وزیراعظم پاکستان ٹیلی ویژن اٹی انگریزی چینل ’’پاکستان ٹی وی ڈیجیٹل ‘‘ نا بناءِ کرے، بیانیہ نا جنگ بے کچ اہم، پاکستان نا بارواٹی مروک آ غلط بیانی و پروپیگنڈا نا گچین ورندی تروئی ءِ، محمد شہباز شریف

اسلام آباد۔ 17 ستمبر (اے پی پی) وزیراعظم محمد شہباز شریف پاکستان ٹیلی ویژن اٹی جوڑ کروک انگریزی چینل ’’پاکستان ٹی وی ڈیجیٹل‘‘نا بناءِ کرے۔ چارشنبے نادے آ وزیراعظم پاکستان ٹی وی ڈیجیٹل نا دورہ ءِ کرے ہراڑے او پاکستان ٹی وی ڈیجیٹل نا جوڑ کننگ نا تختی نا نقاب کشائی ءِ کرے و ڈیجیٹل چینل نا باقاعدہ نشریات آتا بناناہم بناءِ کرے۔ داوخت آ بنجائی وزیر حوالکاری وشینکاری عطاء اللہ تارڑ و بنجائی سیکرٹری حوالکاری وشینکاری عنبرین جان تون اوار بڑزکو کمامدارآک ہم ساڑی ئسر۔ پی ایم آفس نا میڈیا ونگ انا کنڈآن جاری بیان نا رداٹ وزیراعظم پوسکن جوڑ کروک ٹی وی چینل نا چندی سیکشن تا دورہ ءِ کرے و ہموڑے کاریم کروک آ ورناتتون گپ وتران کرے۔ وزیراعظم اوفتا جوزہ نا ستاءِ کرسا پارے کہ پیشن نا بیانیہ نا جنگ اٹی اوفتا کڑد بے کچ اہم ءِ۔ اوپارے کہ ڈیجیٹل چینل نا بناءنا بنداوی مسخت پدریسہ حقی خبر فراوان کرسا پاکستان نا بارواٹی مروک آ غلط بیانی و پروپیگنڈا نا گچین ورندی ءِ تننگ ءِ۔ وزیراعظم پاکستان ٹی وی ڈیجیٹل نا نشریات آتیکن تینا اولیکو انٹرویو ءِ ہم ریکارڈ کرفے۔ داوخت آ بنجائی وزیر حوالکاری وشینکاری عطاءا للہ تارڑ وزیراعظم ءِ پاکستان ٹی وی ڈیجیٹل نا گرج و مسخت آتا بارواٹی معلومدار کرے۔ اوپارے کہ پاکستان ٹی وی ڈیجیٹل جہانی ناظرین آتے پاکستان کن اسہ فعال و پک توار اس فراوان کننگ ، معلومداری تا تضاد ءِ چٹفنگ و السی سفارتکاری کن انگریزی زبان نا اسہ پلیٹ فارم اسے نا وڑاٹ کاریم کیک۔ دا پلیٹ فارم نا سٹریٹجک مسخت پاکستان نا کنڈآن دنیا تون ہیت کننگ و غٹ آن مست تینا خبر سرکننگ ءِ، دا چینل جہانی امور، دودوربیدہ ئی تنوع و اقتصادی شونداری تون اوار اہم امور آپاکستانی نقطہ نظر ءِ تالان کیک۔ اوپارے کہ دا چینل ملک انا تہہ ٹی رپورٹنگ ءِ مربوط وخت اس کہ فری لانسرز نا اسہ جہانی نیٹ ورک و رائٹرز و ایسوسی ایٹڈ پریس کون آپنی آ وائر سروسز آتون شریداری کرسا وخت آ، پک کروک و بڑزکو آب انا کوریج ءِ پک کیک۔ اوپارے کہ دیکی و بھارت نا زیر اثر علاقائی میڈیا ٹی جاری  اسہ کنڈی بیانیہ نا توڑ ءِ کننگک۔ وزیرحوالکاری پارے کہ پاکستان ڈیجیٹل ٹی وی پاکستانی زاویہ اٹ خبرآتے سرکننگ نا بابت بھلا مرکز ءِ۔