موسمیاتی بحران ءِ تہا ذمہ وار ءُ آماچیں ملک برابر نہ انت، ڈاکٹر مصدق ملک ءَ بریتھ کانفرنس ءَ گوں تران

اسلام آباد۔6مئی  (اے پی پی): موسمیاتی بدلی ءُ چاگردی ھمگرنچی ءِ وفاقی وزیر ڈاکٹر مصدق ملک ءَ گوشت کہ موسمی بدلی نوکیں دور ءِ مستریں چیلنج اِنت، موسمیاتی بدلی ءِ سبب ءَ پاکستان ءَ بے دروریں تاوان رستگ، پاکستان موسمیاتی بدلی ءَ چہ گیشتر آماچیں ملک آنی تہ ءَ ھوار اِنت، سیلاب ءَ چہ اقتصادی جان سلامتی ءِ جیڑھ ءِ سبب جوڑ بوتگ۔ یکے دومی ءَ گوں بندوک اَنت، ھوا ءِ آلودگی پہ شہری ، ھاسیں رنگ ءَ زھگانی جان سلامتی ءَ سک باز ھترناک اِنت، درچک ءِ کشت ءُ کشار ھم بس نہ اِنت، آیانی رکھینگ ھم المی اِنت، چاگردی تاوان ءِ گیش ءُ گیوار یک جھان ءِ ذمہ واری اِنت، موسمیاتی بحران ءِ تہ ءَ ذمہ وار ءُ آماچیں ملک برابر نہ اَنت۔ پنچ شمبے ءِ روچ ءَ ادا بریتھ کانفرنس ءَ گوں گشتانک دیان ءَ مصدق ملک ءَ گوشت کہ بریتھ پاکستان کانفرنس ءِ مول ءُ مراد اے گپ ءَ را پدر کنگ انت کہ چاگردی آفت آنی سبب ءَ مردم آنی واستہ ساہ ءِ کشگ مشکل بوتگ۔ آئی ءَ گوشت کہ مُدامی سیلاب آنی آسر ءَ ھزاراں مردم بیران ءُ ٹپی بوتگ وھدیکہ میلیوناں مردم بے لوگ بوتگ اَنت۔ شکاگو یونیورسٹی ءِ یک پٹ ءُ پولے ءِ حوالہ ءَ آئی ءَ گشتگ کہ آلودہ ہوا ءِ سبب ءَ انسانی زند شش ءَ چہ ہفت سال کم بیت۔ ڈاکٹر مصدق ملک ءَ گوشت کہ پاکستان ءَ را جھان ءِ تک ءَ یک درسد ءَ چہ کم کاربن ڈائی آکسائیڈ کشگ بیت وھدیکہ دگنیا ءِ تہ ءَ ایوک ءَ دہ ملک کاربن ڈائی آکسائیڈ ءِ نزیک ءَ 70 ءَ چہ 75درسد کشگ ءَ اَنت ءُ سئے ملک یکجاہ کنگ ءَ چہ 60درسد ءِ نزیک ءَ کشگ ءِ ذمہ وار اَنت۔ آئی ءَ اے گپ ءَ را جھان ءِ ناانصافی لیکگ ءَ گوشت کہ آلودگی پیداک کنوکیں ملک ایشی ءِ آسراں چہ زھر نہ بوھگ ءَ اَنت وھدے کہ آماچیں ملک ایشی ءِ زھر ءَ برداشت کنگ ءَ اَنت۔ آئی ءَ گوشت کہ اے ایوک ءَ انصاف ءِ جیڈھ نہ انت بلکیں انسانی ھک آنی جیڈھ انت، پرچا کہ دیمروئی کنوکیں ملک آنی الس آناں ھم برابر ءِ ھک است انت۔ آئی ءَ اے گپ ءِ سر ءَ زور پر دات کہ چاگردی جیڈھ آنی گیواری ءِ واستہ سیاسی ارادہ ءُ عملی گامگیج المی انت۔ وفاقی وزیر ءَ گوشت کہ پاکستان ءِ 64درسد آبادی 30سال ءَ چہ کم عمر اِنت ءُ ورنا آنی تہ ءَ جوانیں ھیال ءُ لیکہ است اَنت بلے آھاں موہ پجارینگ ءِ ضلورت اِنت۔ اے مکسد ءِ واستہ حکومت ءَ یک پروگرامے ءِ جار جتگ ایشی ءِ چیر دستی ءَ ھمک سہ ماہی ءَ مقابلہ کنگ بنت ءُ ورنا آناں وتی نبشتہ کاری ءُ زانشتی منصوبگ آنی واستہ مالی کمک کنگ بیت۔ آئی ءَ گوشت کہ گرین یونیورسٹی ءِ جوڑ کنگ ءِ واستہ ھم کار کنگ بوھگ ءَ اِنت کہ ایشی ءِ تہ ءَ پاکستانی ءُ درملکی نودربر ءُ استاد یکجائی ءَ پٹ ءُ پول کن اَنت، ءُ ھما پٹ ءُ پول ءَ را دیم ءَ برگ بیت کہ عملی ءُ تجارتی بنیات آنی سر ءَ کارمرد بہ بیت۔ آئی ءَ گوشت کہ اطالوی یونیورسٹی ءِ گوما یک منصوبگ ءِ ھم گڈی رنگ ءَ کنگ بوھگ ءَ اِنت ایشی ءِ چیر دستی ءَ پاکستانی نودربر اطالوی نودربر ءُ استاد آنی گوما یکجائی ءَ پٹ ءُ پول کن اَنت وھدیکہ میاں اوستمانی ماہرین اے پٹ ءُ پول ءِ سر ءَ نگرانی کن اَنت تانکہ عملی ءُ تجارتی بنیات آنی سر ءَ آسر درگیجگ بہ بیت۔ ڈاکٹر مصدق ملک ءَ گوشت کہ اگاں ورنا آناں موہ ءُ وسیلگ پجاری کنگ بہ بنت گڈا آ نہ ایوک ءَ پاکستان ءِ بلکینگ ءَ سرجمیں دگنیا ءِ جیڈھ آنی گیواری ءِ پیشکش کت کن اَنت ھاسیں رنگ ءَ آپ ءُ چاگردی جیڈھ آنی پڑ ءَ۔ آئی ءَ گوشت کہ بریتھ پاکستان اصل ءَ ھمے جہد ءِ علامت انت ایشی ءِ مول ءُ مراد ھمک انسان ءِ واستہ ساپیں ھوا ءُ جوانیں چاگرد ءِ پجارینگ انت۔