”معرکہ ءِ حق“ ءِ تہا پاکستان ءِ راجدپتری سوبمندی راجی یکوئی، فوجی مہارت ءُ موثر سفارتکاری ءِ آسر انت، ڈاکٹر طارق فضل چوہدری

اسلام آباد۔9مئی  (اے پی پی):  پارلیمانی کارانی وفاقی وزیر ڈاکٹر طارق فضل چوہدری ءَ گوشت کہ ’’معرکہ ءِ حق‘‘ ءِ تہ ءَ پاکستان ءِ راجدپتری سوبمندی راجی یکوئی، فوجی مہارت ءُ موثر سفارتکاری ءِ آسر اِنت۔ سرجمیں راج پاکستانی سلاہ بندیں اُرد ءِ نیمگ ءَ اوشتاتگ وھدے کہ مرچی دگنیا پاکستان ءِ دیمپانی توانائی ءُ پیشہ وارانہ مہارت ءَ را من ایت۔ شمبے ءِ روچ ءَ ’’معرکہ ءِ حق‘‘ ءِ ھوالگ ءَ برجم داشتگیں مراگش ءَ گوں گشتانک دیان ءَ آئی ءَ گوشت کہ پاک اُرد ءُ پاک فضائیہ ءَ بہادری، دلیری ءُ ٹیکنیکل مہارت ءِ نوکیں راجدپتر جوڑ کتگ۔ آئی ءَ گوشت کہ پاک فضائیہ ءَ دژمن ءِ بازیں بالی گراب آناں تیرگواری کتگ ءُ دژمن ءِ سائبر سسٹم آناں جوانیں رنگ ءَ ناتوان کتگ، ایشی ءَ چہ دگنیا حیران بوتگ۔ آئی ءَ گوشت کہ پاکستان یک زمہ وار ایٹمی ریاست انت ایشی ءِ دیمپانی توان ایوک ءَ راجی دیمپان ءُ پڑ ءَ امن ءِ برجائی ءِ واستہ انت۔ آئی ءَ گوشت کہ سرجمیں دگنیا ءَ ’’معرکہ ءِ حق‘‘ ءُ ’’بنیان المرسوس‘‘ ءِ تہ ءَ سیاسی ءُ فوجی سروکی ءِ نیام ءَ مثالی یکوئی ءِ گواہ بوتگ وھدیکہ مزن وزیر محمد شہباز شریف ءُ فیلڈ مارشل عاصم سید ءِ سروکی ءَ یک ھمگرنچیں گامگیجءِ وسیلگ ءَ راجدپتری سوبمندی رستگ۔ وفاقی وزیر ءَ گوشت کہ ’’بنیان المرسوس‘‘ قرآن پاک ءِ یک آیت ءِ چہ زورگ بوتگیں نام اِنت کہ ایشی ءِ بزانت ’’سیسہ ءِ دیوال‘‘ اِنت ءُ پاکستانی راج ءَ دژمن ءِ زوراکی ءِ دیم ءَ اے یکوئی ءُ مھکم بوھگ ءِ درشان کتگ۔ آئی ءَ گوشت کہ راج ھمک رنگ ءِ اختلاف شموشتگ انت ءُ پاکستانی سلاھبند آنی گوما یکوئی ءِ عملی ثبوت داتگ انت۔ ڈاکٹر طارق فضل چوہدری ءَ گوشت کہ جھان ءِ تک ءَ پاکستان ءِ فوجی ءُ سفارتی سوبمندی آناں ساڑاھگ بوھگ ءَ انت۔ آئی ءَ گوشت کہ امریکی سروکی ءَ ھم بازیں رند ءَ پڑ ءَ کش ءُ چیل ءِ کم کنگ ءَ پاکستان ءِ کرد ءَ را من اِتگ۔ وفاقی وزیر ءَ گوشت کہ پاکستان ایران ءُ امریکا ءِ نیام ءَ کش ءُ چیل ءَ را کم کنگ ءُ گپ ءُ تران ءِ عمل ءَ را دیم ءَ برگ ءِ واستہ مدام سفارتی رابطہ برجم دارگ ءَ انت۔ آئی ءَ گوشت کہ سرجمیں دگنیا ءِ رسانکدر مرچی پاکستان ءِ کوشست، سفارتکاری ءُ جنگی مہارت آنی نام ءَ گرگ ءَ انت ءُ پاکستان ءَ را یک زمہ وار ءُ امن دوستیں ریاست ءِ رنگ ءَ چارگ بوھگ ءَ انت۔ وفاقی وزیر ءَ گوشت کہ درائیں سوبمندی آنی گوما اندری تہی برجائی، اقتصادی گہتری، سیاسی یکوئی ءُ راجی یکوئی ھم وھد ءِ ھاسیں لوٹ اَنت۔ آئی ءَ گوشت کہ حکومت ءُ فوجی سروکی ملک ءَ را یک مھکم، مھکم ءُ دیمروئی کتگیں پاکستان جوڑ کنگ ءِ واستہ جزمیگ انت۔ آئی ءَ گوشت کہ پاکستان ءِ ورنا باھند ملک ءِ آیوکیں باندات انت ءُ اے باندات پاکستان ءَ را دیمروئی ءِ نوکیں کونڈ آنی سر ءَ بارت۔ آئی ءَ گوشت کہ پاکستان آیوکیں وھد ءَ پڑ ءَ امن، ایمنی ءُ گپ ءُ تران ءِ دیمروئی ءِ واستہ وتی جوانیں کرد ءَ برجاہ دار ایت۔