مزن وزیر شہباز شریف ءَ بے دروریں وش اتک ءِ ھاتر ءَ سعودی ولی عہد ءُ مزن وزیر محمد بن سلمان ءِ منت واری درشان کت، دوستی ءِ دیمروئی ءُ شان ءُ شُہاز ءِ نوکیں بالاد ءَ سر بوھگ ءِ ھاتر ءَ دعا کت

اسلام آباد۔18ستمبر  (اے پی پی): مزن وزیر محمد شہباز شریف ءَ سعودی عرب ءَ بے دروریں وش آتک ءِ ھاتر ءَ سعودی ولی عہد ءُ مزن وزیر محمد بن سلمان ءِ منت گپت ءُ گوشت کہ اے پاکستان ءُ سعودی عرب ءِ نیام ءَ مھر ءُ وت مہ وتی احترام ءِ درشان اِنت۔ سعودی ولی عہد ءِ گوما گپ ءُ تران ءِ تہ ءَ دمگی چیلنجز آنی چار ءُ تپاسی ءُ دو نیمگی کمک ءَ را گیش کنگ ءِ واستہ بازیں جیڈھ آنی سر ءَ ھیال ریچی کنگ بوت۔ پنچ شمبے ءِ روچ ءَ ایکس ءِ سر ءَ وتی پوسٹ ءِ تہ ءَ مزن وزیر محمد شہباز شریف ءَ سعودی ولی عہد ءُ مزن وزیر محمد بن سلمان ءِ منت گپت کہ آ ریاض ءِ سرکاری تر ءُ تاب ءِ وھد ءَ آئی ءَ را وشیں وش اتک کتگ۔ مزن وزیر ءَ گوشت کہ رائل سعودی فضائیہ ءِ بالی اُرد ءِ بے دروریں وش اتک ءُ سعودی سلاہ بندیں اُرد ءِ گارڈ آف آنر پاکستان ءُ سعودی عرب ءِ نیام ءَ مہر ءُ شرپ ءِ درشان انت۔ آئی ءَ گوشت کہ سعودی ولی عہد ءِ گوما گند ءُ نند پائدگ مند بوتگ، ایشی ءِ تہ ءَ دمگی چیلنجز آنی چار ءُ تپاسی ءُ دو نیمگی کمک ءِ ھوار انت۔ مزن وزیر ءَ مسلم دگنیا ءِ واستہ سعودی ولی عہد ءِ وژن ءُ جزم ءَ را ساڑات۔ آئی ءَ گوشت کہ سعودی ولی عہد ءِ برجاھیں کمک ءُ دوئیں ملک آنی نیام ءَ سعودی سرمایہ کاری، بیپاری ءُ کاروباری سیادی آناں دیمروئی دیگ ءِ واستہ آئی ءِ سکیں دلچسپی ءِ ساڑات آں ۔ مزن وزیر ءَ پاکستان ءُ سعودی عرب ءِ نیام ءَ دوستی ءِ دیمروئی ءُ شان ءُ شُہاز ءِ نوکیں بالاد ءَ سر بوھگ ءِ واستہ دعا کت۔