بنجائی وزیر واپار جام کمال خان و ایران نا وزیر شاہرات و شاری شونداری فرزانہ صادق پاک ایران اسیجائی اقتصادی کمیشن نا 22 می دیوان نا بناءِ کریر

تہران۔ 15 ستمبر(اے پی پی) بنجائی وزیر واپار جام کمال خان و ایران نا وزیر شاہرات و شاری شونداری فرزانہ صادق دوشنبے نادے آ تہران اٹی پاک ایران اسیجائی اقتصادی کمیشن نا 22 می دیوان نا باضابطہ بناءِ کریر۔ دوشنبے نادے آ جاری بیان نا رداٹ بنائی تران اٹی جام کمال خان پارے کہ پاکستان ایران تون تینا تعلقداری تے بے کچ اہمیت ایتک و واپار وزرکاری ننا واپاری پالیسی نا بنداوی جزو ءِ۔ اوپارے کہ نجی بشخ و چیمبرز آف کامرس واپاری کچ ءِ ودفنگ اٹ اہم کڑد ادا کیر، حکومت ایران تون کاروبار کننگ اٹ ہرممکن آسراتی فراوان کننگ کن سنبرینگوک ءِ۔ بنجائی وزیر پارے کہ خذمت ، کشت وکشار، لائیو اسٹاک، سائنسی پٹ وپول و فوڈ سیکورٹی کون آ بشخ آتیٹی کمکاری مچ آڈیہہ اکن فائدہ مند مریک۔ اومستی پارے کہ سڑک، ریل ، بحری و فضائی رابطہ غاتا کمک اٹ ڈیہہ اٹی زرگزرانی سرجز و روزگار نا وارخواہیک ودرہ و دا ڈٹ نیامی ایشیا، سویلی ایشیا و دے ٹک نیامی کن گیٹ وے اس جوڑمریک۔ ایرانی وزیر فرزانہ صادق پارے کہ دا سیشن تا نتیجہ غاک آخبت کن پیدوار روڈ میپ اس ایترہ و فالو اپ گام گیج آن عملی نتیجہ دوئی مریک۔ اوکاروبار اٹی آسانی، ویزہ آسودہی، بارڈر مارکیٹ و بینکنگ نا بشخ اٹی گام گیج آتا گرج آتا ہم زور شاغا۔ ہڑتوم آ وزیرآک دیوان نا کماشی ءِ کرسا پاریر کہ ساڑی حالیت آتیٹی دِیر انا بست وبند ، قدرتی آفت آتون مون تننگ و چاگڑدی بدلی نا بشخ آتیٹی اسہ ایلو نا آزموندہ غاتیان فائدہ ہرفنگ مریک۔