وزیراعظم شہباز شریف و ایرانی صدر ڈاکٹر مسعود پیزشکیان نا ہلہلہ ئی عرب اسلامی سروکی دیوان نا وخت آ ہڑتوم آ کنڈآتا اوڑدہی ، پاکستان و ایران نا قطر اتون یکجہتی نا درشان

اسلام آباد۔ 16 ستمبر (اے پی پی) پاکستان و ایران قطر اتون یکجہتی نا درشانی ءِ کرسا اسرائیلی جارحیت نا مقابلہ ٹی امت نا صف آتیٹی سیوت نا گرج آ زور شاغانو، وزیراعظم محمد شہباز شریف و اسلامی جمہوریہ ایران نا صدر ڈاکٹر مسعود پیز شکیان نا نیام اٹ ہلہلہ ئی عرب اسلامی سروکی دیوان نا وخت آ ہڑتوم آ کنڈآتا اوڑدہی مس۔ وزیراعظم آفس نا میڈیا ونگ انا کنڈآن جاری بیان نا رداٹ اوڑدہی ٹی نائب وزیراعظم و وزیرخارجہ سینیٹر محمد اسحاق ڈار، آرمی چیف فیلڈ مارشل سید عاصم منیر ، وزیر دفاع خواجہ محمد آصف و بنجائی وزیر حوالکاری وشینکاری عطاء اللہ تارڑ ئسک ہم ساڑی ئسر۔ اوڑدہی ٹی وزیراعظم پاکستان نا کنڈآن 9 ستمبر آ قطر انا برخلاف اسرائیلی جارحیت نا ترندی اٹ مذمت نا درشانی ءِ کرے۔ ہڑتوم آ راہشونک قطرا کن تینا یکجہتی و مخ تفی نا درشانی ءِ کریر و اسرائیلی جارحیت نا مقابلہ ٹی امت نا صف آتیٹی سیوت نا گرج آ زور شاغار۔ وزیراعظم پارے کہ دوحہ عرب اسلامک سمٹ مسلم دنیا نا کنڈآن اسہ سوگو و امنائی کلہو اس تسنے کہ اسرائیل نا جارحیت ءِ پین سگنگپک۔ تدوک آ تُو ایرانی صدر نا دورہ ءِ پاکستان نا ذکر ءِ کرسا وزیراعظم پاکستان نا ایران تون تین پہ تینی است خواہی نا غٹ بشخ آتیٹی ہڑتوم آکنڈآتا تعلقداری ءِ ودفنگ نا است خواہی نا درشانی ءِ کرے۔ وزیراعظم ایران نا سپریم لیڈر آیت اللہ علی خامنہ ای کن نیک است خواہی نا درشانی ءِ کرے۔ صدر پیز شکیان فلسطین نا ویل آ پاکستان نا سوگو موقف نا ستاءِ کرسا پاکستان ایران تعلقداری ءِ پین سوگو کننگ کن وزیراعظم تون اواری اٹ کاریم ءِ برجاتخنگ نا است خواہی نا درشانی ءِ کرے۔ ہڑتوم آ راہشونک ترندی اٹ بدل مروک علاقائی حالیت آتا رداٹ رابطہ ءِ برجاتخنگ آ امنا کریر ۔