مزن وزیر محمد شہباز شریف ءَ اسرائیل ءِ زوراکی ءِ ھلاپ ءَ گتر ءِ گوما سرجمیں یکوئی ءِ درشانی کتگ، انسانیت ءِ ھلاپ ءَ جنگی جرائم ءِ ھلاپ ءَ اسرائیل ءَ را احتساب کنگ ءُ اسرائیل ءِ توسیپ پسندیں جزم ءِ ناکام کنگ ءِ ھاترا عرب اسلامی ٹاسک فورس ءِ جوڑ کنگ ءِ شور ءُ سلاہ پیش کتگ

دوحہ۔15ستمبر  (اے پی پی):مزن وزیر محمد شہباز شریف ءَ اسرائیل ءِ زوراکی ءِ ھلاپ ءَ گتر ءِ گوما سرجمیں یکوئی ءِ درشان کنان ءَ ءُ انسانیت ءِ ھلاپ ءَ جنگی جرم آنی سر ءَ اسرائیل ءَ را احتساب کنگ ءُ اسرائیل ءِ توسیع پسند جزم ءَ را ناکام کنگ ءِ ھاترا عرب اسلامی ٹاسک فورس ءِ جوڑ کنگ ءِ شور ءُ سلاہ پیش کنان ءَ گوشت کہ انسانیت ءَ را غزہ ءَ گروہ اِنت۔ زوتیں جنگ بندی ءِ ھمراھی ءَ انسانی ھمدردی ءِ بنیاد ءَ زند ءِ المی ئیں لوٹ آنی ضمانت ءُ ایمنیں آسراتی ءِ آسراتی دیگ بہ بیت۔ کمکی کارندہ، میڈیکل ٹیم، اھوالکار ءُ اقوام متحدہ ءِ کارندہ آناں رسائی دیگ بہ بیت۔ ما اقوام متحدہ ءِ تہا اسرائیل ءِ باسک بوھگ ءِ معطل کنگ ءِ شور ءُ سلاہ ءِ حمایت کنیں۔ مارا یک انصاف ءُ پائیداریں دو ریاستی حل ءِ ضلورت انت کہ ایشی ءِ چیر دستی ءَ یک آجوئیں فلسطینی ریاستے جوڑ کنگ بہ بیت کہ آئی ءِ دارالحکومت القدس الشریف بہ بیت۔ ما چہ اجتماعی عقل ءَ کش اِتگ اگاں ما کارروائی مہ کنیں گڑا راجدپتر مارا معاف نہ کنت۔ آ دوشمبے ءِ روچ ءَ دوحہ ءَ برجم داشتگیں ایمرجنسی عرب اسلامی سروک دیوان ءَ گوں گشتانک کنگ ءَ ات۔ سروکیں دیوان ءَ پنجاہ ءَ چہ گیش عرب ءُ اسلامی ملک آنی سروک ءُ نمائندگاں بہر زرتگ۔ مزن وزیر ءَ گوشت کہ مرچی ما دگہ یک غمناکیں وئیل ءِ درگت ءَ یکجا بوتگ آں ۔ براتیں اسلامی ملک گتر ءَ را یک انچیں زوراکیں ملکے ءِ نشانگ جوڑ کنگ بوتگ کہ آ میان استمانی کانودانی خلاف ورزی ءَ کنت ءُ ایشی ءِ آسراں پرواہ نہ کنت۔ پاکستان 9 ستمبر ءَ دوحہ ءِ سر ءَ اسرائیل ءِ زھرناکیں ءُ بے سوبیں اُرش ءِ سک باز مذمت کنت کہ ایشی ءِ مول ءُ مراد میاں اوستمانی تک ءَ امن ءِ کوشست آنی تہ ءَ ھرابکاری کنگ بوتگ۔ اسرائیل ءِ تجاوز گتر ءِ حاکمیت ءُ دمگی ایمنی ءِ سرا ھاسیں نقض اِنت۔ پاکستان گتر ءِ برات ءُ گہار آں گوں سرجمیں یکوئی ءُ کمک ءِ درشان ءَ کنت۔ مزن وزیر ءَ گوشت کہ گتر ءِ سر ءَ اسرائیل ءِ اُرش زوراکیں کارروائی آنی برجاہ اِنت۔ جنگ ءِ وھد ءَ ھم میانجی ءِ کرد ءَ پیلو کنوکیں مردمانی ارزشت دیگ بیت ءُ آھاں مزنیں ارزشتے دیگ بیت پرچا کہ آ امن ءِ اُمیت اَنت، ھما اُمیت کہ گپ ءُ تران ءَ زندگ دار اِیت دانکہ امن ءِ نیمگ ءَ دیمروئی بوت کنت۔ آئی ءَ گوشت کہ گتر ءِ سر ءَ اے زوراکی ءَ پد اے جُست پِر اِنت کہ اسرائیل ءَ پرچا گپ ءُ تران ءِ ڈرامہ کُتگ، آیا یرغمال آنی پدا آرگ یک انچیں ملکے ءِ واستہ اولی ترجی اِنت کہ آ انسانی جان ءِ احترام ءَ نہ کنت ءُ اسرائیل ءِ میان اُستمانی کانود آنی رد کنگ مذمت ءِ لائک اِنت۔ آئی ءَ گوشت کہ ما گتر ءِ امیر شیخ تمیم بن حمد التھانی ءِ سروکی ءَ گتر ءِ مخلص ءُ بے مٹیں کوشست آناں شگر ءُ منت وار ایں، ءُ چیلنج آنی باوجود گتر ءَ مدام دمگی ءُ جھان ءِ امن ءِ واستہ سرجمیں کرد پیلو کتگ۔ آئی ءَ گوشت کہ غزہ ءَ انسانیت گریوگ ءَ اِنت، بے گناھیں زالبول ءُ زھگ آنی آہ ءُ زاری ھر نیمگ ءَ گوشدارگ بوھگ ءَ اِنت، اسرائیل ءِ نسل کشی ءِ پالیسی ءَ غزہ ھلاس کتگ، اسرائیل ءِ بربریت ءِ ھلاسی ءِ واستہ دگنیا وتی کرد ءَ پیلو بہ کنت، غزہ ءَ ناانصافی وتی اوج ءَ سر بوتگ، ایشی ءَ را زوت بند کنگ لوٹ ایت۔ مزن وزیر ئَ گوشت کہ پاکستان اے جاور ھال ئِ تہ ئَ ترندی ئُُ المی ئیں گامگیج کنگ ئِ ضلورت ئِ پدا زور دیان اِنت۔ اسرائیل ءَ انسانیت ءِ ھلاپ ءَ جنگی جرائم ءِ احتساب کنگ بہ بیت۔ یک عرب اسلامی ٹاسک فورس ءِ جوڑ کنگ بہ بیت کہ آ اسرائیل ءِ توسیپ پسندیں جزم ءِ ناکام کنگ ءِ ھاترا موثریں گامگیج بہ زوریت۔ ما او آئی سی ءِ اقوام متحدہ ءِ تہا اسرائیل ءِ باسک بوھگ ءِ معطل کنگ ءِ لوٹ ءِ حمایت کنیں۔ باسکیں ملک اسرائیل ءِ ھلاپ ءَ دگہ ھکّی گامگیج زورگ ءِ سر ءَ سرگرمیں رنگ ءَ ھیال ءُ لیکہ بہ کن اَنت۔ اقوام متحدہ ءِ سلامتی کونسل اقوام متحدہ ءِ منشور ءِ باب 7 ءِ رد ءَ اسرائیل ءَ چہ زوت ءُ دائمی جنگ بندی ءِ لوٹ بہ کنت، یرغمالانی یلہ کنگ ءُ فلسطینی زندانیانی بدل کنگ ءِ لوٹ بہ کنت۔ ضمانت، ایمن ءُ برجمیں انسانی کمک ءِ رسائی ءِ ھاتر ءَ المی ئیں لوٹ ءُ گزر، کمکی کارندہ، طبی ٹیم ءُ اھوالکار ءُ اقوام متحدہ ءِ کارندہ آناں رسائی دیگ بہ بیت۔مزن وزیر ءَ گوشت کہ درستاں چہ گیش مارا یک انصاف ءُ پائیداریں دو ریاستی گیواری ءِ ضلورت اِنت کہ ایشی ءِ چیر دستی ءَ 1967 ءَ چہ پیسر ءِ سیم سر آنی رد ءَ یک آزاتیں فلسطین ءِ ریاست جوڑ کنگ بہ بیت، ایشی ءِ دارالحکومت القدس الشریف بہ بیت۔ مزن وزیر ئَ گوشت کہ مرچی یک راجدپتری گند ئُُ نند ئِ وسیلگ ئَ ما یکجائی ئَ اسرائیل ئِ زوراکی ئِ مذمت کناں۔ اگاں ما گوں اجتماعی عقل ءُ زانت ءَ گامگیج مہ زوریں گڑا راجدپتر مارا معاف نہ کنت۔ ایشی ءَ چہ پیسر گتر ءِ امیر شیخ تمیم بن حمد الثانی ءَ سروک دیوان ءِ بہر زوروکاں وش آتک کت ءُ گوشت کہ دیوان ءَ بہر زوروکیں اسلامی ملک آنی سروک آناں دوحہ ءَ وش آتک کناں۔ آئی ءَ گوشت کہ اسرائیل ءِ دست ءَ فلسطینی نسل کشی ءِ آماچ بوھگ ءَ انت، اسرائیل ءَ انسانیت ءِ ھلاپ ءَ جرم آنی تہ ءَ ھمک حد ءَ چہ چہ دیم ءَ شتگ۔ آئی ءَ اسرائیل ءِ اُرش ءَ را گتر ءِ حاکمیت ءُ سرزمین ءِ یکوئی ءِ ھلاپ ورزی لیک اِتگ ءُ گوشتگ کہ گتر ءَ میانجی ءِ بستار ءَ دمگ ءَ امن ءِ ھاترا دل ءِ جہلانکی ءَ کوشست کتگ ءُ اسرائیل ءَ گپ ءُ تران ءِ عمل ءَ را سبوتاژ کتگ ءُ فلسطینی تحریک ءِ باسکاں نشانگ جوڑ کتگ۔ آئی ءَ گوشت کہ یرغمال آناں پرامنیں رنگ ءَ یلہ کنگ ءِ اسرائیل ءِ سرجمیں دعویٰ دروگ اَنت، مزنیں اسرائیل ءِ ایجنڈا جھان ءِ امن ءِ واستہ مزنیں ھترہ اِنت۔ آئی ءَ اسرائیل ءِ دمگ ءِ ملکانی حاکمیت ءِ لگتمالی ءِ مذمت کتگ ءُ گشتگ کہ صیہونی رژیم ءَ انسانیت ءِ ھلاپ ءَ جرم کتگ، اسرائیل ءِ میاں اوستمانی کانود ءِ سنگینیں لگتمالی جیڑہ ءِ سبب اِنت، میاں اوستمانی تک ءَ امن ءِ ھاترا فلسطین ءِ جیڈھ ءَ را گیش ءُ گیوار کنگ المی اِنت ءُ اسرائیل ءِ امن ءِ ھلاپ ءَ زوراکی ءُ امن پسندیں پالیسی ءِ سرا زھرشانی کنگ لوٹیت۔ آئی ءَ امیت سہرا کت کہ گند ءُ نند ءَ جاور ھال آنی سر ءَ ٹھوس پیسلہ کنگ بنت۔ او آئی سی ءِ سیکرٹری جنرل حسین ابراہیم طہا ءَ گتر ءِ ہنگامی سروک دیوان ءِ دعوت دیگ ءِ پیسلہ ءِ توسیپ کتگ ءُ گشتگ کہ اسرائیل ءِ بربریت ءُ ظلم ءُ زوراکی ءَ چہ درستیں حد ءُ سیمسراں چہ دیم ءَ شتگ ءُ اسرائیل ءِ دمگ ءِ ملکاں نشانگ جوڑ کنگ سک باز جیڑہ ءِ سبب انت۔ آئی ءَ گتر ءِ سر ءَ اسرائیل ءِ اُرش ءِ سک باز مذمت کتگ ءُ گوشت کہ اقوام متحدہ ءِ قرارداد آنی رد ءَ فلسطین ءِ جیڈھ ءِ گیواری ناگزیر اِنت۔ آئی ءَ غزہ ءَ کمک ءِ بے رک ءُ زوت سر کنگ ءِ ضلورت ءِ سر ءَ زور پر دات ءُ گوشت کہ اسرائیل ءِ نیمگ ءَ چہ گریبی ءَ را سلاہ ءِ رنگ ءَ کارمرد کنگ یک نفرت انگیزیں کارے ۔ دیوان ءَ گوں تران کنان ءَ عرب لیگ ءِ سیکرٹری جنرل احمد ابو الغیز ءَ گوشت کہ ما ھما وھد ءَ یکجاہ بوتگیں کہ دمگ ءَ را مزنیں چیلنج آنی دیم ءَ انت، اسرائیلی ناشرکاری ءَ جاور ھال گیش پیچیدہ کتگ انت، غزہ ءَ انسانی نسل کشی برجاہ انت، ایشی ءِ ھلاپ ءَ مئے درستانی ذمہ واری انت کہ ما وتی توار ءَ چست بہ کن ایں، اسرائیل ءِ میاں اوستمانی رھشونی انت۔ کمیونٹی ءَ اسرائیل ءَ را احتساب کنگ لوٹیت۔ اسرائیل ءِ زوراکی ءِ مذمت کنان ءَ عراق ءِ مزن وزیر محمد شیعہ السودانی ءَ گوشت کہ اے اُرش ءَ دمگ ءِ جیڈھ گیش کتگ اَنت، اسرائیل ءِ میاں اوستمانی کانود آنی ھلاپ ورزی ءِ سر ءَ میاں اوستمانی براتی ءِ چپ ءُ چاگرد ءِ ھاموشی بامرد اِنت، گتر ءِ سر ءَ اُرش ءَ پد محض زبانی مذمت کار نہ کنت،  فلسطینیاں وتی جائز ءُ قانونی حق دیگ بہ بنت۔ اردن ءِ شاہ عبداللہ دوم ءَ گتر ءِ حکومت ءُ مہلوک ءِ گوما یکوئی ءِ درشانی کتگ ءُ گشتگ کہ اسرائیل ءِ اُرش ءَ دمگ ءِ جاور گیش پیچیدہ کتگ انت۔ مصر ءِ صدر عبدالفتاح السیسی ءَ ھم گتر ءِ سرکار ءُ الس ءَ گوں یکوئی ءِ درشانی کتگ ءُ اے اُرش ءَ را اقوام متحدہ ءِ منشور ءِ ھلاپ ءُ عرب ءُ مسلمانیں ملکانی واستہ ھترہ لیک اِتگ۔ آئی ءَ اے اُرش ءَ را بے جاہ لیک اِتگ ءُ گْوشتگ کہ اسرائیل ءَ چہ لال لیکہ ءَ چہ دیم ءَ شتگ۔ آئی ءَ گوشت کہ اے اُرش ءَ چہ غزہ ءَ جنگ بندی ءِ موہ گار بوتگ، ءُ اسرائیل ءِ زوراکیں کارروائی آناں ھچ وڑ ءَ ھلاس کنگ نہ بیت۔ ترکی ءِ صدر رجب طیب اردوان ءَ دیوان ءَ گوں تران کنان ءَ گوشت کہ عرب ءُ مسلمانیں ملکاں گوں گتر ءَ سرجمیں یکوئی ءِ درشانی کتگ، غزہ ءَ انسانی نسل کشی بے رکّی ءَ برجاہ اِنت ءُ اسرائیل ءِ توسیع پسندی ءِ جزم میاں اوستمانی ءُ دگنیا ءِ امن ءِ واستہ ھترہ اَنت۔ آئی ءَ اسرائیل ءِ سر ءَ گرانیں پابندیاں جنئگ ءِ سوج داتگ ءُ مسلمان ملک آنی نیام ءَ یکوئی ءِ سر ءَ زور پر داتگ۔ دیوان ءَ گوں گشتانک دیان ءَ فلسطین ءِ صدر محمود عباس ءَ گوشت کہ فلسطینی نسل کشی ءِ دارگ ءُ ترندیں کمک پجارینگ المی اِنت، ءُ 1967ءِ سیمسر آنی رد ءَ فلسطینی ریاست ءِ جوڑ کنگ امن ءِ یکیں راہ اِنت۔ آئی ءَ گوشت کہ اسرائیل ءِ جنگی جرم آنی تہ ءَ ھرچ حد ءُ سیمسر ءِ سر ءَ چہ دیم ءَ شتگ ءُ اسرائیل ءِ زوراکی ءِ گر ءُ دار ءِ واستہ عملی گامگیج آنی ضلورت اِنت۔ تاجکستان ءِ صدر ایموملی رحمون ءَ گشتگ کہ زوراکی جیڑہانی گیواری نہ انت، ما گپ ءُ تران ءِ وسیلہ ءَ دیم ءَ جت کناں۔ آئی ءَ گوشت کہ غزہ ءَ دو سال ءِ بربریت میاں اوستمانی براتی ءِ ضمیر ءِ سر ءَ جُست ءِ نشان اِنت۔ مالدیپ ءِ صدر محمد موئیزو ءَ گشتگ کہ دوحہ ءِ سرا اُرش گتر ءِ حاکمیت ءِ خلاف ورزی انت، گتر ءَ مدام امن ءِ ھاتر ءَ جوانیں کرد پیلو کتگ۔ موریتانیا ءِ صدر محمد اولد چیخ غزنی ءَ گشتگ کہ آ گتر ءِ امیر ءِ نیمگ ءَ چہ دعوت داتگیں دیوان ءِ منت وار انت ءُگتر ءِ سرا اسرائیل ءِ زوراکی ءِ مذمت کتگ ءُ اسرائیل ءِ ناجائزیں کارروائی امن ءِ ھاتر ءَ خطرہ انت۔ سومالیہ ءِ صدر حسن شیخ محمود ءَ گشتگ کہ اسرائیل ءَ گتر ءِ سرا اُرش کنان ءَ میاں اوستمانی کانود ءَ را سک باز خلاف ورزی کتگ۔ اسرائیل ءِ تجاوزات دمگ ءِ امن ءُ ایمنی ءِ ھاترا مزنیں ھترہ یے ۔ غزہ ءَ زوت بے شرطیں جنگ بندی المی انت۔ کوموروس ءِ صدر ءَ گوشت کہ ما گتر ءِ گوما سرجمیں یکوئی ءِ درشان کن ایں ۔ شام ءِ صدر احمد الشارح ءَ گشتگ کہ گتر ءِ سرا اسرائیل ءِ زوراکی مذمت انت۔ کویت ءِ ولی عہد شیخ صباح الخالد ءَ گوشت کہ ما گتر ءِ گوما اوشتاتگ آں ءُ اسرائیل ءِ زوراکی ءِ ھلاپ ءَ یکوئی ءِ درشان کنگ ءَ ایں ۔ اسرائیل ءَ اُرش کنان ءَ گتر ءِ حاکمیت ءِ سکیں مزنیں تاوانے کتگ۔ اے دیوان ءَ دگہ عرب ءُ اسلامی ملکانی سروکاں ھم گشتانک داتگ۔