چیف آف آرمی اسٹاف فیلڈ مارشل سید عاصم منیر نشان امتیاز (ملٹری)، ہلال جرات  ءَ قصور سیکٹر ءُ ملتان ءِ جلال پور پیروالہ ءَ سیلاب ءِ کمکی کیمپ آنی تر ءُ تاب کتگ، کمکی کارانی چار ءُ تپاسی کتگ، آئی ایس پی آر

اسلام آباد۔13ستمبر  (اے پی پی):  چیف آف آرمی اسٹاف فیلڈ مارشل سید عاصم منیر نشان امتیاز (ملٹری)، ہلال جرات ءَ قصور سیکٹر ءُ ملتان ءِ جلال پور پیروالہ ءَ سیلاب ءِ انوگیں جاور ءُ برجاھیں کمکی کار آنی سر ءَ چار ءُ تپاسی کتگ۔ انٹر سروسز پبلک ریلیشنز ءِ نیمگ ءَ چہ جاڑی بوتگیں پریس ریلیز ءِ رد ءَ آرمی چیف ءِ سیلاب ءَ چہ آماچیں قصور ءُ ملتان ءِ دمگ آنی تر ءُ تاب ءِ تہ ءَ سول انتظامیہ ءُ فوج ءِ نیام ءَ ھمگرنچی ءَ را گیش کنگ ءِ سر ءَ دلگوشی دیگ بوتگ تانکہ آماچیں آبادی ءَ را موثر ریلیف دیگ بہ بیت۔ اے موہ ءِ سر ءَ چیف سیکرٹری پنجاب ءُ سول انتظامیہ ءِ ایندگر مزنیں کارندہ ھم ساڑی ات انت۔ تر ءُ تاب ءِ وھد ءَ پاک اُرد ءِ سروک ءَ را سیلاب ءَ چہ آماچیں دمگ آنی تہ ءَ ریسکیو ءُ ریلیف آپریشن آنی ھوالگ ءَ استیں جاور آنی ھوالگ ءَ سرجمیں بریفنگ دیگ بوت۔ آئی ءَ مدنی انتظامیہ ءِ گوما رابطہ کاری ءِ وھد ءَ سرکاری ھزمت ءِ بنیات ءَ جوانیں حکومت داری ءُ دیمروئی ءِ ارزشت ءِ سر ءَ زور پر دات۔ آئی ءَ سیلاب ءِ سبب ءَ بوتگیں آفت آنی چہ الس ءَ را رکھینگ ءِ واستہ المی ئیں بنیاتی ڈھانچہ آنی دیمروئی ءَ ھوار درستیں المی گامگیج آناں ترند کنگ ءِ ضلورت ءِ سر ءَ ھم زور پر دات۔ آئی ءَ گوشت کہ ریاست گران بھائیں جان ءُ مال ءِ تاوان ءَ ھمک سال برداشت نہ کنت۔ آئی ءَ سیلاب ءَ چہ آماچیں کمیونٹیز ءَ را چیلنج آنی گیواری ءِ واستہ یکجاھیں سول ملٹری کوشست آنی ارزشت ءِ سر ءَ زور پر دات ءُ الس ءِ وشھالی ءِ واستہ ھمک رنگ ءِ گامگیج آنی کمک ءِ واستہ پاک اُرد ءِ بے دروریں عزم ءِ سر ءَ زور پر دات۔ چیف آف آرمی اسٹاف ءَ پاک فوج ءُ سول انتظامیہ ءِ نیمگ ءَ چہ رکینتگیں سیلاب ءِ آماچیں مردم آنی گوما گپ ءُ تران کنان ءَ آوانی آباد ءُ بحالی ءِ واستہ برجاھیں کمک ءِ دل یکیمی دات۔ آرمی چیف ءَ فوجی کارندہ، ریسکیو 1122 ءُ کمکی کاراں گوں بندوکیں پولیس ءِ کارندہ آں گوں ھم گند ءُ نند کتگ۔ آئی ءَ انتہائی مشکلیں جاور آنی تہ ءَ راج ءِ ھزمت کنگ ءِ تہ ءَ آوانی مزنیں حوصلہ، آپریشنل تیاری ءُ استحکام ءِ توسیپ کت۔ آئی ءَ الس ءَ را وھد ءِ سر ءَ ریلیف ءُ کمک ءِ پجاری ءِ واستہ سول انتظامیہ ءِ گوما نزیکیں ھمگرنچی ءَ 24 کلاک ءِ کوشست آناں ھم ساڑات۔ چیف آف آرمی اسٹاف ءَ لاہور، قصور، ملتان ءُ جلال پور پیروالہ ءِ سیلاب ءَ چہ آماچیں دمگ آنی ھوائی سروے ھم کتگ تانکہ تاوان ءِ جاور ھال ءُ برجاھیں کمکی کار آنی سر ءَ چار ءُ تپاسی کنگ بہ بیت۔ ایشی ءَ چہ پیسر فیلڈ مارشل ءَ را سیلاب ءِ آماچیں دمگاں سر بوھگ ءَ گوں لاہور ءُ ملتان ءِ کور کمانڈراں آئی ءِ وش آتک کتگ۔