صدر آصف علی زرداری ءَ شنگھائی الیکٹرک ءِ چیئرمین وو لی ءَ گوں گند ءُ نند کتگ، تھر ءَ کوئلہ ءِ گیسیفیکیشن پلانٹ ءِ جوڑ کنگ ءِ ھاتر ءَ تپاک نامہ ءِ سر ءَ دستخط

شنگھائی ۔15ستمبر  (اے پی پی): صدر آصف علی زرداری ءَ شنگھائی الیکٹرک ءِ چیئرمین وو لی ءَ گوں گند ءُ نند کتگ ءُ ایشی ءَ پد شنگھائی ءَ کمپنی ءِ آسراتی آنی تر ءُ تاب کتگ۔ آئی ءِ ھمراھی ءَ بانُک اول بی بی آصفہ بھٹو زرداری، پاکستان پیپلز پارٹی ءِ چیئرمین بلاول بھٹو زرداری ءُ سینیٹر  سلیم مندوی والا ھم آئی ءِ ھمبراہ انت۔   ایوان ءِ  صدر ءِ پریس ونگ ءِ نیمگ ءَ جاڑی بوتگیں بیان ءِ رد ءَ شنگھائی الیکٹرک ءِ چیئرمین ءَ پاکستان ءَ کمپنی ءِ منصوبگ آنی بابت ءَ مختصر بریفنگ داتگ ایشی ءِ تہ ءَ تھر کوئلہ، ای ایم ای انرجی ءُ کوئلہ ءِ سر ءَ کار کنوکیں بجلی گس ھوار اَنت۔ صدر ءِ مملکت ءَ پاکستان ءِ توان ءِ ضلورت آناں پیلو کنگ ءَ شنگھائی الیکٹرک ءِ کرد ءَ را ساڑات ءُ گوشت کہ شنگھائی الیکٹرک ءَ روزگار ءِ پیداک کنگ ءُ چاگردی ءُ اقتصادی دیمروئی ءَ مزنیں کردے پیلو کتگ۔ صدر ءِ مملکت ءَ شنگھائی الیکٹرک ءَ را پاکستان ءِ ٹرانسمیشن ءُ ڈسٹری بیوشن سسٹم ءِ تہ ءَ سرمایہ کاری ءِ دعوت دات ءُ دل یکیمی کت کہ اگاں ھچ وڑیں زیر التوا جیڈھ دیم ءَ اتک گڈا آ دوستی ءُ وت مہ وتی کمک ءِ جذبہ ءَ گوں گیواری کنگ بنت۔ شنگھائی الیکٹرک ءِ سی ای او ءَ پاکستان ءَ وتی کارندہ آنی واستہ سیکورٹی بندوبست ءِ سر ءَ حکومت ءِ شگر ءُ منت گپت۔ صدر ءِ مملکت ءَ گیش دل یکیمی دات کہ پاکستانی حکومت سیکورٹی ءِ گامگیج آناں گیش مھکم کنت تانکہ چینی کارکن آنی واستہ ایمن ءُ سازگاریں چاگرد جوڑ کنگ بہ بیت۔ صدر ءِ مملکت ءَ را بریفنگ دیگ بوت کہ شنگھائی الیکٹرک 1902 ءَ جوڑ کنگ بوتگ ءُ توانائی ءُ صنعتی شوبگ ءَ جھان ءِ بستار ءَ دار ایت۔ تھر ءَ کوئلہ گیسیفیکیشن پلانٹ ءِ جوڑ کنگ ءِ واستہ اے موہ ءَ تپاک نامہ ءِ سر ءَ ھم دستخط کنگ بوت۔ اے تھر کوئلہ ءِ سر ءَ بنیات ءِ سر ءَ کوئلہ ءِ گیسیفیکیشن ءُ کھاد ءِ اولی منصوبگ بیت کہ ایشی ءَ چہ توانائی ءِ ضلورت آناں پیلو کنگ بیت ءُ کشت ءُ کشاری شوبگ ءَ را ھم کمک رسیت۔ ایم ایف ٹی سی کوئلہ گیسیفیکیشن ءِ سروک شاہد توالہ ءُ سنوم سندھ ریسورسز / شنگھائی الیکٹرک ءِ سروک لین جیگن ءَ تپاک نامہ ءِ سر ءَ دستخط کتگ۔ اے موہ ءِ سر ءَ بی بی آصفہ بھٹو زرداری اور چیئرمین پیپلز پارٹی بلاول بھٹو زرداری  صدر ءِ ھمبراہ انت،    سینیٹر سلیم مانڈوی والا، وزیر اطلاعات و ٹرانسپورٹ سندھ شرجیل میمن اور وزیر منصوبہ بندی و توانائی سندھ سید ناصر شاہ ءَ ابید چین ءُ  پاکستان ءِ سفیر ھم ساڑی اتنت۔