پاکستان نا سلامتی کونسل نا قرارداد آتیا عملدرآمد کن گام گیج نا خواست
دنیا ئِ سیکورٹی تون اوار کیہی چیلنج آتا مون تروکی ئِ، کشمیری تے حق خودارادیت آن محروم کننگ انگ ئِ، بدقسمتی اٹ اقوام متحدہ نا چارٹرآ عملدرآمد متو، پاکستان ئِ دے ٹکی سیم آن مدام خطرہ مسنے، روہنگیا مسلمان آتون بیدادی مننگ ئِ، پاکستان بھارت تون غٹ متکن آ جھیڑہ غاتا ایسری کن جامع مذاکرات نا خواہندار ئِ، اوغانستان اٹی گدرینگوک آ 16سال آن جاری جنگ انا اسٹ انگا ایسری مذاکرات ئِ، طالبان تا رکھوک ٹھکانہ غاک پاکستان اٹی آخااوغانستان اٹی ئُ، دہشت گردی ئِ چٹفنگ کن اونا سوب آتے چٹفوئی مریک
اقوام متحدہ۔ 22ستمبر (اے پی پی) پاکستان کشمیر نا بابت اقوام متحدہ نا سلامتی کونسل نا قرارداد آتیا عملدرآمد کن گام گیج ناخواست کرسا پارینے کہ کشمیر نا ویل انا منصفانہ و پرامن ایسری کن اقوام متحدہ نا خصوصی نمائندہ اس پن کننگے ، جہانی برادری حالیت آتے خطرناک مننگ آن بچفنگ کن فیصلہ کن کڑد ادا کے۔ وزیراعظم شاہد خاقان عباسی پارینے کہ دنیا ئِ سیکورٹی تون اوار کیہی چیلنج آتا مون تروکی ئِ، کشمیری تے حق خودارادیت آن محروم کننگ انگ ئِ، بدقسمتی اٹ اقوام متحدہ نا چارٹر آ عملدرآمد متو، پاکستان ئِ دے ٹکی سیم آن مدام خطرہ مسنے، روہنگیا نا مسلمان آتون بیدادی مننگ ئِ،پاکستان بھارت تون غٹ متکن آ جھیڑہ غاتا ایسری کن جامع مذاکرات نا خواہندار ئِ۔ اوغانستان اٹی گدرینگوک آ 16سال آن جاری جنگ انا اسٹ انگا ایسری مذاکرات ئِ، طالبان تا رکھوک ٹھکانہ غاک پاکستان اٹی آخا اوغانستان اٹی ئُ، دہشت گردی ئِ چٹفنگ کن اونا سوب آتے چٹفوئی مریک۔ اقوام متحدہ نا جنرل اسمبلی نا 72می دیوان آن تران کرسا وزیراعظم شاہد خاقان عباسی پارے کہ او میکسیکو ٹی زمی جمب آن جانی نسخان آ ڈکھ و است ہسونی نا درشانی ئِ کیک۔ اوپارے کہ دنیا ئِ سیکورٹی تون اوار کیہی چیلنج آتا مون تروکی ئِ، بدقسمتی اٹ اقوام متحدہ نا چارٹر آ باقاعدہ عملدرآمد متو، داعش عراق و شام اٹی دہشت گردی کارروائی تیٹی اوار ئِ، فسلطین نا ویل انا ایسری بھاز المی ئِ، کشمیری تے حق خودارادیت آن محروم کننگ انگ ئِ۔ وزیراعظم پارے کہ روہنگیا مسلمان آتون دنیا خننگ ئِ کہ بیدادی مننگ ئِ، امن ، سلامتی و شونداری نا دوئی المی ئِ، 70 سال آتے ٹی پاکستان اقوام متحدہ ٹی جوڑجاڑی کڑد ادا کرے، امن مشن کن پاکستان نا کڑد اہم مسنے۔ اوپارے کہ پاکستان ئِ دے ٹکی کنڈآن مدام ہی خطرہ مسنے، بھارت کشمیر اٹی 7 لکھ آن زیات فوجی تعینات کرینے، کشمیری تے حق خودارادیت آن محروم کننگ انگ ئِ، بھارت کشمیری تے واک انا زی آ توننگ ئِ ، ہزار آ کشمیری تے پیلٹ گن آتے اٹ بینائی آن محروم کننگا، پاکستان مقبوضہ کشمیر اٹی بھارتی بیدادی نا جہانی جاست وپاست نا خواست ئِ کیک، بھارت کشمیر اٹی انسانی حق انا خلاف ورزی ئِ کننگ ئِ، پاکستان پرامن ہمسائیگی نا پالیسی آ عمل کننگ ئِ، بھارت ہندا سال 600 وار آن زیات لین آف کنٹرول نا خلاف ورزی ئِ کرینے، پاکستان کشمیر تون اوار کیہی ویل آتیا بھارت آن مذاکرات نا خواہندار ئِ، اقوام متحدہ کشمیر نا زی آ تینا قرارداد آ عملدرآمد ئِ ممکن جوڑ کے، اقوام متحدہ نا قرارداد آ کیہی دہائی تیان عملدرآمد مننگ کتنے۔ اوپارے کہ اوغانستان اٹی سول وار انا خمیازہ ئِ پاکستان ئِ بھگتوئی تما، پاکستان لکھ آ اوغان باہوٹ آتا مہمانداری ئِ کننگ ئِ، اوغانستان نا ویل انا ایسری فوجی آخا سیاسی ئِ، گدرینگوک آ 16سال آن اوغانستان اٹی جاری جنگ انا ایسری بیرہ مذاکرات ئِ، اوغان جنگ انا سوب پاکستان اٹی سلہہ و منشیات نا بھرمارمس، انسداد دہشت گردی کوشست آتا باوجود پاکستان آ دوبہ خلنگسا کرے، طالبان تا رکھوک ٹھکانہ غاک پاکستان اٹی آخا اوغانستان اٹی ئُ، پاکستان سیمی علاقہ غاتیٹی دہشت گرد آتا ٹھکانہ غاتے چٹفے، اوغانستان اٹی امن نا خواہش پاکستان آن زیات ہچ گہس ئِ اف، اوغانستان اٹی نزوری ڈیہہ کن نسخاندہ ئِ، پاکستان قبائلی علاقہ غاتے دہشت گرد آتیان پاک کرینے۔ وزیراعظم دہشت گردی نا برخلاف جنگ اٹی پاکستان نا قربانی تاذکرئِ کرسا پارے کہ داجنگ اٹی ہزار آ پاکستانیک جان تسر، نن دہشت گردی نا برخلاف جنگ ئِ تینا وسیلہ غاتے اٹ کننگ اُن، نن انسداد دہشت گردی کن نیشنل ایکشن پلان آ عملدرآمد کن پرعزم اُن، دہشت گردی تون مون تننگ کن جامع حکمت عملی نا گرج ئِ، دہشت گردی ئِ چٹفنگ کن اونا سوب آتے چٹفوئی مریک۔ وزیراعظم پارے کہ پاکستان نا جوہری پروگرام گچین کمانڈ اینڈکنٹرول اٹی ئِ، موحولیاتی بدلیک آخبت اٹی انسانیت کن بھلو خطرہ اسے، ماحولیاتی بدلی تتون مون تننگ کن پیرس معاہدہ غا بایدے عملدرآمد مرے، پاکستان نا معیشت اٹی قدر انا قابل گچینی بسنے، پاکستان چین اقتصادی راہداری معاشی سوگوی نا سوب جوڑ مس، السی شونہالی کن پاکستان امن نا مون آ دننگ نا خواہندار ئِ۔ اوپارے کہ علاقائی امن و سوگوی نا ہرکوشست نا مخ تفی ئِ برجاتخنہ۔ وزیراعظم شاہد خاقان عباسی جہانی راہشون آتے پارے کہ پاکستان نا معیشت گدرینگوک آ چار سال اٹی شاندار گچینی بسنے۔ اوپارے کہ چائنہ پاکستان اکنامک کوریڈور اقتصادی شونداری کن پین اہم کڑد ادا کیک۔ اوپارے کہ پاکستان و چین نا نیام اٹ شریداری ، توانائی و ٹرانسپورٹیشن آن ہلیس کیہی ایلو بشخ آتسکان تالان مریک۔ اوپارے کہ پاکستان 207 ملین نا ورناتیا تالان آبادی تون پراعتماد ئِ کہ او ودوک آ کٹیا، کھپت و پیداوار ئِ کاریم اٹ اتسا اقتصادی حکومت عملی نا کمک اٹ شونہالی نا کنڈآ کاہک۔ اوپارے کہ پاکستان تینا ہدف آتا دوئی کن تینا ملک انا تہٹی و تینا سیم تا ایب وکیب سلامتی نا خواہندار ئِ۔ اوپارے کہ نن غٹ ریاست آتون بریبری و وت واجہی نا بنداو آ گچین تعلقداری تا خواہندار اُن و نن سنگتی و کمکاری نا غٹ پیش کش آتیا مثبت وڑاٹ مون آ کانہ۔
