مزن وزیر محمد شہباز شریف گتر  ءِ بنجاہی شہر دوحہ ءَ   روادگ

اسلام آباد۔15ستمبر  (اے پی پی): مزن وزیر محمد شہباز شریف یک روچی سرکاری تر ءُ تاب ءِ واستہ گتر  ءِ بنجاہی شہر دوحہ ءَ شتگ۔ مزن وزیر کارگس ءِ میڈیا ونگ ءِ نیمگ ءَ چہ جاڑی بوتگیں بیان ءِ رد ءَ مزن وزیر محمد شہباز شریف دوحہ ءَ برجم دارگ بوھوکیں ایمرجنسی عرب اسلامی سروک دیوان ءَ بھر زوری کنت۔ اے سروک دیوان دوحہ ءِ سر ءَ اسرائیل ءِ بالی اُرش ءُ فلسطین ءَ انسانی ھکانی لگتمالی ءِ مدام ھراب بوھگ ءِ جاور ھال ءِ رد ءَ برجم دارگ بیت۔ نائب مزن وزیر ءُ درئی کارانی وزیر محمد اسحاق دار، وزیر دفاع خواجہ محمد آصف، وفاقی وزیر ءِ اھوالکاری عطا اللہ تارڑ ءُ ھاسیں کمکار صدب طارق فاطمی مزن وزیر ءِ مزن تک ءِ ڈل ءِ بھر اَنت۔ دیوان ءَ او آئی سی ءِ باسکیں ملک آنی سروک ءُ مزن مزنیں کارندہ آنی بھر زوری ءِ گمان اِنت۔  بیان ءِ تہ  ءَ گوشگ بوت  کہ پاکستان گتر  ءِ گوما وتی سیادی ءَ را سک باز ارزشت دنت ءُ گتر  ءُ ایندگہ دمگی ملکانی سر ءَ اسرائیل ءِ زوراکی ءَ را تچکیں رنگ ءَ ایر جنت۔ گتر  ءِ گوما یکوئی ءُ دمگی یکوئی ءِ درشان کنگ ءِ ھاترا مزن وزیر محمد شہباز شریف ءَ 11ستمبر 2025 ءَ دوحہ ءِ تر ءُ تاب کتگ ءُ گتر  ءِ سروکی ءَ گوں گند ءُ نند کتگ ءُ گتر  ءِ ایمنی ءُ وت واجہی ءِ واستہ پاکستان ءِ بے دروریں حمایت ءُ میاں اوستمانی تک ءَ امن ءُ ایمنی ءِ واستہ وتی عزم ءِ درشان کتگ۔ مرچی دوحہ ءَ برجم دارگ بوؤکیں ہنگامی دیوان ءَ پاکستان ءِ مزن وزیر ءُ دگہ مسلمانیں ملکانی سروک آنی بہر زورگ مسلمان امت ءِ مھکمیں یکوئی ءُ دمگی امن ءِ برجائی ءِ بے مٹیں عزم ءِ درشان اِنت۔