صدر آصف علی زرداری ءَ چین ءِ ایوی ایشن انڈسٹری کارپوریشن ءِ بالی گراب ءِ کمپلیکس ءِ تر ءُ تاب کتگ

بیجنگ۔14ستمبر  (اے پی پی):  صدر آصف علی زرداری ءَ چین ءِ ایوی ایشن انڈسٹری کارپوریشن ءِ ائیر کرافٹ کمپلیکس ءِ تر ءُ تاب کتگ کہ اودا جے 10 سی جنگی جہاز جوڑ کنگ بنت۔ یک شمبے ءِ روچ ءَ صدر گس ءِ پریس ونگ ءِ نیمگ ءَ جاڑی بوتگیں بیان ءِ رد ءَ صدر ءَ سلاہ بندیں اُرد ءِ سپریم کمانڈر ءِ بستار ءَ کمپلیکس ءِ تر ءُ تاب کتگ ءُ جتاجتائیں محکمہ آنی چار ءُ تپاسی کتگ۔ صدر آصف علی زرداری ءَ را جے 10، جے ایف 17 ءُ جے 20 چوری جنگی بالی گراب آنی ھواری ءَ ڈرون، آٹومیٹک یونٹ ءُ ملٹی ڈومین آپریشن ءِ ھوالگ ءَ سرپد کنگ بوت۔ آئی ءَ گوں انجینئر ءُ سائنسداناں ھم گند ءُ نند کتگ۔ صدر ءِ مملکت ءَ اے موہ ءِ سر ءَ گوشت کہ جے 10 ءُ جے ایف 17 ءَ پاک فضائیہ ءَ را مھکم کتگ ءُ مئی 2025ءَ حق ءِ جنگ ءُ آپریشن بنیان المرسوس ءَ ایشانی کارکردگی جوانیں رنگ ءَ بوتگ۔ صدر ءِ مملکت ءَ اے وی آئی سی ءَ را چین ءِ ہائی ٹیکنالوجی ءُ پاک چین ءِ اسٹریٹجک شریکداری ءِ علامت لیک اتگ۔ آ اولی درملکی رہشون اِنت کہ اے کمپلیکس ءِ تر ءُ تاب ءَ کنت۔ صدر ءِ مملکت ءِ ھمراھی ءَ چیئرمین بلاول بھٹو زرداری، بانُک اول آصفہ بھٹو زرداری ءُ سینیٹر سلیم مندوی والا ھم ھوار ات۔ اے موہ ءِ سر ءَ چین ءِ تہ ءَ پاکستان ءِ سفیر خلیل ھاشمی ءُ چین ءِ سفیر جیانگ ژاؤڈونگ ھم ساڑی بوتگ اَنت۔ پاکستان ءَ دفاعی پیداوار ءُ ہوابازی ءِ شوبگ ءَ چین ءِ گوما کمک ءَ را گیش گیش کنگ ءِ جزم ءِ یک رندے پدر کت۔ اے تر ءُ تاب بھارت ءِ گوما جنگ بندی ءِ 128می روچ ءَ بوتگ۔