پاکستان نا صنعتی بشخ گچین مننگ ءِ، آئی ٹی و سروس آتیٹی شونداری مننگ ءِ و درملکی زرکارآک پاکستان ناکنڈآ بننگ ءُ، جام کمال خان

تہران۔ 16 ستمبر (اے پی پی) بنجائی وزیر واپار جام کمال خان پاکستان و ایران نا نیام اٹ ’’اسیجائی شونہالی نا پوسکن آ بشخ‘‘ نا بنانا پڑو ءِ کرسا پارینے کہ پاکستان نا صنعتی بشخ گچین مننگ ءِ ، آئی ٹی و سروس آتیٹی شونداری مننگ ءِ و درملکی زرکارآک پاکستان نا کنڈآ بننگ ءُ۔ داخیال آتا درشانی ءِ او پاک ایران بزنس فورم 2025 آن تران کرساکرے ۔ دا فورم تہران اٹی پاکستان۔ ایران اسیجائی اقتصادی کمیشن (JEC)نا 22 می دیوان نا وخت آ اڈ ہلک ہراٹی بھلو کچ اسے ٹی ایرانی وپاکستانی کاروباری راہشون، کمامدار و سفارتکار آک بشخ ہلکر۔ سے شنبے نادے آ تہران آن جاری پریس ریلیز نا رداٹ بنجائی وزیر واپار جام کمال خان فورم آن تران کرسا پارے کہ بزنس فورم نا داخہ بھلو کچ اسے آ اولیکو وار اڈتننگ داہیت انا درشانی ءِ کہ ہڑتوم آملک آتا سرکڑدہ و الس سنگتی ءِ پبی زرگزرانی نتیجہ غاتیٹی شاغنگ کن سنبرینگوک ءُ۔ اوہڑتوم آ کنڈآتا واپار ءِ پوسکن آ بڑزی تسکان دننگ کن چندی گام گیج آتا خاکہ پیش کرے۔ ہرافتے ٹی بینکنگ ، لاجسٹکس شپنگ، ایوی ایشن، فری زونز، ہائی اینڈ مینوفیکچرنگ ، کشت وکشار و زرکاری نا مون آ دننگ آ 17 پوسکن پروٹوکولز آ مذاکرات، بارڈر مارکیٹس و خصوصی اقتصادی زون تے فعال کننگ ءِ، تانکہ سیمی علاقہ غاتیٹی روزگار و کاروبار نا وارخواہی ودر، حکومت ءِ پاکستان نا پنچ سال انا زرگزرانی ڈٹ ’’اڑان پاکستان‘‘ نا رداٹ توانائی، معدنیات، کشت وکشار و مینوفیکچرنگ اٹی درملکی زرکاری ءِ مون آ دننگ، کسٹمز، ٹیرف و ریگولیٹری اڑاند آتا چٹفنگ کن پاکستانی و ایرانی ٹیم تا نیام اٹ خڑکی تکنیکی کمکاری اوار ءِ۔ جام کمال خان پارے کہ وزیراعظم شہباز شریف نا کماشی ٹی حکومت ءِ پاکستان ایران تون واپار و رابطہ غاتے بڑزکو انگا سٹریٹجک اولیت تسنے۔