وزیرداخلہ محسن نقوی نا تربت اٹی فرنٹیئر کور ساؤتھ نا ہیڈ کوارٹر اٹی شہید کیپٹن وقار احمد و 4 ورناتا نماز ءِ جنازہ ٹی بشخ ہلک

اسلام آباد۔ 17 ستمبر (اے پی پی) بنجائی وزیر داخلہ محسن نقوی تربت اٹی فرنٹیئر کور ساؤتھ نا ہیڈ کوارٹر اٹی آئی جی ایف سی ساؤتھ میجر جنرل بلال سرفراز خان تون اوار شہید کیپٹن وقار احمد و 4ورناتا نماز ءِ جنازہ ٹی بشخ ہلک۔ ترجمان وزارت داخلہ نا رداٹ بنجائی وزیر داخلہ محسن نقوی شہیدی نا جام ءِ نوش کروک آ کیپٹن وقار، نائیک عصمت اللہ، لانس نائیک جنید احمد و خان محمد و سپاہی محمد ظہورءِ خراج عقیدت پیش کرے۔ وزیرداخلہ محسن نقوی و آئی جی ایف سی ساؤتھ میجر جنرل بلال سرفراز شہید آتا درجہ غاتا بڑزی کن دعاکرے۔ وزیرداخلہ محسن نقوی وآئی جی ایف سی میجر جنرل بلال سرفراز شہید آتا میت آتے کوپہ ہم تس۔ وزیرداخلہ محسن نقوی نا پاننگ ئس کہ کیپٹن وقار احمد و ورناک فرض انا کسر اٹی نہادی جون تے ندر کرسا بڑزکو درور اس قائم کریر، قوم شہید آتا بے مٹ قربانی تا وام تے تننگ کپک، شہید آتا عظیم قربانیک زیان مفسہ۔ محسن نقوی پارے کہ شہید و اوفتا عظیم خاہوت آتے سلام پیش کینہ، شہید آتا خاہوت ننا تینا خاہوت آک ءُ، قوم مدام اوفتا مقروض سلک۔ میجر جنرل بلال سرفراز پارے کہ سیکورٹی فورس آتا قربانیک دہشت گردی نا برخلاف ننا بدل مفروک عزم انا شاہدی ءُ۔ نماز ءِ جنازہ ٹی بڑزکو عسکری و سول کمامدارآک بشخ ہلکر۔