پاکستان جھیڑہ غاتا گپ وتران نا کمک اٹ پرامن ایسری نا مخ تف، نائب وزیراعظم و وزیرخارجہ سینیٹر محمد اسحاق ڈار

اسلام آباد۔ 16 ستمبر (اے پی پی) نائب وزیراعظم و وزیرخارجہ سینیٹر محمد اسحا ق ڈار پارینے کہ پاکستان جھیڑہ غاتا گپ وتران نا کمک اٹ پرامن وڑاٹ ایسری نا مخ تفی ءِ کرینے، قطر آ اسرائیلی جلہونا مذمت ءِ کینہ، اسرائیل نا لبنان و شام آن پد قطرآ جلہو ءِ منپنہ، اوآئی سی فورم آن پبی وڑاٹ اسرائیلی جلہو نا مذمت ءِ کننگا۔ داخیال آتا درشانی ءِ او ’’الجزیرہ‘‘ ءِ انٹرویوٹی کرے۔ نائب وزیراعظم پارے کہ پاکستان دہشت گردی نا برخلاف جنگ اٹی غٹ آن زیات قربانی تسنے، پاکستان امن پسند ءُ ملک اسے و مذاکرات اٹ ویل آتا ایسری ءِ خواہک۔ محمد اسحاق ڈار پارے کہ اسرائیل نا اسہ وتواجہ ملک اسے آ جلہو نا ہچ ءُ جواز اس اف ، قطر آ اسرائیلی جلہو آن پد نن صومالیہ تون اواری اٹ سلامتی کونسل نا ہلہلہ ئی دیوان نا خواست کرین۔ اوپارے کہ قطر انا سنگت و برادر ملک انا وڑاٹ پاکستان فعال کڑد ادا کرے، اسرائیلی جلہو نا بیرہ مذمت گنج اس اف، داسہ ننے پیدوار لائحہ عمل اس اختیار کروئی مریک۔ نائب وزیراعظم پارے کہ وخت بسنے کہ غزہ ٹی غیرمشروط جنگ بندی ءِ پک کننگے، غزہ نا الس بے کچ مشکلات آتا گواچی ءُ، اسرائیلی اشتعال انگیزی تیان پیدوار ءِ کہ او اسُل امن خواپک۔ اوپارے کہ پاکستان مدام امت مسلمہ نا نیام اٹ سیوت نا داعی مسنے، قطر آ اسرائیل نا جلہو پورو وڑاٹ برخلاف توقع گام اس ئس۔ محمد اسحاق ڈار پارے کہ ملک آن دہشت گردی نا چٹفنگ کن سنبرینگوک اُن، ہرا ملک دہشت گردی نا غٹ آن زیات گواچی ءِ بھارت نا اوڑآ دوبہ خلنگ حیرت نا سوب ءِ۔ نائب وزیراعظم پارے کہ بطور ایٹمی واک پاکستان مسلم امہ تون سلوک ءِ، ننتون سوگو فوج و پوسکن سلہہ  ساڑی ءِ، نن کس اسے تینا وتواجہی و سالمیت نا خلاف ورزی نا موکل تفنہ۔ محمد اسحاق ڈار پارے کہ سندھ طاس معاہدہ نا رداٹ پاکستان و بھارت نا نیام اٹ دِیر انا تقسیم مس، بھارت اسہ کنڈی وڑاٹ سندھ طاس معاہدہ ءِ ختم یا معطل کننگ کپک، آخبت نا جنگ آک دِیرآمروئی ءُ۔ نائب وزیراعظم پارے کہ پاکستان پیدوار کرے کہ دِیر ءِ توننگ نا عمل ءِ اعلان جنگ تکنگک، بھارت تون کشمیر تون اوار غٹ ویل آتیا مذاکرات کن تیار اُن۔ اوپارے کہ ویل آتا ایسری  کن مذاکرات گچین ءُ کسر اسے ہرانا سرسہبی کن سنجیدگی نا مننگ ہم المی ءِ۔ اوناپاننگ ئس کہ دنیا ءِ داسہ اسرائیل نا کسر ءِ توروئی مریک، سلامتی کونسل اٹی اصلاحات کننگے، سلامتی کونسل کشمیر و فلسطین نا جھیڑہ غاتا ایسری نا زمواری ءِ پورو کے۔