پاکستان دیمروئی کنگئَ اِنت، معیشت مھکمیں بنیاتانی سرئَ رھادگ اِنت، صنعت دیمروئی کنگئَ اِنت، توانائی ئِ پڑئَ جیڑھءُ جنجال سوبمندیئِ گوما گیشءُ گیوار کتگ
کراچی ۔20نومبر(اے پی پی ) مزن وزیر شاہد خاقان عباسی ئَ گشتگ کہ پاکستان دیمروئی کنگئَ اِنت، معیشت مھکمیں بنیاتانی سرئَ رھادگ اِنت، صنعت دیمروئی کنگئَ اِنت، توانائی ئِ پڑئَ جیڑھءُ جنجال سوبمندیئِ گوما گیشءُ گیوار کتگ ، مئے وش بھتی اِنت کہ مہ اے منصوبہ ئِ بُن اِشت ایر کتگ ایشی ئَ را ھم سرجم کتگ، بانداتئَ ایل این جی ٹرمینل ئِ تہا زرکاری کنگئِ مزنیں موھ اَست ، آﺅکیں سئے سالانی تہا ایل این جی ئِ لوٹ ئِ تہا 30ملین ٹنئَ چہ گیش رﺅت، بازیں حلقہ آنی نیمگئَ چہ ایر جنگءُ اعتراض کنگئَ ابید ھم اے یک راست اِت کہ ایل این جی توانائی ئِ ارزانیں تریں وسیلگ اِت۔ آ دوشمبے ئِ روچئَ پورٹ قاسم ئِ سرئَ ایل این جی گیس ٹرمینل ئِ بنگیجی مراگشئَ گوں تران کنگئَ بوتگ ۔ اے موھئَ گورنر سندھ محمد زبیر ، ملکی وزیر جام کمال خان، چوہدری جعفر اقبال ئَ ابید ھم مزنیں کساسے ھوار بوتگ۔ مزن وزیر شاہد خاقان عباسی ئَ گشتگ کہ پاکستان دیمروئی کنگئَ اِنت ءُ صنعت دیم ئَ رھادگ اَنت۔ آئی ئَ گشتگ کہ 2013ئَ حکومت سنھبال اِتگ آ وھدئَ توانائی ئَ ھوار بازیں جیڑھءُ جنجال اَست بوتگ اَنت ، بجلی ئِ کمی ئِ سوبئَ صنعت ءُ لوگی صارفین سک باز آماچ بوھگئَ اَنت۔ آھانی کساس گیش بوھان اِنت۔ مزن وزیرئَ گشتگ کہ اے ٹرمینلز بے حکومتی وت واکی گارنٹی ئِ لگگئَ اَنت ءُ اے اولی منصوبہ اِنت کہ چوں اے وڈئَ بے حکومتی گارنٹی ئَ لگگئَ اِنت ءُ دیمئَ ھم اے وڈیں گیش ٹرمینلز جوڈ بنت۔ آئیئَ گشتگ کہ حکومت ئِ کار بیپار کنگ نہ بلکیں ریگولیٹری فریم ورک ءُ ضلوری آسراتی پھجارینگ اِنت۔ مزن وزیر ئَ گشتگ کہ 1360میگاواٹ ئِ کول پلانٹ ئِ گڈی بھر سرجم بوھگئَ اِنت، اِشکر ئَ چہ بجلی ودی کنوکیں گیش بجلی لوگ جوڈ کنگ بوھگئَ اَنت۔ حکومتی توانائی ئِ بازیں وسیلگ آنی سرئَ دلگوشی کنگئَ اِنت۔ ملکئِ تہا ٹرمینلز وتی سرجمیں آسراتی آنی گوما کار کنگ ئَ اَنت۔ آئیئَ ملکی معاشی دیمروئی ئِ زکر کتگءُ گشتگ کہ گوازوکیں سال پاکستانئَ شرح نمو 5.3درسد وھدے کہ آﺅکیں سال 6درسد بوھگئِ اُمیت اِنت۔ مزن وزیرئَ گشتگ کہ پاکستان گیسئِ ھوالگئَ یک مزنیں مارکیٹ اِت۔ ایشیئِ تہا ایل این جی یک ارزان تریں وسیلگ اِت۔ آئی ئَ گشتگ کہ حکومت توانائی ئِ جیڑھءُ جنجالانی گیشءُ گیوار کنگئَ گامگیج چست کنگئَ اَنت۔ مہ کہ اے منصوبہ بندات کتگ کہ ایشی ئَ را سرجم ھم کتگ۔ گوستئَ سیاستدان ءُ حکومت تنا منصوبہ آنی بُن اِشت ئَ ایر کن اَنت بلے مئے وش بھتی اِنت کہ ھما منصوبہ ئِ بُن اِشت ایر کتگ آ سرجم کتگ۔ مزن وزیرئَ گشتگ کہ پاکستان گیس پورٹ کنسورشیم ئِ کمک ئَ چہ اے ٹرمینل جوڈ کنگ بوتگ کہ ایشی ئِ تہا چین ، جاپان ءُ یورپ ئِ کمپنی ھوار اَنت۔ مزن وزیر ئَ گشتگ کہ اقبال زیڈ احمد ئَ کوشستءُ محنت ئِ گوما ٹرمینل منصوبہ سرجم کتگ۔ توانائی ئِ پڑئَ اقبال زیڈ ئِ کارلکھ ستاھ کرز ایت۔
