دیمروئی بجٹ راجی دیمروئی ءِ ریڑھ ءِ ھڈ اِنت، آئی ایم ایف ءِ پروگرام ءِ جاور ھالانی سبب ءَ ھر کلدار ایوک ءَ مزنیں اولویت ءِ منصوبگ آنی سر ءَ کارمرد کنگ بہ بیت، احسن اقبال

اسلام آباد۔16ستمبر  (اے پی پی): منصوبگ بندی، دیمروئی ءُ ھاسیں گامگیج آنی وفاقی وزیر پروفیسر احسن اقبال ءَ گوشت کہ دیمروئی بجٹ راجی دیمروئی ءِ ریڑھ ءِ ھڈ اِنت، آئی ایم ایف پروگرام ءِ جاور ھال آنی سبب ءَ اے سال ءَ دیمروئی بجٹ کم بوتگ، پمیشکا ھر کلدار ءَ را ایوک ءَ مزنیں اولویت ءِ منصوبگ آنی سر ءَ کارمرد کنگ بہ بیت،   ترمیم ءِ سبب ءَ 26 منصوبگ دو گناہ بوتگ انت وھدے کہ اے سال ءَ ھم 26 منصوبگ ترمیم ءَ پد مالی دباؤ ءِ آماچ انت۔ آئی ءَ اے گپ سئے شمبے ءِ روچ ءَ ادا مزن تک ءِ دیوان ءِ سروکی ءَ کنان ءَ گوشت کہ ایشی ءِ تہ ءَ سرکاری پڑ ءِ دیمروئی پروگرام 2024-25 ءِ سالانہ کارکردگی ءُ مالی سال 2025-26 ءِ اولی سہ ماہی ءَ پی ایس ڈی پی ءِ چیر دستی ءَ شنگ بوتگیں فنڈز ءُ ھرچ ءُ درچ ءِ سر ءَ چار ءُ تپاسی کنگ بوتگ۔ دیوان ءَ رواں مالی سال ءِ تہ ءَ وزارت ، ڈویژن ءُ استان آنی دیمروئی منصوبگ آنی سر ءَ چار ءُ تپاسی کنگ بوتگ ءُ ھمے رنگ ءَ رواں مالی سال ءِ تہ ءَ محدودیں دیمروئی ءِ زرّ آناں جوانیں ءُ کارآمدیں رنگ ءَ کارمرد کنگ ءِ رھبند آنی سر ءَ چار ءُ تپاسی کنگ بوتگ۔ دیوان ءَ پلاننگ کمیشن ءِ سینئر مینجمنٹ، وفاقی سیکرٹری ءُ وفاقی وزارت، ڈویژن ءُ صوبائی محکمہ آنی سروکیں حکام ءَ بہر زرتگ۔ دیوان ءَ گوں تران کنان ءَ وفاقی وزیر ءَ دیمروئی فنڈز ءِ ھوالگ ءَ گنجائش ءِ کمی ءِ سر ءَ جیڈھ ءِ درشانی کت ءُ گوشت کہ ملک ءِ راجدپتر ءَ اولی رند ءَ پی ایس ڈی پی ءِ واستہ منظور بوتگیں فنڈز ءِ کساس گوستگیں سال ءَ یک کھرب کلدار ءَ چہ گیش بوتگ کہ اے ریکارڈ بوتگ بلے بدبھتی ءَ اے سال ءَ ما برعکسیں نیمگ ءَ روگ ءَ ایں ۔ آئی ءَ گوشت کہ پی ایس ڈی پی ءِ واستہ ایر کنگ بوتگیں فنڈز 2018 ءَ جی ڈی پی ءِ 2.6درسد ءَ چہ کم بوتگ ءُ 2025ءَ تاں ایوک ءَ 0.8درسد بوتگ ایشی ءَ چہ معیشت ءُ روزگار ءِ موہ آنی سر ءَ سک باز دباؤ بوتگ۔ آئی ءَ گوشت کہ دیمروئی بجٹ راجی دیمروئی ءِ ریڑھ ءِ ھڈ اِنت، آئی ایم ایف ءِ پروگرام ءِ جاور آنی سبب ءَ اے سال ءَ دیمروئی بجٹ کم کنگ بوتگ، ھمے ھاتر ءَ ھمک کلدار ایوک ءَ مزنیں ارزشت ءِ منصوبگ آنی سر ءَ کارمرد کنگ بہ بیت۔ آئی ءَ گوشت کہ وزارت ءِ منصوبگ بندی ءِ لوٹ ءُ مزن وزیر ءِ ہدایت ءِ رد ءَ ھاسیں کمیٹی جوڑ کنگ بوتگ ایشی ءَ چار روچ ءَ برجمیں منصوبگ آنی سرجمیں چار ءُ تپاسی کتگ۔ کمیٹی ءَ رواں مالی سال ءِ واستہ پی ایس ڈی پی ءِ کساس ءَ را 1267ارب کلدار ءَ گیش کنگ ءِ سفارش کتگ بلے وزارت ھزانگ ءَ ایوک ءَ 1000ارب کلدار ءِ ھرچ ءُ درچ داتگ۔ آئی ءَ اے گپ ءِ سر ءَ زور پر دات کہ ھمک وزارت وتی منصوبگ آنی سر ءَ پدا چار ءُ تپاسی بہ کنت ءُ ایوک ءَ المی ءُ راجی ارزشت ءِ منصوبگ آناں دیم ءَ بیار ایت۔ آئی ءَ گوشت کہ جائزہ ءِ پد ءَ منصوبگ آنی ھرچ ءُ درچ باز براں گیش بیت، گوستگیں سال ءَ جائزہ ءِ سبب ءَ 36 منصوبگ آنی ھرچ ءُ درچ دوگنا بوتگ، وھدے کہ اے سال ءَ ھم جائزہ ءِ پد ءَ 26 منصوبگ آنی سر ءَ سکیں مالی دباؤ ءِ آماچ انت۔ ایوک ءَ ھرچ ءُ درچ ءِ تہ ءَ گیشی ءِ اثر 100ارب کلدار ءَ چہ گیش اِنت۔ دیوان ءَ را گوشگ بوت کہ مالی سال 2024-25ءِ واستہ پی ایس ڈی پی 10ہزار 216ارب کلدار ءِ کیری فارورڈ ءِ گوما بندات بوتگ۔ سپانسرنگ ادارگ آنی نیمگ ءَ جاری ءُ نوکیں منصوبگ آنی واستہ 2904ارب کلدار ءِ لوٹ کنگ بوتگ بلے اصل تخصیص کتگیں بجٹ 1400ارب کلدار ءَ چہ کم کنگ بوتگ ءُ 1100ارب کلدار کنگ بوتگ۔ مختص کتگیں بجٹ ءِ ھلاپ ءَ 1077ارب کلدار کارمرد کنگ بوتگ۔ دیوان ءَ سرپد کنگ بیت کہ میان اُستمانی چار ءُ تپاسی ءَ پد جون 2025 ءَ تاں 221 منصوبگ آناں سرجم کنگ ءُ 123 منصوبگ آناں ھلاس کنگ ءِ پیسلہ کنگ بیت ایشی ءِ آسر ءَ کل بقایا زمہ واری 2 کھرب کلدار کم کنگ بوتگ تانکہ ترندیں رفتار ءُ راجی منصوبگ آنی سر ءَ دلگوشی دیگ بہ بیت۔ دیوان ءَ سرپد کنگ بیت کہ رواں مالی سال ءِ تہ ءَ پی ایس ڈی پی ءِ تیاری ءِ تہ ءَ اقتصادی ءُ مرکزی دیمروئی ورکنگ پارٹی ءِ نیمگ ءَ منظور کتگیں منصوبگ آناں اولیت دیگ بوتگ ءُ صوبائی تک ءَ پدمنتگیں ضلع آنی تہ ءَ جاہ منندیں منصوبگ آناں ابید نوکیں منصوبگ آناں ھوار کنگ نہ بوتگ۔ کلیں ایر کتگیں زرّ آنی تہ ءَ 62درسد اقتصادی ءُ مرکزی دیمروئی ورکنگ گل ءِ منصوبگ آنی سر ءَ ھرچ کنگ بیت۔ ایشی ءَ ابید وسیلگ آنی کمی ءَ را ھیال ءَ دارگ ءَ نوکیں منصوبگ آنی بندات کنگ ءِ واستہ این او سی المی بیت۔ وفاقی وزیر ءَ گوشت کہ وام ءِ بوجھ گیش بوھگ ءَ انت ءُ مالی گنجائش کم بوھگ ءَ انت، اے درگت ءَ مارا آیوکیں وھد ءِ واستہ ذمہ واری ءِ رنگ ءَ منصوبگ بندی کنگی انت۔ آئی ءَ امیت سہرا کت کہ آیوکیں مالی سال ءَ گیش جامع ءُ آیوکیں وھد ءِ ھاترا پی ایس ڈی پی ءِ جوڑ کنگ ءِ موہ رس ایت۔