بلوچستان ءِ پائیدار دیمروئی ءِ واستہ دہ سالی کلیں دیمروئی منصوبہ جوڑ کنگ بوتگ، بلوچستان ءِ سر وزیر ایشیائی دیمروئی بینک ءِ ڈل ءَ گوں گپ ءُ تران

کوئٹہ۔ 08 مئی (اے پی پی): ایشیائی دیمروئی بینک ءِ ڈل ءَ پاکستان ءَ آئی ءِ ملکی ڈائریکٹر ژیاؤچن ایما فین  ءِ سروکی ءَ جمعہ ءِ روچ ءَ بلوچستان ءِ سر وزیر میر سرفراز بگٹی ءَ گوں گند ءُ نند کت، ایشی ءِ تہ ءَ بلوچستان ءَ دیمروئی منصوبگ، سرمایہ کاری ءِ موہ ءُ 2019 ءِ دیمروئی ءِ موہ آنی سر ءَ گپ ءُ تران کت۔ گند ءُ نند ءَ آپی وسیلگ، کشت ءُ کشاری، معدن ءُ کان، وانگ ءُ زانگ، جان سلامتی، انفارمیشن ٹیکنالوجی، ہنر ءِ دیمروئی ءُ روزگار ءِ پیداک کنگ ءِ جیڈھ آنی سر ءَ گپ ءُ تران کنگ بوت۔ بلوچستان ءِ سر وزیر ءِ جارکش ءِ بیان ءِ رد ءَ گند ءُ نند ءِ ساھت ءَ ایشیائی دیمروئی بینک ءَ بلوچستان ءِ آپ ءُ کشت ءُ کشاری دیمروئی منصوبگ آنی تہ ءَ دراجیں مدتی سرمایہ کاری ءُ مالی کمک ءِ تہ ءَ مزنیں دلچسپی ءِ درشانی کتگ ایشی ءِ تہ ءَ کچچی کینال ھم ھوار اِنت۔ دوئیں نیمگ ءَ ورنا آناں وانگ ءُ زانگ، جان سلامتی، انفارمیشن ٹیکنالوجی، تکنیکی تربیت ءُ روزگار ءِ پھجارینگ ءِ واستہ زندگ داروکیں منصوبگ آنی سر ءَ یکجائی حکمت عملی ءِ زورگ ءِ سر ءَ تپاک کنگ بوتگ۔ اے موہ ءِ سر ءَ بلوچستان ءِ سر وزیر میر سرفراز بگٹی ءَ گوشت کہ بلوچستان حکومت دیمروئی ءِ عمل ءِ تہ ءَ گلوبل ءُ راجی دیمروئی شریک آناں وش آتک کنت ءُ ایشیائی دیمروئی بینک ءِ کمک ءَ صوبگ ءِ تہ ءَ زندگ ءُ منافع بخش شوبگ آنی تہ ءَ سرمایہ کاری ءُ دیمروئی ءِ کار آناں دیم ءَ برگ ءِ واستہ جزم انت۔ آئی ءَ گوشت کہ کمیں دیمروئی وسیلگ آنی تہ ءَ السی لوٹ آنی رد ءَ موثر دیمروئی ءِ حکمت عملی ءِ سر ءَ عمل کنگ ءُ صوبگ ءِ پدمنتگی ءِ ھلاسی یک مزنیں چیلنج اِنت، البت حکومت اولویت آناں راستیں رنگ ءَ ٹھینگ ءَ چہ دراجیں مدتی ءُ الس دوستیں منصوبگ آنی سر ءَ پیشرفت کنگ ءَ اِنت۔ بنجاھی وزیر ءَ گوشت کہ بلوچستان ءِ پائیدار دیمروئی ءِ واستہ دہ سالی سرجمیں دیمروئی منصوبگ جوڑ کنگ بوتگ ایشی ءِ چیر دستی ءَ جتاجتائیں شوبگ آنی تہ ءَ مرحلہ وار اصلاحات ءُ دیمروئی ءِ گامگیج دل یکیمی کنگ بنت۔ آئی ءَ گوشت کہ بلوچستان ءَ را سرمایہ کاری ءِ واستہ ایمن، امن ءُ دلکشیں دمگ جوڑ کنگ بوھگ ءَ انت ءُ حکومت سرمایہ کار آناں ھمک رنگ ءِ آسراتی ءُ موثر سیکورٹی پجاری کنت۔ میر سرفراز بگٹی ءَ گوشت کہ صوبائی حکومت میگا منصوبگ آناں رکھینگ، سرجم کنگ ءُ جوانیں رنگ ءَ سرجم کنگ ءِ واستہ سرجمیں گنجائش ءُ توانائی ءِ واھند اِنت، وھدیکہ دیمروئی منصوبگ ءُ نوکیں اقتصادی موہ آنی سر ءَ عمل کنگ ءِ واستہ درستیں دستیابیں وسیلگ آناں کارمرد کنگ بوھگ ءَ اِنت۔ بنجاھی وزیر بلوچستان ءَ وانگ ءُ زانگ ءِ شوبگ ءَ اصلاحات آنی بابت ءَ گپ جنان ءَ گوشت کہ صوبگ ءِ تہ ءَ 3200 بندیں وانگجاہ دوبر فعال کنگ بوتگ اَنت، وھدیکہ 2100نوک کمیونٹی بیسڈ اسکول ھم جوڑ کنگ بوتگ اَنت۔ آئی ءَ گوشت کہ نوں حکومت ءِ دلگوشی معیاری وانگ ءُ زانگ، نوکیں وانگ ءُ زانگ ءِ آسراتی ءُ انسانی وسائل ءِ دیمروئی ءِ سر ءَ انت تانکہ ورنا استیں دور ءِ لوٹ آنی گوما ھمگرنچ بہ بنت۔ آئی ءَ گوشت کہ صوبگ ءَ جوانیں حکومت داری، شفافیت ءُ میرٹ ءِ دیمروئی ءِ واستہ اصلاحی گامگیج مُدام جاری بوھگ ءَ انت ءُ بلوچستان حکومت موثر پالیسی سازی ءِ وسیلگ ءَ الس ءِ گہبود ءِ مول ءُ مراد آنی سر ءَ سر بوھگ ءِ واستہ سنجیدگی ءَ گوں کار کنگ ءَ انت۔ گند ءُ نند ءَ صوبائی وزیر ترقیات و منصوبہ بندی میر ظہور احمد بلیدی، چیف سیکرٹری بلوچستان شکیل قادر خان،  ایڈیشنل چیف سیکرٹری ترقیات زاہد سلیم،  ایڈیشنل سیکرٹری چیف منسٹر سیکرٹریٹ محمد فریدون  ہم ساڑی اتنت۔