ڈیجیٹل یوتھ ہب ورناتے مصنوعی ذہانت آ تالان وسیلہ غاتسکان ذاتی رسینگ فراوان کیک، چیئرمین وزیراعظم یوتھ پروگرام آن یونیسیف نا نمائندہ نا اوڑدہی

اسلام آباد۔ 17 ستمبر (اے پی پی) چیئرمین وزیراعظم یوتھ پروگرام رانا مشہود احمد خان پارینے کہ ڈیجیٹل یوتھ ہب ورناتے مصنوعی ذہانت آ تالان وسیلہ غاتسکان ذاتی رسینگ فراوان کیک، حکومت پاکستان تعلیمی نظام اٹی اصلاحات کن گام گیج کننگ ءِ۔ چارشنبے نادے آ وزیراعظم یوتھ پروگرام آن جاری بیان نارداٹ وزیراعظم یوتھ پروگرام نا چیئرمین رانا مشہود احمد خان تون وزیراعظم آفس اٹی یونیسیف نا نمائندہ مس پبنیلے آئر نسائیڈ اوڑدہی کرے۔ اوڑدہی ٹی پاکستان اٹی ورناتے واکدار کننگ، تعلیم نا نظام ءِ گچین کننگ ومنشاکارانہ کاریم ءِ مون آ دسننگ کن اہم ڈٹ آتیا گپ وتران کننگا۔ اوڑدہی ٹی مس آئرنسا ئیڈ ڈیجیٹل یوتھ ہب، پاکستان نا تعلیمی نظام و قومی منشاکار کورپ نا بابت گپ وتران کرے۔ یونیسیف نا نمائندہ مس آئرنسائیڈ وزیراعظم یوتھ پروگرام نا ڈیجیٹل یوتھ ہب و قومی منشاکار کورپ انا مخ تفی ءِ کرسا اوٹی گہری است خواہی نا درشانی ءِ کرے۔ اوپاکستان نا تعلیمی نظام اٹی اہم اصلاحات نا گرج آ ہم زور شاغا۔ چیئرمین وزیراعظم یوتھ پروگرام رانا مشہود احمد خان پارے کہ وزیراعظم یوتھ پروگرام نا رداٹ ڈیجیٹل یوتھ ہب ورناتے مصنوعی ذہانت آ تالان وسیلہ غاتسکان جندی رسینگ فراوان کیک، ڈیجیٹل یوتھ ہب پاکستان نا ورناتیکن اسہ اہم ءُ موقع اس جوڑمریک۔ اوپارے کہ حکومت پاکستان تعلیمی نظام اٹی اصلاحات کن گام گیج کننگ ءِ، پوسکن آ تعلیمی نظام ورناتے آخبت نا چیلنج آتیکن تیار کیک۔ رانا مشہود احمد خان پارے کہ قومی منشاکار کورپ انا کمک اٹ 20 لکھ منشاکار آتے تربیت تننگک، قومی منشاکار کورپ انا مسخت ورناتے مثبت راجی بدلی اتنگ کن واکدار کننگ ءِ۔