خلیفتہ الارض انا زمواری تے اداکننگ کن ننے تینے قرآن و سنت تون گنڈوئی مریک، بنجائی وزیر پروفیسر احسن اقبال

اسلام آباد۔ 17 ستمبر (اے پی پی) بنجائی وزیر ڈٹ بندی، شونداری، اصلاحات و خصوصی گام گیج پروفیسر احسن اقبال پارینے کہ خلیفۃ الارض انا زمواری تے ادا کننگ کن ننے تینے قرآن و سنت تون گنڈوئی مریک، قرآن و سنت اسلامی تہذیب نا بنداوی تمبہ ءِ، معرفت نا کسر علم انا کمک اٹ طے کننگ مریک، اسلامی رغاموک آتیٹی کائنات نا کھوج و پٹ وپول اللہ تعالیٰ نا تسبیح آنبار المی ءِ۔ چارشنبے نادے آ داڑے انسٹی ٹیوٹ آف آرٹس اینڈ ڈیزین اٹی اڈ ہلوک جہانی کانفرنس آن تران کرسا اوپارے کہ خواجہ کریم صلی اللہ علیہ و آلہ وسلم نا امت اٹی ودی مننگ آ نن اللہ تعالیٰ نا شکر ءِ اداکین، دااللہ تعالیٰ نا بھاز بھلو انعام اسے، دنیا ءِ اللہ تعالیٰ نا کلہو ءِ سرکننگ نا زمواری خواجہ کریم صلی اللہ علیہ و آلہ وسلم نا امت آٹی ءِ تانکہ کس اس گمراہی نا کسر آ تل و ل مرسا ہدایت آن محروم مف۔ اوپارے کہ داوخت آ مسلمان تا آبادی اِرا ارب آن ودانے ولے اسہ کروڑ آبادی والا ملک اِرا ارب مخلوق ءِ مون آ خلکنے و او ہراتم و ہراوڑ خواہک مسلمان تا دتر تون ہولی گوازی کیک۔ اونا پاننگ ئس کہ غزہ ٹی مسلمان آتون ظلم و ستم نا بازار گرم ءِ، اسلامی ملک آتا سروک آتا دیوان ہم مس ولے اینو ہم غزہ غا بمباری مسنے، نن گیشتری ٹی مننگ آن پد ہم اقلیت آتا دُوتیان نسخان ہرفنگ اُن۔ اوحدیث نبوی صلی اللہ علیہ و آلہ وسلم نا حوالہ ءِ ترسا پارے کہ نن اصل زند و اونا مسخت آتے گیرام کرسا دنیا نا مہرومریبت اٹی دزگیر مسونن، تینا اصل فرض آن غافل مرسا  نن پستی نا دامان تیٹی تمسا کننگ اُن، صحابہ کرام آک مچے مننگ آن پد ہم اسلام ءِ مراکش آن انڈونیشیا اسکان سرکریر۔ بنجائی وزیر پارے کہ قرآن و سنت اسلامی تہذیب نا بنداوی تمبہ ءِ۔