اسلام آباد۔12مئی (اے پی پی): مزن وزیر محمد شہباز شریف ءَ جنوبی ایشیائی دمگ ءَ گوستگیں وھد ءَ پاکستان ءِ گوما سرجمیں یکوئی ءِ درشان کنگ ءِ ھاتر ءَ صدر رجب طیب اردوان ءُ ترک راج ءِ دل ءِ جہلانکی ءَ چہ منت واری ءِ درشانی کتگ ءُ اے گپ ءِ پدا زور داتگ کہ پاکستان مدام ایشیا ءِ دمگ ءَ امن ءِ واھشت ءَ دار ایت۔ حاکمیت ءُ علاقائی یکوئی ءِ سرا زور دنت۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر محمد شہباز شریف ءَ گوں پاکستان ءَ جمہوریہ ترکی ءِ سفیر عرفان نذروغلو ءَ گند ءُ نند کتگ۔ مزن وزیر ءَ جنوبی ایشیا ءَ گوستگیں کش ءُ چیل ءِ وھد ءَ پاکستان ءِ گوما سرجمی ءَ یکوئی ءِ درشان کنگ ءِ واستہ صدر رجب طیب اردوان ءِ دل ءِ جہلانکی ءَ چہ منت واری ءِ درشان کت۔ مزن وزیر ءَ گوشت کہ وتی برجاھیں کمک ءِ وسیلگ ءَ صدر اردگان ءَ یک رندے پدا پاکستانی الس ءِ دل وتی نیمگ ءَ کتگ انت۔ مزن وزیر ءَ ترکی ءِ براتیں الس ءِ ھم شگر ءُ منت گپت کہ آ اے گرانیں ساھت ءَ وتی پاکستانی برات ءُ گہار آنی ھمراہ داری ءَ اوشتاتگ انت، اے رنگ ءَ پاکستان ءُ ترکی ءِ براتیں سیادی ءِ راجدپتر ءِ تہ ءَ یک نوکیں ءُ شانداریں باب ءِ ھوار کنگ بوتگ۔ مزن وزیر ءَ پاکستان ءِ بہادریں سلاہ بندیں اُرد آناں شانداریں شگر ءُ منت پیش کت ءُ گوشت کہ پاکستان ءِ سلاہ بندیں اُرد ءَ ’’آپریشن بناشن مرسوس‘‘ ءِ وسیلگ ءَ دژمن ءَ را لائکیں پسو دات ءُ آئی ءِ نا شریں منصوبگ آناں ناکام کت۔ مزن وزیر ءَ گوشت کہ اے راجدپتری سوبمندی ءِ واستہ سرجمیں راج اللہ تعالیٰ ءِ شکر گزار انت ۔ آئی ءَ یک رندے پدا گوشت کہ پاکستان ءَ مدام جنوبی نیم کرہ ءَ امن ءِ واھشت بوتگ بلے وتی وت واجہی ءُ سرزمین ءِ یکوئی ءِ ھچ وڑیں لگتمالی ءَ را کدی منگ نہ بیت۔ آئی ءَ گوشت کہ ھمے سرپدی ءِ رد ءَ پاکستان ءَ بھارت ءِ گوما جنگ بندی ءِ منگ ءِ سر ءَ تپاک کتگ ۔ دو نیمگی سیادی ءِ ھوالگ ءَ مزن وزیر ءَ پاکستان ءُ ترکی ءِ نیام ءَ براتی سیادی ءِ جوانیں مومنٹم ءِ سر ءَ دل یکیمی ءِ درشان کت کہ اے سال ءِ فروری ءَ صدر رجب طیب اردوان ءِ اسلام آباد ءِ تر ءُ تاب ءَ پد یکوئی ءَ گوں دیمروئی کنگ ءَ انت۔ مزن وزیر ءَ انقرہ ءِ گوستگیں تر ءُ تاب ءِ یات ءَ کنان ءَ دوئیں ملک آنی نیام ءَ مزن تک ءِ گند ءُ نند ءِ ساھت ءَ بوتگیں توامیں ھاسیں معاہدگ آنی وھد ءُ پاس ءِ سر ءَ عمل کنگ ءِ ضلورت ءِ سر ءَ زور پر دات۔ اے درگت ءَ آئی ءَ گوشت کہ دوئیں ملک آنی دری کارانی وزیر آنی تک ءَ یکجائی کمیشن ءِ زوتاں چہ زوت گوانک کنگ بہ بیت۔ ترکی ءِ سفیر ءَ مزن وزیر ءُ سرجمیں پاکستانی راج ءَ را جنگی ءُ سفارتی سوبمندی ءِ پد ءَ مبارک بات دات۔ آئی ءَ گوشت کہ ترکی ءِ الس پاکستان ءِ سوبمندی آں چہ وش انت ءُ جنوبی ریاست آنی تہ ءَ امن ءِ واستہ پاکستان ءِ کوشست ءُ عزم ءَ را ساڑاھگ ءَ انت۔ آئی ءَ گوشت کہ صدر اردوغان ھمک شوبگ ءَ دوئیں ملک آنی نیام ءَ مھکمیں براتی سیادی آناں گیش مھکم کنگ ءِ واھشت مند اِنت، ایشی ءِ تہ ءَ مزن تک ءِ ادارگی چست ءُ ایر برجاہ بنت۔
