پاکستان دمگ ءُ ایشی ءَ چہ دریں دمگاں کش ءُ چیل ءِ کم کنگ ءُ بامردیں گپ ءُ تران ءِ دیمروئی ءِ ھاترا مدام سفارتی کوشست کنگ ءَ انت، نائب مزن وزیر سینیٹر محمد اسحاق ڈار اسلام ءِ میاں اوستمانی پیغام کانفرنس ءَ گوں تران

اسلام آباد۔6مئی  (اے پی پی): نائب مزن وزیر ءُ دری کارانی وزیر سینیٹر محمد اسحاق ڈار ءَ دمگ ءَ امن ءُ ایمنی ءِ واستہ پاکستان ءِ بے مٹیں عزم ءِ پدر کنگ ءَ اے گپ ءِ سر ءَ زور پر دات کہ پاکستان دمگ ءُ ایشی ءَ چہ دریں دمگاں کش ءُ چیل آنی تہ ءَ کمی ءُ بامردیں گپ ءُ تران ءِ دیمروئی ءِ واستہ مدام سفارتی کوشست کنگ ءَ اِنت۔ اے ھیالانی درشانی نائب مزن وزیر سینیٹر محمد اسحاق ڈار ءَ چار شمبے ءِ روچ ءَ پاکستان علماء کونسل ءِ نیمگ ءَ برجم داشتگیں ششمی میاں اوستمانی اسلام ءِ پیغام کانفرنس ءَ گوں گشتانک دیان ءَ کت۔ آئی ءَ کانفرنس ءِ تہ نامداریں میاں اوستمانی ءُ راجی زانتکار آنی بھر زوری ءَ را وش اتک کت ءُ گوشت کہ کانفرنس ءِ برجم دارگ وھد ءُ پاس ءِ گامگیج اِنت ایشی ءِ ستا کنگ بہ بیت۔ نائب مزن وزیر ءُ دری کارانی وزیر ءَ جموں کشمیر ءُ فلسطین ءِ ھوالگ ءَ پاکستان ءِ اصولی موقف ءِ سر ءَ زور پر دات ءُ مسلمان یکوئی ءِ ارزشت ، اسلامی کمک ءِ گل ءِ مرکزی کرد ءُ مسلمان امت ءِ وشھالی ءِ واستہ یکجائی گامگیج ءِ سر ءَ زور پر دات۔ نائب مزن وزیر ءَ جہانی تک ءَ اسلاموفوبیا ءِ ھلاپ ءَ جنگ ءِ تہ ءَ پاکستان ءِ کرد ءُ بین المذاہب یکوئی ءِ دیمروئی ءِ واستہ کوشست آنی ھم ذکر کت۔ سینیٹر محمد اسحاق ڈار ءَ پاکستان ءِ استحکام ءُ راجی جزم ءِ سرا شگر ءُ منت گپت ءُ ’’حقیقت ءِ جنگ‘‘ ءِ سالروچ ءِ بابت ءَ ہم گپ جت۔ آئی ءَ گوشت کہ مزن وزیر محمد شہباز شریف ءِ سروکی ءَ پاکستان ءِ راجی ویژن ءِ بنجاہی ستون امن، دیمروئی ءُ وشھالی انت۔