مزن وزیر شہباز شریف ءُ ایران ءِ صدر ڈاکٹر مسعود پیزشکیان  ءِ نیام ءَ ایمرجنسی عرب اسلامی سروک دیوان ءِ ساھت ءَ وت مہ وتی گند ءُ نند ءَ پاکستان ءُ ایران ءَ گتر ءِ گوما یکوئی ءِ درشان

اسلام آباد۔16ستمبر  (اے پی پی): پاکستان ءُ ایران ءَ گوں گتر ءَ یکوئی ءِ درشان کتگ ءُ اسرائیل ءِ زوراکی ءَ گوں گر ءُ چیل بوھگ ءِ واستہ راجانی نیام ءَ یکوئی ءِ ضلورت ءِ سر ءَ زور پر داتگ ۔ مزن وزیر محمد شہباز شریف ءُ جمہوریہ اسلامی ایران ءِ صدر ڈاکٹر مسعود پیزشکیان ءِ نیام ءَ ایمرجنسی عرب اسلامی سروک دیوان ءِ موہ ءَ دو نیمگی گند ءُ نند ءِ برجم دارگ بوت۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ نائب مزن وزیر ءُ دری کارانی وزیر سینیٹر  محمد اسحاق ڈار، آرمی چیف فیلڈ مارشل سید  عاصم منیر، وزیر دفاع خواجہ محمد آصف ءُ وفاقی وزیر ءِ اھوالکاری ءُ نشریات عطا اللہ تارڑ ءِ دیوان ءَ ھم ھوار بوتگ اَنت۔ گند ءُ نند ءِ ساھت ءَ مزن وزیر ءَ 9ستمبر ءَ گتر ءِ سر ءَ اسرائیل ءِ زوراکی ءِ پاکستان ءِ سکیں مذمت ءِ پدا زور دات۔دوئیں سروکاں گتر ءِ واستہ یکوئی ءُ کمک ءِ درشان کت ءُ اسرائیل ءِ زوراکی ءِ دیم ءَ امت ءِ نیام ءَ یکوئی ءِ ضلورت ءِ سر ءَ زور پر دات۔ مزن وزیر ءَ گوشت کہ دوحہ ءِ عرب اسلامی سروک دیوان ءَ مسلم دگنیا ءِ نیمگ ءَ چہ یک مھکمیں ءُ یکوئی کلوہ داتگ کہ اسرائیل ءِ زوراکی ءَ را گیش برداشت کنگ نہ بیت۔ گوستگیں ماہ ءَ ایران ءِ صدر ءِ پاکستان ءِ تر ءُ تاب ءِ حوالہ ءَ مزن وزیر ءَ پاکستان ءِ واھشت ءِ سر ءَ زور پر دات کہ آ ایران ءِ گوما وت مہ وتی مفاد ءِ درستیں پڑ آنی تہ ءَ دو نیمگی سیادی آناں گیش بہ کنت۔ مزن وزیر ءَ ایران ءِ سپریم لیڈر آیت اللہ علی خامنہ ای ءِ گوما نیکیں واھگ آنی درشان کت۔ صدر پیزشکیان  ءَ فلسطین ءِ جیڈھ ءِ سر ءَ پاکستان ءِ مھکمیں موقف ساڑات ءُ پاکستان ءُ ایران ءِ سیادی ءَ را گیش مھکم کنگ ءِ واستہ مزن وزیر ءِ گوما کار کنگ ءِ واھشت ءِ درشان کت۔ دوئیں رہشوناں دمگی جاور ھال آنی تہ ءَ ترندی ءَ گوں بدل بوھگ ءِ رد ءَ رابطہ ءِ برجاہ دارگ ءِ سر ءَ تپاک کتگ۔