وزیراعظم و قطر انا امیر نا اوڑدہی، دوحہ غا اسرائیلی جلہو قطر انا وتواجہی نا خلاف ورزی و جہانی کانود نا سنگین لتاڑءِ، محمد شہباز شریف

دوحہ ۔ 16 ستمبر (اے پی پی) وزیراعظم محمد شہباز شریف و قطر انا امیر شیخ تمیم بن حمد الثانی نا نیام اٹ اوڑدہی مس، وزیراعظم 9 ستمبر آ اسرائیل نا جلہو ءِ قطر انا وتواجہی و علاقائی سالمیت نا خلاف ورزی و جہانی کانود نا سنگین لتاڑ گوندا۔ پی ایم آفس نا میڈیا ونگ انا کنڈآن جاری بیان نا رداٹ وزیراعظم محمد شہباز شریف قطر آ اسرائیل نا ساڑی آ جلہو آن پد دوحہ ٹی بٹنگوک آ ہلہلہ ئی عرب اسلامی سروکی دیوان نا وخت آ قطر انا امیر شیخ تمیم بن حمد الثانی تون اوڑدہی کرے، نائب وزیراعظم و وزیرخارجہ سینیٹر محمد اسحاق ڈار و سلہہ بند فوج انا سروک فیلڈ مارشل سید عاصم منیر ہم اوڑدہی ٹی ساڑی ئسر۔ اوڑدہی ٹی وزیراعظم 9 ستمبر آ دوحہ نا ہنکینی علاقہ غا اسرائیلی جلہو نا پاکستان نا ترندی اٹ مذمت نا درشانی ءِ کرے ہراٹی نہادی جونک زیان مسر و چندی بندغ آک ٹھپی مسر۔ دانازرک وخت اٹی قطر اتون پاکستان نا ہرممکن مخ تفی و یکجہتی نا درشانی ءِ کرسا وزیراعظم 9 ستمبر آ اسرائیل نا جلہو ءِ قطر انا وتواجہی و علاقائی سالمیت نا خلاف ورزی و جہانی کانود نا سنگین لتاڑگوندا۔ تدوک آ ہفتہ دوحہ نا دورہ ٹی امیر قطر اتون تینا ساڑی آ اوڑدہی نا ذکر ءِ کرسا وزیراعظم پارے کہ پاکستان و قطر انا برادرانہ ، تاریخی و پائیدار تعلقداری بروک آ دے تیٹی پین سوگو مریک۔ وزیراعظم دے ٹک نیامی ٹی اسرائیل نا جارحیت ءِ دمدستی وڑاٹ توننگ و مسلم امہ نا سیوت آ زور شاغا۔ داچرجوئی ٹی او قطر انا کنڈآن دوحہ ٹی ہلہلہ ئی عرب اسلامی سروکی دیوان ءِ بٹنگ نا فیصلہ نا ہم ستاءِ کرے۔ وزیراعظم پارے کہ قطر انا خواست آ پاکستان دے ٹک نیامی نا بگڑینگوک آ حالیت آتیا گپ وتران کن اقوام متحدہ نا سلامتی کونسل نا ہلہلہ ئی دیوان ءِ بٹنگ نا خواست کریسس۔ امیر قطر ہلہلہ ئی عرب اسلامی سروکی دیوان اٹی وزیراعظم نا بشخ ہلنگ تون اوار اوار دا مشکل وخت اٹی قطر اتون یکجہتی نا درشانی کن 12 ستمبر آ دوحہ نا دورہ نا ستاءِ کرے۔ ہڑتوم آ راہشونک ڈیہہ انا مون آ بروک حالیت آتا رداٹ خڑکی رابطہ ٹی مننگ آ امنا کریر۔