میاں اوستمانی جیڈھ ءِ زوتیں گیواری دگنیا ءِ مفاد ءِ تہ ءَ اِنت، معیشت ءَ را دیم ءَ برگ ءِ واستہ نجی شعبہ ءَ را سروکیں کرد پیلو کنگی اِنت، سینیٹر محمد اورنگزیب

اسلام آباد۔6مئی  (اے پی پی): وفاقی وزیر ھزانگ ءُ آمدنی سینیٹر محمد اورنگزیب ءَ گوشت کہ میاں اوستمانی جیڈھ ءِ زوت گیواری پاکستان، دمگ ءُ دگنیا ءِ نپ ءِ تہ ءَ انت۔ بحران ءِ اولی بھر ءِ آسراں گوں گر ءُ چیل بوھگ ءِ ھاترا پاکستان ءَ معیشت ءِ ھوالگ ءَ جوانیں حکمت عملی جوڑ کتگ ات۔ معیشت ءَ را دیم ءَ برگ ءِ واستہ نجی شعبہ ءَ را سروکیں کرد پیلو کنگ لوٹیت۔ دو سال ءِ تہا 220 ہزار ءَ چہ گیش سرمایہ کار سرمایہ کاری مارکیٹ ءَ ہوار بوتگ انت۔ چار شمبے ءِ روچ ءَ ادا سیکیورٹیز اینڈ ایکسچینج کمیشن ءِ چیردستی ءَ کیپیٹل مارکیٹ ڈویلپمنٹ فنڈ ءِ واستہ دستخطی مراگش ءَ گوں گشتانک دیان ءَ وزیر ءِ ھزانگ ءَ گوشت کہ پاکستان ءِ سروکی میاں اوستمانی تک ءَ امن ءِ برجائی ءِ واستہ وتی کرد ءَ پیلو کنگ ءَ انت ءُ اے کوشست آنی تہ ءَ جوانیں نتیجہ ھم درکپگ ءَ انت۔ ما درست اے بحران ءِ زوتیں گیش ءُ گیوار ءِ دعا ءَ کنیں پرچا کہ اے پاکستان، دمگ ءُ دگنیا ءِ مفاد ءَ اِنت۔ وزیر ءِ ھزانگ ءَ گوشت کہ میاں اوستمانی بحران ءِ اولی بھر ءِ آسر آناں گر ءُ چیل بوھگ ءِ واستہ پاکستان ءَ معیشت ءِ واستہ گہتریں حکمت عملی جوڑ کتگ۔ اے وھد ءِ تہا مئے دلگوش کرنٹ اکاؤنٹ، بیلنس آف پیمنٹس ءُ مالیاتی نظام ءِ سرا ات۔ بحران ءِ دومی ءُ سیمی بھر ءِ اثراتاں گوں گر ءُ دار کنگ ءِ ھاتر ءَ حکمت عملی ءِ سرا چار ءُ تپاسی کنگ بوھگ ءَ انت البت اے بحران ءِ مدت ءُ شدت ءِ سرا بندوک بیت۔ سینیٹر محمد اورنگزیب ءَ گوشت کہ اے بحران ءِ ساھت ءَ پاکستان ءَ چارسال ءِ کوپگ ءَ پد میاں اوستمانی سرمایہ کاری مارکیٹ آنی تہ ءَ واتر بوتگ، ایشی ءَ چہ معیشت ءِ سر ءَ مئے ءُ میاں اوستمانی سرمایہ کار آنی دل یکیمی ءِ درشان کنگ بوھگ ءَ اِنت۔ وزیر خزانہ ءَ گوشت کہ متحرک ءُ فعال سرمایہ کاری مارکیٹ دیمروئی ءُ نمدی ءِ انجن انت۔ میاں اوستمانی ءِ انوگیں بحران ءَ چہ دربرگ بوتگیں سبق ایش انت کہ ہر ملک ءَ تجارتی ءُ اسٹریٹجک ذخائر المی انت۔ شمسی، ہوا ءُ متبادل وسیلگاں چہ توانائی ءِ گرگ ءِ سر ءَ دلگوشی دیگ بہ بیت۔ حکومت متبادل توانائی ءِ مول ءُ مراد آنی سرجمی ءِ واستہ مالی وسیلگ آنی پجاری ءِ واستہ ھمک رنگ ءِ کوشست آناں دل یکیمی کنت۔ آئی ءَ گوشت کہ بحران ءِ سیمی درس وت مہ وتی انت۔ 2022 ءَ سیلاب ءَ پد پاکستان ءَ میاں اوستمانی براتی ءَ کمک ءِ اپیل کتگ۔ جنیوا کانفرنس ءِ تہا بازیں ملک ءُ ادارہاں پاکستان ءَ مالی کمک ءِ وعدہ کتگ ات کہ ایشانی تہا لہتیں وعدہ پیلو بوتگ انت وھدیکہ لھتے انگت ءَ عمل کنگ نہ بوتگ انت۔ برعکس 2025 ءَ وھدے سیلاب اتک گڑا تقریباً سرجمیں پاکستان ءَ سیلاب ءِ آماچ بوتگ ات ءُ ایشی ءِ شدت ھم باز بوتگ ات۔ بلے مالی وسیلگ ءُ توان ءِ سبب ءَ پاکستان ءَ پیسلہ کت کہ آ ریسکیو، ریلیف ءُ نوک جوڑیشت ءِ ھاتر ءَ میاں اوستمانی براتی ءَ چہ کمک نہ لوٹ ایت۔ آئی ءَ گوشت کہ سرجمیں معیشت ئِ استحکام مستریں چیز اِنت ایشی ئِ آسر ءَ مالی گنجائش پیداک بوت۔ وزیر ءِ ھزانگ ءَ گوشت کہ چاگرد یک ھاسیں جیڈھ ءِ انت، چاگردی ءُ موسمیاتی فنانس ءِ واستہ حکومت ءِ ھواری ءَ جندی شوبگ ءِ کرد ھم المی انت۔ حکومت بانڈ ءُ سکوک ءِ وسیلگ ءَ وتی کرد ءَ پیلو کنگ ءَ اِنت بلے دیمروئی ءِ انجن ءِ بستار ءَ نجی شعبہ ءَ را دیم ءَ روگی اِنت ءُ وتی کرد ءَ پیلو کنگی اِنت۔ مارا مالیات ءِ وسیلگاں چہ گیش کنگ ءِ سر ءَ دلگوش دیگی اِنت۔ آئی ءَ گوشت کہ مئے دلگوشی مالیاتی استحکام ءِ سر ءَ انت۔ پاکستان میاں اوستمانی ادارگ آنی کمک ءَ چہ مالیاتی نظام ءَ را مہکم کنگ ءَ انت۔ وزیر ءِ ھزانگ ءَ گوشت کہ گوستگیں دو سال آنی تہ ءَ 220ہزار ءَ چہ گیش سرمایہ کار سرمایہ کاری مارکیٹ ءَ ھوار بوتگ اَنت، ایشی ءِ تہ ءَ مزنیں بہرے ڈیجیٹل رسائی ءِ واھندیں ورنا اَنت۔ مارکیٹ ءِ تہا اتار چڑھاؤ ءِ باوجود ایوک ءَ اپریل ءِ ماہ ءَ 24 ہزار نوکیں سرمایہ کار مارکیٹ ءَ داخل بوتگ انت۔ اے گپ ءَ چہ پدر بیت کہ مئے رھبند ایکویٹی ءِ دیم ءَ راست اِنت۔ ورنا آنی تہ ءَ مالی سواد ءِ تہ ءَ گیشی ءِ سر ءَ دلگوشی دیگ ءِ ضلورت اِنت۔ سینیٹر محمد اورنگزیب ءَ گوشت کہ ریگولیٹری چاگرد ءَ را گہتر کنگ ءَ سیکیورٹیز اینڈ ایکسچینج کمیشن ءِ کرد المی انت۔ مارا مارکیٹ ءِ بنیات ءَ را گہتر کنگ ءُ گیش کنگ ءِ سر ءَ دلگوشی دیگی اِنت۔ ریگولیٹری ماحول ءِ آسان ءُ آسان تریں ، شرتر بیت۔ اے درگت ءَ وزارت مالیات ءُ وزارت کانود کانود سازی ءِ ھوالگ ءَ ہر وڑیں کمک ءِ پجارینگ ءِ واستہ تیار انت۔ وزیر ءِ ھزانگ ءَ گوشت کہ معیشت ءَ را دیم ءَ برگ ءِ واستہ پرائیویٹ سیکٹر ءَ را مستریں کرد پیلو کنگی بیت۔ حکومت پالیسی جوڑ کنگ ءُ ایکو سسٹم ءِ پھجارینگ ءِ سر ءَ دلگوشی دنت۔ اے درگت ءَ پرائیویٹائزیشن کمیشن ءِ چیر دستی ءَ 28 ادارگ آنی نجکاری ءِ عمل جاری انت۔ پی آئی اے ءِ نجی کنگ بوتگ۔ اے نجکاری ءِ وھد ءَ مارا 1.2 بلین ڈالر ءِ مالیت ءِ دمگی بولی رستگ اَنت۔ اے گپ ملک ءِ تہ ءَ سرمایہ کاری ءِ توانائی ءِ درشان اِنت۔ آئی ءَ گوشت کہ ڈسکو آنی مرحلہ وار نجکاری ھم برجاہ انت۔ اے درستیں دیمروئی اَنت کہ آھانی تہا ایس ای سی پی ءِ موثریں کرد گیشتر پدر کنگ بیت۔