مشرق ڈیجیٹل بینک انا جوڑ کننگ پاکستان اٹی کیش لیس کاروبار و مالیاتی بشخ انا شونداری و مون آ دننگ اٹی مزل نا نشان مریک، وزیراعظم شہباز شریف نا مشرق ڈیجیٹل ریٹیل بینک انا بنائی دود آن تران

اسلام آباد۔ 16ستمبر (اے پی پی) وزیراعظم محمد شہباز شریف ڈیجیٹلائزیشن ءِ وخت انا گرج گوندسا پارینے کہ مشرق ڈیجیٹل بینک انا جوڑ کننگ پاکستان اٹی کیش لیس کاروبار و مالیاتی بشخ انا شونداری و مون آ دننگ اٹ مزل نا نشان مریک، ورناک ملک انا آبادی نا بھلو بشخ اسے ءُ، داورناک ننکن بھلا چیلنج و عظیم موقع اسے ءُ، زرگزران ءِ پیپرلیس جوڑ کننگ و اوٹی انسانی عمل دخل ءِ کم کروئی مریک۔ اوداخیال آتا درشانی ءِ دوشنبےنادے آ داڑے پاکستان اٹی مشرق ڈیجیٹل ریٹیل بینک انا بنائی دود آن تران کرساکرے۔ دود اٹی بنجائی وزیر خزانہ محمد اورنگزیب ، بنجائی وزیر ڈٹ بندی  وشونداری احسن اقبال، بنجائی وزیر پیٹرولیم علی پرویز ملک ، بنجائی وزیر ریلوائی حنیف عباسی، بنجائی وزیر بحری امور جنید انوار، گورنر اسٹیٹ بینک جمیل احمد و سیکرٹری خزانہ امداد اللہ بوسال ئسک ہم ساڑی ئسر۔ وزیراعظم پارے کہ پاکستان اٹی ارٹ میکو ڈیجیٹل بینک مشرق ڈیجیٹل بینک انا جوڑ مننگ ستاکڑزک، مشرق بینک انا مالک آتا تعلق متحدہ عرب امارات آن ءِ و او مدام پاکستان نا زرگزرانی و راجی شونداری نا خواہندار مسنو، پاکستان و متحدہ عرب امارات نا تعلقداری تے سوگو کننگ اٹ الغریر خاہوت نا اہم کڑد ءِ۔ وزیراعظم پارے کہ مشرق ڈیجیٹل بینک انا قیام پاکستان اٹی کیش لیس کاروبار و مالیاتی بشخ انا شونداری و مون آ دننگ اٹ مزل نا نشان مریک، مشرق بینک انا چیف ایگزیکٹیو آفیسر ورناک ءُ، پاکستان نا آبادی نا اسہ بھلو بشخ اس ورناتیا تالان ءِ، دا ورناک ملک اکن اسہ بھلا چیلنج و عظیم ءُ موقع اسے۔ اوپارے کہ گورنر اسٹیٹ بینک لائخ ءُ شخصیت اسے ، پوسکن آ مانیٹری پالیسی ٹی پالیسی ریٹ ءِ برقرار تخنگانے، ملک اٹی کاروباری، کشاری و صنعتی سرجزو بینکاری نظام ءِ مون آدننگ نا گرج ءِ۔ اوپارے کہ اینو نا دور ڈیجیٹلائزیشن نا دور ءِ و ڈیجیٹلائیزشن و پوسکن آ ٹیکنالوجی نا کاریم اٹ اتنگ آن زرگزران ءِ شونداری تننگ مریک، زرگزران ءِ پیپرلیس کننگ و اوٹی انسانی عمل دخل ءِ کم کروئی مریک۔ اوپارے کہ مشرق بینک اسہ بھلو بینک اسے و اومیت کینہ کہ پاکستان اٹی ڈیجیٹل بینک انا قیام آن مالیاتی بشخ اٹی الس ءِ گچین خذمت آتا فراوانی نا بابت بھلو بدلی اس بریک ۔ داوخت آ بنجائی وزیر خزانہ محمد اورنگزیب پارے کہ وزیراعظم محمد شہباز شریف نا کماشی ٹی حکومت ملک اٹی اقتصادی سوگوی کن کوشست کننگ ءِ ، ترسیلات زر پاکستان نا لائف لائن ءِ ، جہانی ریٹنگ ایجنسیک ہم پاکستان نا گچین زرگزرانی کارکڑد ءِ پک کرینو ہراڑآن دا پک مریک کہ پاکستان نا زرگزران سہی کنڈآ ہِننگ ءِ، دااسہ بنااسے و ننے پین مون آ ہنوئی ءِ۔ اوپارے کہ ساڑی حکومت پنجرجاتی اصلاحات درستی راستی کرفنگ ءِ ، توانائی ، بینکاری نظام و ایس اویز نا بابت چندی گام گیج آتے کننگ انگ ءِ، نن پالیسی تا چرجوئی ءِ پک کینہ، مشرق ڈیجیٹل بینک انا پاکستان نا مالیاتی بشخ اٹی شمولیت ستاکڑزک، اومیت ءِ مشرق ڈیجیٹل بینک پاکستان اٹ الس ن گچین خذمت درستی راستی کرفک۔ مشرق بینک انا چیئرمین عبدالعزیز الغریر پارے کہ مشرق بینک پاکستان اٹ تینا مالیاتی سفر نا بناءِ کننگ ءِ، پاکستان نا حکومت وزیراعظم محمد شہباز شریف نا کماشی ٹی ملک اٹی اصلاحات ، زرگزرانی شونداری و درملکی زرکاری کن کوشست کننگ ءِ ، ننے داعمل اٹی بشخ ہلنگ آ گمر ءِ، ڈیجیٹل ریگولیٹری فریم ورک انا رداٹ اسٹیٹ بینک انا گام گیج ستاکڑزک، نن اول پورو ڈیجیٹل بینک انا قیام کن پاکستان ءِ گچین کرینن ، پاکستان جغرافیائی محل و وقوع  کاروباری مالیاتی سرجزآتیکن گچین چاگڑد نا سوب ڈیجیٹل اکنامک پاور ہاؤس  مننگ نا لائخی تخک، نن پاکستان اٹی گچین مالیاتی خذمت اسکان رسینگ ءِ پک کینہ، نن بیرہ پاکستان اٹی ڈیجیٹل بینک اس جوڑ کپننگ اُن بلکن اونا شونداری نا سفر اٹی شریک مننگ اُن۔ مشرق بینک انا چیف ایگزیکٹیو آفیسر محمد ہمایوں سجاد پارے کہ تدوک آ سال پاکستان اٹ ڈیجیٹل ادائیگی تیٹی 30 درسد ودکی مسنے، ورناک مالیاتی بشخ انا ڈیجیٹل آخبت ءُ، ڈیجیٹل بینکاری نا مون آ دننگ و سائبر سیکورٹی کن اسٹیٹ بینک انا گام گیج ستاکڑزک۔ داوخت آ وزیراعظم محمد شہباز شریف و چیئرمین مشرق بینک عبدالعزیز الغریر پاکستان اٹ مشرق ڈیجیٹل ریٹیل بینک نا باضابطہ بناءِ کریر ۔