُ انسانی دزگیری ءِ گر ءُ دار ءِ واستہ کمک ءُ یکجائی گامگیج آنی سر ءَ ھم ھیال ریچی کنگ بوت۔ سائبر کرائم، منظم جرم ءُ مالی فراڈ ءِ تہ ءَ وت مہ وتی کمک ءَ را گیش کنگ ءِ سر ءَ ھم گپ ءُ تران کنگ بوت، ایشی ءِ تہ ءَ پولیس اکیڈمی آنی تہ ءَ افسر آنی واستہ ھیل کاری ءِ پروگرام آنی تہ ءَ کمک ھوار اِنت۔ وفاقی تہی کارانی وزیر محسن نقوی ءَ وتی بنگلہ دیشی ہمکار ءَ را پاکستان ءِ تر ءُ تاب ءِ دعوت داتگ۔ بنگلہ دیش ءِ تہی کارانی وزیر ءَ سیف سٹی پروجیکٹ ءِ واستہ کمک ءِ پیشکش ءِ سر ءَ تہی کارانی وزیر محسن نقوی ءِ منت گپت۔ اے موہ ءِ سر ءَ دری کارانی سیکرٹری اسد عالم سائیم، کابینہ ءِ سیکرٹری نسیم الغنی، تہی کارانی سیکرٹری منظور چوہدری ءُ بنگلہ دیش ءِ واستہ پاکستان ءِ ہائی کمشنر عمران حیدر ھم ساڑی ات۔