معرکہ حق ءَ سوبمند بوھگ ءَ پد پاکستان ءَ را اقتصادی آجوئی ءِ جنگ ءَ سوبمند بوھگی اِنت، احسن اقبال کاسافا سمٹ دیوان ءَ گوں تران

لاہور۔9مئی  (اے پی پی): منصوبگ بندی، دیمروئی ءُ اصلاحات ءِ وفاقی وزیر پروفیسر احسن اقبال ءَ گوشت کہ پاکستان ءَ را معرکہ حق ءَ سوبمند بوھگ ءَ پد نوں اقتصادی آجوئی ءِ جنگ ءَ سوبمند بوھگ ءِ واستہ راجی یکوئی، سیاسی برجائی، پالیشی آنی تسلسل ءُ برآمدات آنی تہ ءَ غیر معمولی گیشی ءِ ضلورت اِنت۔ ملک ءِ اصل طاقت یک مھکمیں معیشت، پیداواری ءُ جھان ءِ مارکیٹ آنی تہ ءَ موثر ھست بوھگ ءِ تہ ءَ اِنت۔ آئی ءَ اے ھیالانی درشانی شمبے ءِ روچ ءَ یک دمگی ھوٹل ءِ تہ ءَ صفا سروک دیوان ءَ گوں تران کنان ءَ کت۔ سروک دیوان ءِ تہ ءَ صدر صفا ہمایوں کبیر، صدر آئی سی ایم اے عظیم حسین صدیقی، آئی سی ایم اے ءِ نائب صدر ءُ آرگنائزنگ کمیٹی ءِ چیئرمین صفا انٹرنیشنل سروک دیوان محمد یاسین ءَ ھوار بنگلہ دیش، سری لنکا ءِ نامداریں مالیاتی ماہرین، پالیسی ساز، ریگولیٹرز ءُ دگہ کارپوریٹ رہشون آنی بھر زوری بوتگ۔ وفاقی وزیر پروفیسر احسن اقبال ءَ گوشت کہ پاکستان وسیلگ ءَ چہ زرباری ملک انت بلے اصل جیڈھ پالیسی آنی تہ ءَ انت۔ تسلسل ءِ کمی بوتگ۔ 2013 ءَ بگر داں 2018 ءَ پاکستان 2025 ءِ وژن ءِ چیر دستی ءَ ملک ءَ را دیمروئی ءِ راہ ءَ ایر کنگ بوتگ، لوڈ شیڈنگ ءَ مزنیں کساسے ءَ کمی بوتگ، ناشرکاری ءَ را کنٹرول کنگ بوتگ ءُ اقتصادی دیمروئی ءِ شرح ءَ را گیشی بوتگ، بلے ایشی ءَ پد ءِ سیاسی جاور ھال ءَ دیمروئی ءِ سفر ءَ را متاثر کتگ۔ آئی ءَ گوشت کہ معیشت اعتماد ءِ سر ءَ چل ایت ءُ وھدے بار بار پالیسی بدل کنگ بنت گڑا ادارگ سیاسی مول ءُ مراد آنی واستہ کارمرد کنگ بنت ءُ افسر ترسگ ءَ انت گڈا سرمایہ کاری بند بیت۔ آئی ءَ گوشت کہ پاکستان ءِ مستریں چیلنج مالیاتی خسارہ ءُ برآمدات ءِ تہ ءَ کمی انت۔ قرضہ ءِ چکر ءَ چہ درآہگ ءِ ھاتر ءَ ملک ءَ پیداواری ءِ تہ ءَ گیشی کنگی اِنت۔ آئی ءَ اے گپ ءِ سر ءَ زور پر دات کہ دگنیا ءِ تہ ءَ ایوک ءَ ھما راج دیمروئی کن اَنت کہ آ برآمدات ءِ تہ ءَ گیشی، درآمد ءِ بدل ءَ صنعت آناں دیمروئی دیگ ءُ درملکی سرمایہ کاری ءِ را وتی نیمگ ءَ رازیگ کنگ ءِ سر ءَ دلگوشی بہ دنت۔ آئی ءَ گوشت کہ پاکستان نوں برآمد کنگ ءِ سر ءَ بنیات ءِ معیشت ءِ نیمگ ءَ رھادگ اِنت ایشی ءِ واستہ ھاسیں سرمایہ کاری آسراتی کونسل جوڑ کنگ بوتگ تانکہ سرمایہ کار آناں یکیں بام ءِ چیر ءَ آسراتی پجاری کنگ بہ بیت ءُ ریڈ ٹیپ ھلاس کنگ بہ بیت۔ آئی ءَ گوشت کہ پاکستان ءَ کشت ءُ کشار، انفارمیشن ٹیکنالوجی، معدنیات، دستکاری، لائیو سٹاک ءُ ویلیو ایڈڈ پروڈکٹس ءِ شوبگ آنی تہ ءَ بے دروریں موہ است انت۔ ہر ضلع ءِ تہا برآمداتی صلاحیت است انت بلے عالمی لوٹ ءُ گزر ءِ رد ءَ پیکیجنگ، برانڈنگ، کوالٹی ءُ مینوفیکچرنگ ءِ سرا دلگوشی دیگ ءِ ضلورت انت۔ معرکہ حق ءِ درگت ءَ آئی ءَ گوشت کہ انچوش کہ سلاہ بندیں اُرد ڈسپلن، قربانی ءُ راجی جزبگ ءِ گوما ملک ءِ رکھینگ ءَ کن اَنت، اقتصادی پڑ ءَ ھم ھمے جزبگ ءَ را وتی کنگ بہ بیت۔ آئی ءَ گوشت کہ پنچ آز فریم ورک ءِ چیر دستی ءَ برآمدات، ڈیجیٹل پاکستان، چاگرد، توان ءُ برابری ءِ سر ءَ دلگوشی دیگ بوھگ ءَ اِنت تانکہ پاکستان ءَ را 2047 ءَ تاں یک وشھال، مھکم ءُ آجوئیں ریاست جوڑ کنگ بہ بیت۔ دیم ءِ دہ ءُ پنچ سال ءَ چہ رند۔ آئی ءَ گوشت کہ حکومت مالیاتی اصلاحات، شفافیت ءُ برجمیں دیمروئی ءِ ایجنڈا ءِ رندگیری ءَ کنگ ءَ انت، ءُ اکاؤنٹنگ ءِ شوبگ اقتصادی برجائی، شفافیں گورننس، الس ءِ بھروسہ ءِ بحالی ءُ برجائی دیمروئی ءِ واستہ کلیدی کرد پیلو کنگ ءَ انت۔ انسٹی ٹیوٹ آف کوسٹ اینڈ مینجمنٹ اکاؤنٹنٹس آف پاکستان ءَ گوستگیں 75سال آنی تہ ءَ پیشہ وارانہ معیار ءِ دیمروئی، ادارگی گنجائش ءِ تہ ءَ گیشی ءُ راجی دیمروئی ءِ تہ ءَ مزنیں کرد پیلو کتگ۔ آئی ءَ گوشت کہ اے وھد ءَ دگنیا ترندیں اقتصادی، ٹیکنالوجی ءُ جغرافیائی بدلی آنی دور ءَ چہ گوزگ ءَ اِنت کہ اودا مصنوعی ذہانت، ڈیجیٹل معیشت، جھان ءِ سیاسی بدلی ءُ بدل بوھوکیں چاگردی اولیت جھان ءِ مالیاتی نظام ءَ را نوکیں رنگے ءَ جوڑ کنگ ءَ اَنت۔ اے وڑیں جاور ھال آنی تہ ءَ اکاؤنٹنگ ءُ فنانس ءِ شوبگ ءِ کرد پیسر ءَ چہ گیش ھاسیں رنگ ءَ بوتگ۔ آئی ءَ گوشت کہ مرچیگیں اکاؤنٹنگ ءِ پیشہ ور مالیاتی ریکارڈ ءِ جوڑ کنگ ءَ گوں بندوک نہ اَنت بلکیں ادارگی سروکی ءِ مشیر، اسٹریٹجک پارٹنر ءُ پیسلہ کنگ، رسک مینجمنٹ، کارکردگی ءِ تجزیہ ءُ دراجیں مدتی منصوبگ بندی ءِ تہ ءَ فعال کرد پیلو کنگ ءَ اَنت۔ آئی ءَ گوشت کہ شفافیت ءُ احتساب ءِ اے دور ءَ اکاؤنٹنگ ءِ شوبگ اقتصادی برجائی ءِ بُن ھشت اِنت چیاکہ سرمایہ کار، حکومت، ریگولیٹری ادارگ ءُ الس ءِ مالیاتی زانتکاری ءِ سر ءَ راست ءُ معتبریں ھال آنی سر ءَ انحصار کنگ بیت۔ پمیشکا اکاؤنٹنگ ءِ پیشہ ور بلے اے المی انت کہ آ ایمانداری، پیشہ وارانہ اخلاقیات ءُ شفافیت ءِ مستریں معیاراں برجاہ بہ دار انت۔ آئی ءَ گوشت کہ مصنوعی ذہانت، بلاکچین، کلاؤڈ کمپیوٹنگ ءُ ڈیٹا اینالیٹکس سسٹم مالیاتی زانتکاری ءِ تیاری، تجزیہ ءُ نگرانی ءِ رنگ ءَ انقلابی بدلی آرگ ءَ انت، پمیشکا اکاؤنٹنٹ آناں وتی پیشہ وارانہ مہارت آناں مدام گیش کنگ ءُ نوکیں لیکہ آنی سر ءَ ادارگی سسٹم آناں دیمروئی دیگی انت تانکہ آ آیوکیں چیلنج آناں جوانیں رنگ ءَ دیم پہ دیم بوت کن انت۔ آئی ءَ آئی سی ایم اے پاکستان ءَ را 75سال ءِ سرجمی ءِ سر ءَ مبارک بات دات ءُ امیت سہرا کت کہ سروک دیوان ءِ تہ ءَ بوتگیں گپ ءُ تران ءُ سفارش سرجمیں خطہ ءَ اکاؤنٹنگ ءُ مالیاتی شوبگ ءِ دیمروئی ءِ تہ کمکی بنت۔ سروک دیوان ءَ گوں تران کنان ءَ دگہ گشتانک دیوکاں اے گپ ءِ سر ءَ زور پر دات کہ دگنیا ترندی ءَ گوں مصنوعی ذہانت، ڈیجیٹل ٹیکنالوجی ءُ آٹومیٹک مالیاتی نظام ءِ نیمگ ءَ روگ ءَ اِنت، پمیشکا اکاؤنٹنگ ءِ شوبگ ءَ را نوکیں لوٹ آنی گوما یکجا کنگ ءِ وھد ءِ ضلورت اِنت۔ آئی ءَ گوشت کہ آیوکیں معیشت ءِ تہ ءَ ڈیجیٹل ٹرانسفارمیشن، ڈیٹا اینالیٹکس سسٹم، پائیدار کاروباری ماڈل، ماحول دوستیں اقتصادی پالیشی ءُ یک شفافیں مالیاتی نظام ءِ ارزشت ءَ را گیش گیشی بیت۔ سروک دیوان ءِ تہ ءَ دمگی اقتصادی یکجاھی، سرکاری پڑ ءِ گورننس، ٹیکنالوجی ءِ سر ءَ بنیات ءِ سر ءَ مالیاتی رھبند، چاگردی ءُ کلیدی سیشن ءُ پینل ءِ تران ھم جتا جتائیں سرھالانی سر ءَ برجم دارگ بوتگ، ایشی ءِ تہ ءَ چاگردی ذمہ واری، پائیدار اقتصادی ماڈل، ءُ بدل بوھوکیں دگنیا ءِ تہ ءَ بھروسہ ءِ بحالی ھوار اَنت۔