پاکستان گپ ءُ تران ءِ وسیلگ ءَ جیڑھانی پرامنیں رنگ ءَ گیش ءُ گیوار کنگ ءِ حمایت کنت، لبنان ءُ شام ءَ پد اسرائیل ءِ گتر ءِ سر ءَ اُرش نا منّگ بیت، نائب مزن وزیر ءُ درئی کارانی وزیر ایس محمد اسحاق ڈار

اسلام آباد۔16ستمبر  (اے پی پی): نائب مزن وزیر ءُ دری کارانی وزیر سینیٹر محمد اسحاق ڈار ءَ گوشت کہ پاکستان ءَ گپ ءُ تران ءِ وسیلگ ءَ جیڈھ آناں پرامن گیواری ءِ حمایت کتگ، گتر ءِ سر ءَ اسرائیل ءِ اُرش ءِ مذمت کتگ، لبنان ءُ شام ءَ پد اسرائیل ءِ گتر ءِ سر ءَ اُرش نا منّگ بیت، او آئی سی فورم ءَ اسرائیل ءِ سر ءَ سک باز مذمت کتگ۔ اے ھیال آئی ءَ ”الجزیرہ“ ءَ گوں تران کنان ءَ درشان کتگ اَنت۔ نائب مزن وزیر ءَ گوشت کہ پاکستان ءَ ناشرکاری ءِ ھلاپ ءَ جنگ ءَ گیش ءَ چہ گیش قربانی داتگ، پاکستان امن دوستیں ملکے ءُ گپ ءُ تران ءِ وسیلگ ءَ جیڈھ آناں گیش ءُ گیوار کنگ لوٹ ایت۔ محمد اسحاق ڈار ءَ گوشت کہ اسرائیل ءِ وت واجہیں ملک ءِ سر ءَ اُرش کنگ ءِ ھچ وڑیں جواز نیست۔ گتر ءِ سرا اسرائیل ءِ اُرش ءَ پد ما سومالیہ ءِ گوما یکجائی ءَ سلامتی کونسل ءِ ہنگامی دیوان ءِ لوٹ کتگ۔ آئی ءَ گوشت کہ پاکستان ءَ گتر ءِ دوست ءُ براتیں ملک ءِ بستار ءَ سرگرمیں کرد پیلو کتگ۔ اسرائیلی اُرش ءِ تہ ءَ ایوک ءَ مذمت کنگ بس نہ اِنت، نوں مارا یک ھاسیں راہ ءُ درے گچین کنگی اِنت۔ نائب مزن وزیر ءَ گوشت کہ غزہ ءَ بے شرط جنگ بندی ءِ وھد اتکگ۔ غزہ ءِ مردم سک باز تکلیف دہ انت۔ چہ ایشی ءَ اے گپ پدر اِنت کہ اسرائیل امن نہ لوٹیت۔ آئی ءَ گوشت کہ پاکستان مدام مسلم امت ءِ تہ ءَ یکوئی ءِ منوگر بوتگ۔ گتر ءِ سرا اسرائیل ءِ اُرش سرجم ءَ نا اُمیتیں گامگیجے بوتگ۔ محمد اسحاق ڈار ءَ گوشت کہ ما ملک ءَ چہ ناشرکاری ءِ ھلاسی ءِ واستہ جزمیگ آں ۔ اے پہ بھارت ءَ زھر ءِ سوب اِنت کہ آ ناشرکاری ءِ بدترین شکار بوھگ ءِ الزام ءَ بہ جنت۔ نائب مزن وزیر ءَ گوشت کہ یک طاقت ءِ بستار ءَ پاکستان مسلم امت ءِ گوما اوشتاتگ، مئے کر ءَ مھکمیں قوت ءُ جدید سلاھاں است انت، ما کس ءَ را وتی حاکمی ءُ ایمنی ءِ پاد مان کنگ ءِ موہ نہ دئیں۔ محمد اسحاق ڈار ءَ گوشت کہ سندھ ءِ آپ ءِ معاہدے ءِ رد ءَ پاکستان ءُ بھارت ءِ نیام ءَ آپ بھر ءُ بانگ کنگ بوتگ، بھارت یک نیمگی سندھ ءِ آپ ءِ منوگری ءَ را ھلاس یا مھتل کنگ نہ کنت، آیوکیں جنگ آناں آپ ءِ سر ءَ بوھگی اِنت۔ نائب مزن وزیر ءَ گوشت کہ پاکستان ءَ اے گپ پدر کتگ کہ آپ ءِ بند کنگ ءِ عمل ءَ را جنگ ءِ جار لیکگ بیت، بھارت ءِ گوما کشمیر ءِ جیڈھ توامیں جیڈھ آنی سر ءَ گپ ءُ تران ءِ واستہ پچ انت۔ آئی ءَ گوشت کہ گپ ءُ تران جیڈھ آنی گیواری ءِ جوانیں راہ اِنت، ایشانی سوبمندی ءِ واستہ سنجیدگی ھم المی اِنت۔ آئی ءَ گوشت کہ اقوام متحدہ ءَ نوں اسرائیل ءِ راہ ءَ را بند کنگی اِنت، سلامتی کونسل ءَ اصلاحات کنگ بہ بنت، سلامتی کونسل کشمیر ءُ فلسطین ءِ جیڈھ آنی گیواری ءِ واستہ وتی ذمہ واری ءَ پیلو بہ کنت۔