این ڈی ایم اے مظفر گڑھ اکن 5000تمبہ تتون اوار پنجاب نا نوکاپ آن زہمی علاقہ غاتیکن پین کمکی گڑا روانہ کرے

اسلام آباد۔ 16 ستمبر (اے پی پی) نیشنل ڈیزاسٹر مینجمنٹ اتھارٹی (این ڈی ایم اے ) مظفرگڑھ اکن پین 5000تمبہ تتون اوار پنجاب نا نوکاپ آن زہمی علاقہ غاتیکن پین کمکی گڑاروانہ کرے۔ سے شنبے نادے آ این ڈی ایم اے نا کنڈآن جاری بیان نا رداٹ وزیراعظم نا خصوصی پارت آ این ڈی ایم اے نا نوکاپ آن زہمی علاقہ غاتیٹی کمکی آپریشن برجاءِ۔ این ڈی ایم اے پنجاب نا نوکاپ آن زہمی علاقہ غاتیکن پین کمکی گڑاروانہ کرے۔ این ڈی ایم اے نا کنڈآن پی ایم ڈی اے پنجاب ءِ مظفرگڑھ نا نوکاپ آن زہمی تیکن پین 5000 تمبہ فراوان کرینے۔ این ڈی ایم اے نا کنڈآن سکھر آن 8 ٹرک آتا کمک اٹ 1100 تمبہ مظفرگڑھ کن روانہ کننگا۔ جلوزئی آن ہم 16و15 ٹرک آتیا تالان اِرا قافلہ نا کمک اٹ 3900 تمبو مظفرگڑھ کن گدریفنگا۔ پنجاب ءِ داتم اسکان تروک آ 2215 ٹن کمکی گڑاتیٹی کمبل، تمبو، مچھردانی، دِیر انا فلٹریشن پلانٹ، رضائی، فولڈنگ بیڈ، دِیر انا کین تون اوار 17 کشتی اوار ءُ۔ این ڈی ایم اے نا کنڈآن پنجاب نا نوکاپ آن زہمی تیکن داتم اسکان 35000 تمبوفراوان کننگانے۔ این ڈی ایم اے غٹ تعلقدار سول و عسکری ادارہ غاتون پورو رابطہ ٹی ءِ، این ڈی ایم اے غٹ تعلقدار ادارہ غاتا کنڈآن جاری کمکی کارروائی تا ہمہ وخت چاروکی ءِ کننگ ءِ۔