وزیراعظم محمد شہبا ز شریف ولی عہد محمد بن سلمان نا سلہ غا اینو سعودی عرب نا سرکاری دورہ ءِ کیک، ترجمان دفترخارجہ

اسلام آباد۔ 17 ستمبر (اے پی پی) وزیراعظم محمد شہباز شریف (اینو) چارشنبے نادے آ سعودی ولی عہد محمد بن سلمان نا سلہ غا سعودی عرب نا سرکاری دورہ ءِ کننگ ءِ، دورہ ٹی کابینہ نا اہم باسک آک ہم وزیراعظم تون اوار مریرہ۔ ترجمان دفترخارجہ نا کنڈآن جاری بیان نا رداٹ دورہ ٹی وزیراعظم محمد شہباز شریف سعودی ولی عہد بن سلمان تون ہڑتوم آ کنڈآتا اوڑدہی کیک ہراٹی پاکستان سعودی عرب تعلقداری نا غٹ پلو آتا جاچ ءِ ہلنگک۔ اومیت ءِ کہ ہڑتوم آرا ہشونک تین پہ تینی است خواہی نا علاقائی و جہانی پیش رفت آ ہم گپ وتران کیرہ۔ اومیت ءِ کہ دادورہ ٹی چندی بشخ آتیٹی کمکاری ءِ باضابطہ دروشم اس ملک ہراہڑتوم آ فریق آتا متکن آ برادرانہ تعلقداری ءِ پین ودفنگ وگہرا کننگ کن اسیجائی عزم انا عکاسی ءِ کیک۔ بیان نا رداٹ پاکستان و سعودی عرب نا نیام اٹ تاریخی تعلقداری ءِ ہرانا ماسک اسیجائی مذہبی قدر و تین پہ تینی پت آ تالان ءُ۔ وزیراعظم نا دورہ ہڑتوم آ راہشون تے دا یکتا شریداری ءِ سوگو کننگ نا اسہ اہم ءُ موقع اس فراوان کیک و ہڑتوم آملک آک الس نا فائدہ کن کمکاری نا پوسکن ءُ کسر پٹرہ۔