میلبورن ۔ 07 جون (اے پی پی) آسٹریلیا و سویلی افریقہ نا کرکٹ ٹیم تا نیام اٹ اینخو نا سال نومبر اٹی شیڈول ایڈیلیڈ ڈے اینڈ نائٹ ٹیسٹ میچ انا گڈیکو فیصلہ (اینو)چارشنبے آ کننگک۔ سویلی افریقن ٹیم ہنداسال نومبر اٹی آسٹریلیا نابرخلاف ٹیسٹ سریز ئِ گوازی کروئی ئِ ۔ کرکٹ آسٹریلیا سیریز نا اسہ ٹیسٹ ئِ ڈے اینڈ نائٹ تخنگ نا فیصلہ کریسس ہراڑآ سویلی افریقن کرکٹرز آک گڑتی ظاہر کریسر ہرانا سوب گڈیکو فیصلہ مننگ کتویسس۔ سویلی افریقن کرکٹرز ایسوسی ایشن نا چیف ایگزیکٹو آفیسر ٹونی آئرش نا رداٹ ننا دا معاملہ نا بابت سی اے کمامدارآتون ہیت وگپ جاری ئِ، اومیتئِ کہ پگہ چارشنبے اسکان گڈیکو فیصلہ مریک۔ تدوک آ ہفتہ آسٹریلوی میڈیا داوا کریسس کہ سویلی افریقن کرکٹرز ڈے اینڈ نائٹ ٹیسٹ گوازی کننگ کن راضی مسنے واہم داہیت انا باضابطہ وڑاٹ پڑو مننگ داسکان سلوک ئِ۔ آسٹریلیا مسکوہی سال نومبر اٹی نیوزی لینڈ نابرخلاف اولیکو وار ڈے اینڈ نائٹ ٹیسٹ انا میزبانیئِ کرسا پوسکن ئُ تاریخ اس رقم کریسس و میچ ئِ پورو کننگ آ سی اے نیوزی لینڈ ئِ ملین ڈالر معاوضہ تسوسس۔
