مہنگائی ءِ تہ ءَ مصنوعی گیشی ءِ گر ءُ دار ءِ واستہ انتظامی گامگیج آنی وسیلگ ءَ ذخیرہ کاری ءَ را کنٹرول کنگ بیت، سینیٹر محمد اورنگزیب

اسلام آباد۔14ستمبر  (اے پی پی):  وفاقی وزیر خزانہ ءُ آمدنی سینیٹر محمد اورنگزیب ءَ گوشت کہ ذخیرہ کاری ءُ ناجائزیں منافع ءِ اجازت نہ دیگ بیت، ذخیرہ کاری ءَ را انتظامی گامگیج آنی وسیلگ ءَ کنٹرول کنگ بیت تانکہ افراط زر ءِ تہ ءَ مصنوعی گیشی ءِ گر ءُ دار کنگ بیت، سیلاب ءِ آماچیں مردم آنی زوتیں بحالی ءَ را دل یکیمی کنگ بیت، ملک ءَ را دیم ءَ برگ بیت۔ ءُ درملکی سرمایہ کاری آھگ ءَ اِنت، تاجر ءُ سرمایہ کار آنی آسراتی ءِ ھاتر ءَ اولیت اِنت۔ یک شمبے ءِ روچ ءَ کمالیا ءَ سیلاب ءَ چہ آماچیں دمگ آنی تر ءُ تاب ءِ موہ ءَ میڈیا ءَ گوں تران کنان ءَ وزیر ءِ ھزانگ ءَ گوشت کہ مزن وزیر ءِ ہدایت ءِ رد ءَ کابینہ ءَ دو ایمرجنسی ءِ جار جتگ، ایشی ءِ تہ ءَ موسمیاتی ایمرجنسی ءُ کشت ءُ کشار ءِ ایمرجنسی ھوار انت۔ ایمرجنسی ءِ تہا ہرچی کنگ لوٹیت آ پہ سرجمیں ملک ءَ کن انت۔ آئی ءَ گوشت کہ مارا نوں دیم ءَ روگی اِنت، وتی ذمہ واری ءِ سرپد بوھگ ءَ ضلعی انتظامیہ ءَ دست کپتگیں وسیلگ آناں جوانیں رنگ ءَ کارمرد کنان ءَ سیلاب ءِ آماچیں مردم آناں رکینتگ۔ وزیر ءِ ھزانگ ءَ گوشت کہ جیڈھ آناں ھلاسی ءِ واستہ ڈھانچہ ءِ گامگیج آنی منصوبگ بندی کنگ بوھگ ءَ انت۔ موسمی مٹ ءُ بدلی ءَ چہ ھم جیڈھ ودی بوتگ انت بلے لھتیں جیڈھ انسان ءِ جوڑ کتگیں جیڈھ انت مارا چارگی انت کہ کجا کشت ءُ کشار کنگ بہ بیت ءُ کجا چاگرد جوڑ کنگ بہ بنت۔ سینیٹر محمد اورنگزیب ءَ گیش گوشت کہ اے درستیں گامگیج آنی منصوبگ بندی ءِ واستہ وھد ءِ ضلورت اِنت۔ اے مشکل ءِ ساھت ءَ مئے واستہ بازیں سبق ءُ سبق پوشیدہ اَنت۔ موسمیاتی بدلی ءِ وفاقی وزیر 300 روچ ءِ واستہ تیار کتگیں منصوبگ ءِ سر ءَ کار کنگ ءَ اِنت ءُ ایشی ءَ را صوبہ آنی گوما شور ءُ سلاھ ءَ گوں گڈی رنگ دیگ بیت پرچا کہ ایشی ءَ را صوبہ آنی نیمگ ءَ چہ عمل کنگ لوٹ ایت۔ زرعی شوبگ ءِ ھوالگ ءَ جست ءِ پسو ءَ وزیر ءِ ھزانگ ءَ گوشت کہ بنجاہی، صوبائی ءُ وفاقی حکومت، اسٹیٹ بینک آف پاکستان ءُ ایندگر بینک ڈیٹا یکجا کنگ ءَ انت۔ آئی ءَ گوشت کہ آپ ءِ کم بوھگ ءَ پد زرعی شوبگ ءَ را تاوان ءِ اندازہ دہ ءَ چہ دوازدھیں روچ آنی تہ ءَ کنگ بیت، ایشی ءِ بنیات ءَ ما سرجمیں اسٹیک ہولڈر آنی گوما یکجائی ءَ دیم ءَ جنزاں۔