بنجائی وزیر واپار جام کمال خان نا ایرانی وزیر سید محمد اتابک تون اوڑدہی، آجو واپاری معاہدہ غا دستخط، سیمی منڈی تے فعال کننگ و واپار نامون آ دننگ آ گپ وتران

تہران۔ 15 ستمبر (اے پی پی) بنجائی وزیر واپار جام کمال خان تون ایران نا وزیر صنعت، کانڑکنی و واپار سید محمد اتابک اوڑدہی کرے۔ دوشنبے نادے آجاری پریس ریلیز نا رداٹ او اوڑدہی ٹی نوکاپ آن زہمی خاہوت آتون ہڑزخواہی و ہمدردی نا درشانی ءِ کرے ہراڑآ بنجائی وزیر اونا منت واری ءِ ہرفے۔ جام کمال پارے کہ ایرانی صدر ڈاکٹر پیزشکیان نا دورہ پاکستان آن پد آن ننا ہڑتوم آ کنڈآتا واپار اٹی بھاز گچینی بسنے ، ننا 10 ارب ڈالر نا واپاری ہدف ننا تین پہ تینی کوشست آتیان دوئی کننگ مریک۔ ایرانی صدر نا دورہ ءِ پاکستان نا ذکر ءِ کرسا اومستی پارے کہ داپاکستان آ ایران نا حکومت نا پت انا شاہدی ءِ۔ او مستی پارے کہ ہڑتوم آ کنڈآتا پدریسہ دورہ ننا واپاری ہدف ءِ دوئی کننگ کن ننا ترقی پسندانہ سوچ ءِ ظاہر کیک۔ اوپارے کہ اسیجائی اقتصادی کمیشن نا مروک آ دیوان اٹی واپاری سرجزآتے آسان کننگ کن مون آ بروک اڑاند آتے مر کننگ نا وڑوڈول اس جوڑ کننگک۔ اوپارے کہ ننا واپاری حساب وکتاب 3 ارب ڈالر اسکان سرمسنے ہرا کہ بھاز ستاکڑزک ولے داٹی پین ودکی نا گرج ءِ۔ اوڑدہی ٹی ہڑتوم آ وزیر آک بارٹریڈنا گرج آ زور شاغار۔ اوڑدہی ٹی آجوواپاری معاہدہ غا دستخط ، سیمی منڈی تے فعال و واپار ءِ ودفنگ کن گپ وتران کننگا۔ بنجائی وزیر پارے کہ ہڑتوم آ فریق اسہ ایلو تون شریداری نا کروک آ گڑاتا فہرست ءِ گڈیکو دروشم اسے آ کاریم کننگ ءُ۔ جام کمال پارے کہ وزیراعظم شہباز شریف نا وژن نا رداٹ واپاری کچ ءِ ودفنگ کن نجی بشخ ءِ آسراتی فراوان کننگ انگ ءِ۔ ساڑی آ تُوتیٹی ایران ءِ پاکستانی برنج و سُو انا برآمد اٹی نمان ودکی مون آ بسنے۔