چیف انفارمیشن کمشنر شعیب احمد صدیقی ءَ سینیٹ ءِ چیئرمین سید یوسف رضا گیلانی ءَ گوں گند ءُ نند

اسلام آباد۔6مئی  (اے پی پی): چیف انفارمیشن کمشنر شعیب احمد صدیقی ءَ انفارمیشن کمیشن ءِ باسک آنی گوما چار شمبے ءِ روچ ءَ پارلیمنٹ گس ءَ چیئرمین سینیٹ سید یوسف رضا گیلانی ءَ گوں گند ءُ نند کت۔ چیئرمین سینیٹ ءَ ڈل ءَ را وش اتک کنان ءَ دیوان ءَ را ادارگی یکوئی ءِ دیمروئی ءِ واستہ المی لیک اتگ۔ گند ءُ نند ءِ ساھت ءَ چیئرمین سینیٹ ءَ گوشت کہ پاکستان انفارمیشن کمیشن ءِ جوڑیشت ءِ سئے سال سرجم کنگ یک ھاسیں سنگ ءِ انت ایشی ءِ تہ ءَ کمیشن ءِ گیش بوھوکیں ادارگی گنجائش، گہتریں سروس ڈیلیوری ءُ ھال ءُ اھوال ءِ رسگ ءِ ھک ءِ بابت ءَ الس ءَ را سرپدی ءِ تہ ءَ گیشی ءِ درشان انت۔ آئی ءَ اے گپ ءِ سر ءَ زور پر دات کہ شفافیت حکومت داری ءِ یک بنیاتی رھبندے کہ ایشی ءَ چہ الس ءِ بھروسہ ءَ را گیش کنگ بیت، ادارگ آناں مھکم کنگ بیت ءُ جوانیں پیسلہ کنگ ءَ کمک رسیت۔ کمیشن ءِ کرد ءَ را ساڑہ کنان ءَ آئی ءَ گوشت کہ اے ادارگ رسائی ءِ ایکٹ ءِ سر ءَ عمل کنگ ءَ را دل یکیمی کنگ، السی شکایت آنی گیواری ءُ سرکاری ادارگ آنی تہ ءَ پیشگی اھوالکاری ءِ پھجاری ءِ دیمروئی ءَ را گیش کنگ ءَ ھاسیں کرد پیلو کنگ ءَ اِنت۔ چیئرمین سینیٹ ءَ گیش گوشت کہ شفافیت ءِ مول ءُ مراد آنی سر ءَ سر بوھگ ءِ گوما ادارگی توازن ءُ آئینی ءُ کانودی لوٹ آنی سر ءَ عمل کنگ ھم سک باز المی اِنت۔ آئی ءَ اے گپ ءِ سر ءَ دل یکیمی کت کہ شفافیت ءِ نظام ءَ را جوانیں ھمگرنچی، ھاسیں کارروائی ءُ جوانیں رنگ ءَ عمل درآمد ءِ نظام ءِ وسیلگ ءَ گیش مھکم کنگ بوت کنت، ایشی ءَ چہ گورننس ءِ سرجمیں کوالٹی ءَ گہتری ءِ سبب جوڑ بیت۔ دیوان ءِ گڈسرا چیف انفارمیشن کمشنر شعیب احمد صدیقی ءَ کمیشن ءِ نیم سالی رپوٹ چیئرمین سینیٹ ءَ پیش کت ءُ وتی نیکیں واھگ آنی درشان کت۔